Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

Gingharian sa Diyos Nagmando Na!

 KAPITULO 19

Pagpanukod nga Nagpasidungog Kang Jehova

Pagpanukod nga Nagpasidungog Kang Jehova

PUNTO SA KAPITULO

Tibuok kalibotang pagpanukod nakatabang sa kalihokan sa Gingharian

1, 2. (a) Unsay dugay nang ginabuhat sa mga alagad ni Jehova? (b) Unsay gipabilhan ni Jehova?

ANG maunongong mga alagad ni Jehova dugay nang naghimog konstruksiyon o pagpanukod nga nakapadayeg sa iyang ngalan. Pananglitan, ang mga Israelinhon makugihong nakigbahin sa pagtukod sa tabernakulo ug pag-amot ug daghang materyales para niini.—Ex. 35:30-35; 36:1, 4-7.

2 Wala isipa ni Jehova nga ang materyales mao ang pangunang butang nga nagpasidungog kaniya, ni kana ang labing bililhon para niya. (Mat. 23:16, 17) Ang gipabilhan ni Jehova, ang gasang labaw nga nagpasidungog niya, mao ang pagsimba sa iyang mga alagad ug ang ilang kaandam ug kadasig sa buluhaton. (Ex. 35:21; Mar. 12:41-44; 1 Tim. 6:17-19) Tinuod kana. Ngano man? Kay ang bilding maguba ra. Pananglitan, nangawala na ang tabernakulo ug templo. Bisan pa niana, wala malimot si Jehova sa kamahinatagon ug kakugi sa iyang mga alagad nga mitabang pagtukod niana.—Basaha ang 1 Corinto 15:58; Hebreohanon 6:10.

3. Unsay hisgotan niini nga kapitulo?

3 Ang mga alagad ni Jehova karon nagkugi sab sa pagtukod ug mga dapit sa pagsimba. Pagkatalagsaon sa atong nalampos ubos sa pagdumala ni Haring Jesu-Kristo! Klaro, gipanalanginan ni Jehova ang atong paningkamot. (Sal. 127:1) Hisgotan niini nga kapitulo ang pipila sa nahimong pagpanukod ug kon sa unsang paagi kini nagpasidungog kang Jehova. Madunggan sab nato ang komento sa pipila nga nakaapil sa pagpanukod niana.

Pagtukod ug mga Kingdom Hall

4. (a) Nganong nagkinahanglan kitag dugang dapit sa pagsimba? (b) Nganong giusa ang ubang branch? (Tan-awa ang kahong “ Pagpanukod ug Pasilidad sa Branch—Pagpahiuyon sa mga Kauswagan.”)

4 Sumala sa Kapitulo 16, gisugo ta ni Jehova nga magtigom para sa pagsimba. (Heb. 10:25) Ang mga tigom makapalig-on sa atong pagtuo ug mas makapadasig nato sa pagsangyaw. Niining kataposang mga adlaw, si Jehova nagpadali sa buluhatong pagsangyaw. Busa libolibo ang nagaganayan pagsulod sa organisasyon kada tuig. (Isa. 60:22) Kay nagkadaghan  ang ginsakpan sa Gingharian, nagkadako pod ang panginahanglan para sa pasilidad sa pag-imprentag literatura sa Bibliya. Ug dugang dapit sa pagsimba ang gikinahanglan.

5. Nganong haom ang ngalang Kingdom Hall? (Tan-awa sab ang kahong “ Ang New Light Church.”)

5 Sa sayong bahin sa modernong kasaysayan sa katawhan ni Jehova, ilang nakita nga nagkinahanglan silag kaugalingong mga tigomanan. Lagmit usa sa primerong natukod maoy didto sa West Virginia, U.S.A., niadtong 1890. Sa katuigang 1930, nakatukod o nakaremodel ang katawhan ni Jehova ug daghang tigomanan, pero wala pay tinong ngalan. Niadtong 1935 si Brader Rutherford mibisita sa Hawaii, diin gitukod ang tigomanan ug bag-ong pasilidad sa branch office. Dihang gipangutana kon unsay ingalan sa tigomanan, siya mitubag: “Di ba angay natong nganlan kinig ‘Kingdom Hall,’ kay ang atong buluhaton mao ang  pagsangyaw sa Gingharian?” (Mat. 24:14) Kanang haom nga ngalan maoy tawag dili lang niadto nga tigomanan kondili sa kadaghanang tigomanan sa katawhan ni Jehova sa tibuok kalibotan.

