Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

Unsay Tinuod nga Gitudlo sa Bibliya?

 APENDISE

Gitagna ni Daniel ang Pag-abot sa Mesiyas

Gitagna ni Daniel ang Pag-abot sa Mesiyas

ANG manalagnang si Daniel nabuhi kapin ug 500 ka tuig una pa sa pagkatawo ni Jesus. Bisan pa niana, gipadayag ni Jehova kang Daniel ang impormasyon nga magpaposible sa pagtino sa panahon nga si Jesus dihogan o itudlo isip Mesiyas o Kristo. Giingnan si Daniel: “Angay kang mahibalo ug magbaton sa hait nga salabotan nga sukad sa paggula sa sugo sa pagpasig-uli ug sa pagtukod pag-usab sa  Jerusalem hangtod sa Mesiyas nga Pangulo, adunay pito ka semana, ingon man kan-umag-duha ka semana.”Daniel 9:25.

Aron matino ang panahon sa pag-abot sa Mesiyas, angayng masayran una nato ang sinugdanang punto sa yugto nga mosangko sa Mesiyas. Sumala sa tagna, kini maoy “sukad sa paggula sa sugo sa pagpasig-uli ug sa pagtukod pag-usab sa Jerusalem.” Kanus-a nahitabo kining “paggula sa sugo”? Sumala sa magsusulat sa Bibliya nga si Nehemias, ang sugo sa pagtukod pag-usab sa mga paril libot sa Jerusalem migula “sa ikakawhaan ka tuig ni Artajerjes nga hari.” (Nehemias 2:1, 5-8) Gipamatud-an sa mga historyano nga ang tuig 474 W.K.P. mao ang unang bug-os nga tuig sa pagmando ni Artajerjes.  Busa, ang ika-20ng tuig sa iyang pagmando maoy 455 W.K.P. Duna na kitay sinugdanang punto alang sa tagna ni Daniel bahin sa Mesiyas, nga mao, 455 W.K.P.

Gipaila ni Daniel kon unsay gidugayon sa yugto sa panahon nga mosangko sa pag-abot sa “Mesiyas nga Pangulo.” Ang tagna naghisgot ug “pito ka semana, ingon man kan-umag-duha ka semana”—sa katibuk-an 69 ka semana. Unsay gidugayon niining yugtoa sa panahon? Ang ubay-ubayng hubad sa Bibliya nag-ingon nga kini maoy mga semana sa mga tuig, dili mga semana nga tagpito ka adlaw. Ang buot ipasabot, ang matag semana naghawas sa pito ka tuig. Kining ideya bahin sa mga semana sa mga tuig o tagpito ka tuig nga yunit, sinati sa mga Hudiyo sa karaang kapanahonan. Pananglitan, sila nagbantay ug tuig nga Igpapahulay matag ikapitong tuig. (Exodo 23:10, 11) Busa, ang matagnaong 69 ka semana motumbas sa 69 ka yunit nga tagpito ka tuig ang matag usa, o sa katibuk-an maoy 483 ka tuig.

Ang buhaton na lang nato karon mao ang pag-ihap. Kon mag-ihap kita ug 483 ka tuig sukad sa tuig 455 W.K.P., kita modangat sa tuig 29 K.P. Kana mao ang eksaktong tuig nga si Jesus nabawtismohan ug nahimong Mesiyas! * (Lucas 3:1, 2, 21, 22) Dili ba ang katumanan sa tagna sa Bibliya maoy talagsaon ug makapalig-on sa pagtuo?

^ par. 2 Sukad sa 455 W.K.P. hangtod sa 1 W.K.P., kana mokabat ug 454 ka tuig. Sukad sa 1 W.K.P. hangtod sa 1 K.P., kana maoy usa ka tuig (walay tuig sero kaniadto). Ug sukad sa 1 K.P. hangtod sa 29 K.P., kana maoy 28 ka tuig. Ang pagsumada niining tulo ka numero mohatag kanato sa katibuk-ang gidaghanon nga 483 ka tuig. Si Jesus ‘gipatay’ sa 33 K.P., sulod sa ika-70 ka semana sa mga tuig. (Daniel 9:24, 26) Tan-awa ang Patalinghogi ang Tagna ni Daniel! kapitulo 11, ug Insight on the Scriptures, Tomo 2, mga panid 899-901. Ang maong duha ka basahon gipatik sa mga Saksi ni Jehova.