Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

Jesus—Ang Dalan, ang Kamatuoran, ang Kinabuhi

 KAPITULO 10

Ang Pamilya ni Jesus Mibiyahe Paingon sa Jerusalem

Ang Pamilya ni Jesus Mibiyahe Paingon sa Jerusalem

LUCAS 2:40-52

  • ANG 12 ANYOS NGA SI JESUS NANGUTANA SA MGA MAGTUTUDLO

  • GITAWAG NI JESUS SI JEHOVA NGA “AKONG AMAHAN”

Miabot na ang panahon nga ang pamilya ni Jose, kauban ang ilang mga higala ug paryente, mobiyahe paingon sa Jerusalem, nga ginahimo nila kada tuig. Moadto sila didto aron saulogon ang Paskuwa, ingon sa gisugo sa Balaod. (Deuteronomio 16:16) Mga 120 kilometros ang gilay-on sa Nasaret paingon sa Jerusalem. Seguradong ang tanan nangandam ug eksayted kaayo! Si Jesus, nga 12 anyos na, eksayted kaayong motambong sa kapistahan ug moadto na sab sa templo.

Para kang Jesus ug sa iyang pamilya, ang Paskuwa dili lang kay usa ka adlaw nga okasyon. Inigkahuman sa adlaw sa Paskuwa, magsugod na sab ang pito ka adlaw nga Pista sa Tinapay nga Walay Pangpatubo. (Marcos 14:1) Giisip kini ingong bahin sa pagsaulog sa Paskuwa. Ang biyahe gikan sa Nasaret, ang pagpuyo sa Jerusalem, ug ang pagpauli sa ilang balay, moabot ug mga duha ka semana. Pero mas dugay ang ilang biyahe niining tuiga tungod sa ilang nadiskobrehang problema samtang nagbiyahe pauli.

Kay daghan man silang nagbiyahe, nagtuo si Jose ug Maria nga si Jesus kauban ra sa ilang mga paryente ug higala. Pero sa gabii nga namahulay sila, wala nila makita si Jesus. Maong gipangita nila siya sa ilang mga kaubang nagbiyahe, pero wala nila siya makit-i. Asa kaha ang ilang anak? Si Jose ug Maria mibalik sa Jerusalem aron pangitaon si Jesus.

Tibuok adlaw silang nangita kang Jesus pero wala nila siya makit-i. Sa ikaduhang adlaw, wala gihapon nila siya makita. Sa ikatulong adlaw, nakit-an ra gyod nila si Jesus didto sa templo. Naglingkod siya taliwala sa Hudiyong mga magtutudlo, nga namati ug nangutana nila. Nahingangha sila sa kaalam ni Jesus.

Si Maria nangutana: “Anak, nganong imo man ning gibuhat namo? Natarantar mi sa imong amahan ug pinangita nimo.”—Lucas 2:48.

Natingala si Jesus kon nganong wala sila mahibalo kon asa siya. “Diin man diay mo nangita nako? Wala ba mo mahibalo nga anhi ra ko ninyo makita sa balay sa akong Amahan?”—Lucas 2:49.

Karon nga nagkita na sila, si Jesus mikuyog kang Jose ug Maria pauli sa Nasaret ug padayon nga nagpasakop nila. Samtang nagdako, nag-uswag sab ang iyang kaalam. Bisag bata pa, siya giuyonan sa Diyos ug sa mga tawo. Sukad sa iyang pagkabata, si Jesus usa ka maayong panig-ingnan dili lang sa pagpabili sa espirituwal nga mga butang, kondili sa pagpakita sab ug pagtahod sa iyang ginikanan.

Pagkat-og Dugang

Si Jesus Nakakat-on nga Magmasinugtanon

Bisag hingpit si Jesus, nganong angay siyang makakat-on nga mahimong masinugtanon?