6, 7. Unsay epekto sa pagpanukod ug Kingdom Hall diha sa komunidad?

6 Sa katuigang 1970, gikinahanglan ang mas daghan pang Kingdom Hall. Busa ang mga igsoon sa United States naghimog epektibong metodo sa pagtukod ug nindot, praktikal nga Kingdom Hall sa pipila ra ka adlaw. Pagka-1983, mga 200 niana ang natukod sa United States ug Canada. Giporma ang mga regional committee para sa maong pagpanukod. Malamposon kaayo ang maong metodo nga sa 1986, pormal nga giaprobahan sa Nagamandong Lawas ang kahikayan, ug pagka-1987, may 60 na ka Regional Building Committee (RBC) sa United States. * Pagka-1992, gitudlo sab ang mga RBC sa Argentina, Australia, France, Germany, Japan, Mexico, South Africa, ug Spain. Angay natong suportahan ang kugihang mga igsoon nga nagtukod ug mga Kingdom Hall ug Assembly Hall kay ang pagpanukod maoy bahin sa sagradong pag-alagad.

7 Naghatag ug dakong pamatuod sa mga komunidad kining dali nahuman nga mga Kingdom Hall. Pananglitan, usa ka artikulo sa mantalaan sa Spain may ulohang “Pagtuo Makapabalhin ug mga Bukid.” Bahin sa pagtukod sa Kingdom Hall sa lungsod sa Martos, kini nangutana: “Naunsa ba  pagkahitabo nga sa hakog nga kalibotan karon, may mga boluntaryo nga nangabot sa Martos gikan sa lainlaing lugar [sa Spain] ug nagtukod ug bilding nga kinalabwag rekord sa kapaspas, kakompleto, ug kaorganisado?” Gitubag kana sa artikulo, nga gikutlo ang pulong sa usa ka Saksing boluntaryo: “Nahimo kana kay kami tinudloan ni Jehova.”

Pagpanukod Diha sa Dili Datong mga Nasod

8. Sugod sa 1999, unsang programa ang giaprobahan sa Nagamandong Lawas, ug ngano?

8 Sa naghinapos ang ika-20ng siglo, ang mga tawo sa dili datong mga nasod nagaganayan pagsulod sa organisasyon ni Jehova. Naningkamot pagtukod ug tigomanan ang mga kongregasyon. Ugaling sa pipila ka nasod, sila gibiaybiay ug gisaway kay ang ilang Kingdom Hall sama rag balongbalong kon itandi sa mga simbahan sa ubang relihiyon. Pero sugod sa 1999, may programa nga giaprobahan ang Nagamandong Lawas para mas daghang Kingdom Hall ang matukod diha sa dili datong mga nasod. Ang pondo nga gikan sa mas datong mga nasod gitagana para may “pag-angay-angay.” (Basaha ang 2 Corinto 8:13-15.) Ug ang kaigsoonan sa ubang nasod miboluntaryo aron motabang sa buluhaton.

9. Unsang buluhaton ang morag imposible, pero unsay nalampos?

9 Sa primero, ang buluhaton morag imposible. Ang report sa 2001 miingon nga kapig 18,300 ka Kingdom Hall ang gikinahanglan sa 88 ka dili datong nasod. Hinuon, walay buluhaton nga imposible kon kana paluyohan sa espiritu sa  Diyos ug sa Haring Jesu-Kristo. (Mat. 19:26) Sa mga 15 ka tuig, gikan sa 1999 hangtod 2013, natukod ang 26,849 ka Kingdom Hall ingong bahin sa programa. * Padayon ang panalangin ni Jehova sa pagsangyaw, mao nga sa 2013, mga 6,500 pa ka Kingdom Hall ang gikinahanglan sa maong mga nasod, ug pagkakaron, madugangan kanag ginatos kada tuig.

Dunay linaing mga kalisdanan ang pagtukod ug mga Kingdom Hall diha sa dili datong mga nasod

10-12. Sa unsang paagi nakapasidungog sa ngalan ni Jehova ang pagpanukod ug Kingdom Hall?

