Laktaw ngadto sa video

Laktaw ngadto sa secondary menu

Laktaw ngadto sa kaundan

Mga Saksi ni Jehova

Cebuano

Unsay Tinuod nga Gitudlo sa Bibliya?

 APENDISE

Kon Nganong ang Matuod nga mga Kristohanon Dili Mogamit ug Krus Diha sa Pagsimba

Kon Nganong ang Matuod nga mga Kristohanon Dili Mogamit ug Krus Diha sa Pagsimba

ANG krus gimahal ug gitahod sa milyonmilyong tawo. Ang The Encyclopædia Britannica nagtawag sa krus “ang pangunang simbolo sa Kristohanong relihiyon.” Bisan pa niana, ang matuod nga mga Kristohanon dili mogamit ug krus diha sa pagsimba. Nganong dili man?

Usa ka hinungdanong katarongan mao nga si Jesu-Kristo wala mamatay sa usa ka krus. Ang Gregong pulong nga sagad gihubad ug “krus” maoy stau·rosʹ. Kini nagpasabot nga “usa ka matul-id nga kahoy o estaka.” Ang The Companion Bible nagpatin-aw: “Ang [stau·rosʹ] wala gayod magpasabot nga duha ka pirasong kahoy nga gibanday sa bisan unsang anggulo . . . Walay nahisulat diha sa pinulongang Grego [sa Bag-ong Testamento] nga nagpasabot sa duha ka pirasong kahoy.”

 Diha sa ubay-ubayng teksto, ang mga magsusulat sa Bibliya naggamit ug laing pulong alang sa instrumento sa pagpatay kang Jesus. Kini ang Gregong pulong nga xyʹlon. (Buhat 5:30; 10:39; 13:29; Galacia 3:13; 1 Pedro 2:24) Kining pulonga nagpasabot lamang nga “usa ka lipak, estik, puspos, o kahoy.”

Sa pagpatin-aw kon nganong usa ka yanong estaka ang kasagarang gigamit sa mga pagpatay isip balaodnong silot, ang librong Das Kreuz und die Kreuzigung (Ang Krus ug ang Paglansang sa Krus), ni Hermann Fulda nag-ingon: “Walay mga kahoy sa tanang dapit nga magamit diha sa mga lugar nga gipili alang sa publikong pagpatay isip balaodnong silot. Busa ang yanong matul-id nga kahoy giugsok sa yuta. Diha niana ang mga tulisan, nga gipataas ang mga kamot ug kasagarang lakip usab ang ilang mga tiil, gigapos o gilansang.”

Apan ang labing makapakombinsir nga pamatuod naggikan sa Pulong sa Diyos. Si apostol Pablo nag-ingon: “Pinaagi sa pagpalit, gipagawas kita ni Kristo gikan sa tunglo sa Balaod pinaagi sa pagkahimong tinunglo inay kita, tungod kay kini nahisulat: ‘Tinunglo ang matag tawo nga gibitay sa estaka [“usa ka kahoy,” King James Version].’” (Galacia 3:13) Gikutlo dinhi ni Pablo ang Deuteronomio 21:22, 23, nga tin-awng nagpunting sa usa ka estaka, dili krus. Sanglit ang maong galamiton sa pagpatay isip balaodnong silot naghimo sa tawo nga “usa ka tinunglo,” dili angayng adornohan sa mga Kristohanon ang ilang balay ug mga imahen ni Kristo nga gilansang.

Walay ebidensiya nga sulod sa unang 300 ka tuig human sa pagkamatay ni Kristo, kadtong nag-angkong mga Kristohanon naggamit sa krus diha sa pagsimba. Apan, sa ikaupat nga siglo, ang paganong Emperador Constantino nakombertir sa apostatang Kristiyanidad ug nagpasiugda sa krus ingong simbolo niini. Bisag unsa pa ang mga motibo ni Constantino, ang krus walay kalabotan kang Jesu-Kristo. Sa pagkatinuod, ang krus pagano ug sinugdanan. Ang New Catholic Encyclopedia nag-admitir: “Ang krus makaplagan sa una-Kristohanon ug dili-Kristohanong mga kultura.” Ang nagkalainlaing awtorisadong basahon naglangkit sa krus uban sa pagsimba sa kinaiyahan ug sa paganong seksuwal nga mga rituwal.

Nan, nganong kining paganong simbolo giduso man? Lagmit, aron ang mga pagano mas sayon nga modawat sa “Kristiyanidad.” Bisan pa niana, ang pagsimba sa bisan unsang paganong simbolo tin-awng gidili sa Bibliya. (2 Corinto 6:14-18) Gidili usab sa Kasulatan ang tanang matang sa idolatriya. (Exodo 20:4, 5; 1 Corinto  10:14) Busa, tungod sa maayo kaayong katarongan, ang matuod nga mga Kristohanon dili mogamit sa krus diha sa pagsimba. *

^ par. 4 Alang sa mas detalyadong paghisgot bahin sa krus, tan-awa ang mga panid 135-139 sa librong Nangatarongan Pinasukad sa Kasulatan, nga gipatik sa mga Saksi ni Jehova.