Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

Jesus—Ang Dalan, ang Kamatuoran, ang Kinabuhi

 KAPITULO 16

Madasigon si Jesus sa Matuod nga Pagsimba

Madasigon si Jesus sa Matuod nga Pagsimba

JUAN 2:12-22

  • GIHINLOAN NI JESUS ANG TEMPLO

Human sa kasal sa Cana, si Jesus miadto sa Capernaum. Kauban niya ang iyang inahan ug mga igsoon nga si Santiago, Jose, Simon, ug Judas.

Pero nganong miadto si Jesus sa Capernaum? Kini nga siyudad mas ilado ug mas dako kay sa Nasaret o Cana. Daghan sab sa bag-ong mga tinun-an ni Jesus ang taga-Capernaum o nagpuyo duol didto. Busa puwede silang bansayon ni Jesus diha mismo sa ilang lugar.

Si Jesus nagsangyaw ug naghimog mga milagro samtang naa siya sa Capernaum. Busa daghang tawo nianang siyudara ug sa mga lugar duol niana ang nakadungog sa gipanghimo ni Jesus. Pero si Jesus ug ang iyang mga tinun-an, nga debotadong mga Hudiyo, kinahanglan nang moadto sa Jerusalem aron saulogon ang Paskuwa sa 30 C.E.

Samtang didto sa templo sa Jerusalem, may gihimo si Jesus nga karon pa lang nakita sa iyang mga tinun-an.

Ang Balaod sa Diyos nagsugo sa mga Israelinhon sa paghalad ug hayop didto sa templo, ug nagkinahanglan silag pagkaon samtang naa sila sa Jerusalem. Busa ang Balaod nagtugot niadtong mobiyahe gikan sa layong lugar nga magdalag kuwarta aron ipalit ug mga baka, karnero, kanding, ug uban pang kinahanglanon. (Deuteronomio 14:24-26) Tungod niana, ang mga negosyante sa Jerusalem namaligyag mga hayop o langgam sa sulod mismo sa templo. Ug nangilad ang ubang negosyante kay taas kaayog presyo ang ilang mga baligya.

Tungod sa kasuko ni Jesus, iyang gipangyabo ang mga sensilyo sa mga tig-ilis ug kuwarta, gipanglintuwad ang ilang mga lamesa, ug giabog pagawas ang mga negosyante. Siya miingon: “Panguhaa ninyo kini dinhi! Ayaw ninyo himoang negosyohanan ang balay sa akong Amahan!”—Juan 2:16.

Pagkakita sa mga tinun-an niini, ilang nahinumdoman ang tagna bahin sa Anak sa Diyos: “Ang akong kasingkasing nagdilaab sa kasibot alang sa imong balay.” Pero ang mga Hudiyo nangutana: “Unsang ilhanan ang imong ikapakita kanamo nga duna kay katungod sa paghimo niini?” Mitubag si Jesus: “Gub-a kining temploha, ug tukoron nako kini pag-usab sulod sa tulo ka adlaw.”—Juan 2:17-19; Salmo 69:9.

Nagtuo ang mga Hudiyo nga ang gipasabot ni Jesus mao ang literal nga templo sa Jerusalem, maong nangutana sila: “Kini nga templo gitukod sulod sa 46 ka tuig, unya tukoron nimo kini pag-usab sulod lang sa tulo ka adlaw?” (Juan 2:20) Pero ang templo nga gipasabot ni Jesus mao ang iyang lawas. Tulo ka tuig sa ulahi, nahinumdoman sa iyang mga tinun-an kining mga pulonga dihang nabanhaw siya.

Pagkat-og Dugang

Si Elias Mibarog Dapig sa Putli nga Pagsimba

Sa unsang paagi nato masundog si Elias dihang makaatubang ug mga tawong dili mouyon sa gitudlo sa Bibliya?