Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

Unsay Tinuod nga Gitudlo sa Bibliya?

 APENDISE

Kinsa si Miguel nga Arkanghel?

Kinsa si Miguel nga Arkanghel?

DILI subsob ang paghisgot sa Bibliya bahin sa espiritung linalang nga ginganlag Miguel. Bisan pa niana, sa dihang siya gihisgotan, siya may gibuhat nga usa ka butang. Sa basahong Daniel, si Miguel nakigbugno sa daotang mga manulonda; sa sulat ni Judas, siya nakiglalis kang Satanas; ug sa Pinadayag, siya nakiggubat sa Yawa ug sa iyang mga demonyo. Pinaagi sa paglaban sa pagmando ni Jehova ug pagpakig-away sa mga kaaway sa Diyos, si Miguel nagkinabuhi sumala sa kahulogan sa iyang ngalan—“Kinsa ang Sama sa Diyos?” Apan kinsa ba si Miguel?

Ang mga tawo mailhan usahay dili sa usa lang ka ngalan. Pananglitan, ang patriarkang si Jacob nailhan usab nga Israel, ug si apostol Pedro nailhan usab nga Simon. (Genesis 49:1, 2; Mateo 10:2) Sa susama, gipaila sa Bibliya nga ang Miguel maoy laing ngalan ni Jesu-Kristo, sa wala pa ug human sa iyang pagkinabuhi sa yuta. Atong hisgotan ang Kasulatanhong mga katarongan nganong nahidangat kita sa maong pagtuo.

Arkanghel. Ang Pulong sa Diyos nagpunting kang Miguel ingong “arkanghel.” (Judas 9) Ang maong termino nagpasabot nga “pangulong manulonda.” Usa lamang ang maong manulonda. Sa pagkatinuod, ang terminong “arkanghel” makita diha sa Bibliya sa singular nga diwa, dili gayod sa plural. Dugang pa, si Jesus gilangkit sa katungdanan ingong arkanghel. Bahin sa nabanhaw nga Ginoong Jesu-Kristo, ang 1 Tesalonica 4:16 nag-ingon: “Ang Ginoo manaog gikan sa langit uban sa singgit sa pagsugo, uban sa tingog sa arkanghel.” Sa maong paagi ang tingog ni Jesus gibatbat ingong tingog sa usa ka arkanghel. Busa kining  tekstoha nagpasabot nga si Jesus mismo mao ang arkanghel nga si Miguel.

Pangulo sa Kasundalohan. Ang Bibliya nag-ingon nga “si Miguel ug ang iyang mga manulonda nakiggubat sa dragon . . . ug [sa] mga manulonda niini.” (Pinadayag 12:7) Busa, si Miguel mao ang Pangulo sa kasundalohan sa matinumanong mga manulonda. Ang Pinadayag nagbatbat usab kang Jesus ingong Pangulo sa kasundalohan sa matinumanong mga manulonda. (Pinadayag 19:14-16) Ug si apostol Pablo tinong naghisgot sa “Ginoong Jesus” ug sa “iyang gamhanang mga manulonda.” (2 Tesalonica 1:7) Busa ang Bibliya naghisgot kang Miguel ug sa “iyang mga manulonda” ug kang Jesus ug sa “iyang mga manulonda.” (Mateo 13:41; 16:27; 24:31; 1 Pedro 3:22) Sanglit ang Pulong sa Diyos wala magpaila sa bisan diin nga adunay duha ka kasundalohan sa matinumanong mga manulonda sa langit—ang usa nga gipangulohan ni Miguel ug ang usa nga gipangulohan ni Jesus—makataronganon ang pagtuo nga si Miguel mao gayod si Jesu-Kristo diha sa iyang langitnong papel. *

^ par. 1 Ang dugang impormasyon nga nagpakitang ang ngalang Miguel mapadapat sa Anak sa Diyos makaplagan sa Tomo 2, mga panid 393-4, sa Insight on the Scriptures, nga gipatik sa mga Saksi ni Jehova.