10 Sa unsang paagi nakapasidungog sa ngalan ni Jehova ang natukod nga mga Kingdom Hall? Ang report sa branch office sa Zimbabwe miingon: “Usa ka bulan pagkatukod sa bag-ong Kingdom Hall, sagad modoble ang manambong sa tigom.” Sa daghang nasod, sa wala pay nindot nga dapit sa pagsimba, ang mga tawo morag magpanuko nga makig-uban kanato. Pero pagkatukod sa Kingdom Hall, dali kining mapuno ug nagkinahanglan na pog lain. Hinuon, ang mga tawo madani kang Jehova dili lang tungod sa dagway sa bilding. Ang gipakitang gugma sa mga boluntaryo nakaapekto sab sa panglantaw sa mga tawo sa iyang organisasyon. Niay pipila ka pananglitan.

11 Indonesia. Pagkahibalo sa usa ka lalaki nga ang tanang nagtukod sa Kingdom Hall boluntaryo, siya miingon: “Talagsaon gyod mo! Nakita nako nga nagtrabaho ang tanan nga kinasingkasing ug malipayon bisag way suweldo. Nagtuo ko nga wa nay laing relihiyon nga sama sa inyo!”

12 Ukraine. Usa ka babaye nga tig-agian kada adlaw sa gitukod nga Kingdom Hall nakatagna nga Saksi ni Jehova ang mga trabahante, ug Kingdom Hall ang bilding. Siya miingon: “Nakadungog ko bahin sa mga Saksi gikan sa manghod nakong babaye nga na-Saksi. Sa akong pagpaniid sa konstruksiyon, nakadesisyon kong magpasakop niini nga organisasyon. Nagpakita gyod mog gugma.” Siya nagpa-Bible study ug nabawtismohan sa 2010.

13, 14. (a) Unsay atong makat-onan sa reaksiyon sa magtiayon human makapaniid sa pagtukod ug Kingdom Hall? (b) Unsay imong mahimo aron ang inyong dapit sa pagsimba magpasidungog sa ngalan ni Jehova?

13 Argentina. Usa ka magtiayon ang miduol sa brader nga nagdumala sa konstruksiyon sa usa ka Kingdom Hall. Ang bana miingon, “Naniid mi pag-ayo sa inyong pagtukod, ug . . . nakadesisyon ming gusto namo nga dinhi magkat-on bahin sa Diyos.” Unya siya nangutana, “Unsay himoon namo aron makatambong mi sa mga tigom dinhi?” Ang magtiayon midawat ug Bible study, pero sa kondisyong apil ang tibuok pamilya. Nalipay nga misugot ang mga igsoon.

14 Wala ka tingali makatabang sa pagtukod sa inyong Kingdom Hall, pero dako gihapon kag mahimo para kana makapasidungog sa ngalan ni Jehova. Pananglitan, makaimbitar  ka sa imong mga Bible study, balikduaw, ug uban pa sa pagtambong sa mga tigom sa Kingdom Hall. Makatabang sab ka sa paghinlo ug pagmentinar niana. Kon planohog maayo, makahatag kag donasyon para sa gastos sa inyong Kingdom Hall o para sa pagpanukod diha sa ubang bahin sa kalibotan. (Basaha ang 1 Corinto 16:2.) Kining tanang kalihokan makadayeg sa ngalan ni Jehova.

Mga Magbubuhat nga “Magatanyag sa Ilang Kaugalingon nga Kinabubut-on”

15-17. (a) Kinsay nag-abaga sa kinadak-ang trabaho sa pagpanukod? (b) Unsay imong makat-onan sa mga komento sa nakatrabaho sa internasyonal nga mga proyekto?

15 Ang nag-abaga sa kinadak-ang trabaho diha sa pagpanukod ug Kingdom Hall, Assembly Hall, ug pasilidad sa branch office mao ang lokal nga mga igsoon. Pero sagad tabangan silag mga igsoon gikan sa ubang nasod nga may eksperyensiya sa pagpanukod. Ang uban kanila mihimog kausaban aron makatrabaho sa internasyonal nga proyekto sulod sa pipila ka semana. Ang uban miboluntaryo pagtrabaho sulod sa pipila ka tuig diha sa lainlaing asaynment.

Timo ug Lina Lappalainen (Tan-awa ang parapo 16)

16 Ang pagboluntaryo sa pagpanukod sa ubang nasod may linaing mga kalisdanan pero makapatagbaw usab. Pananglitan, si Timo ug Lina nakaadto na sa mga nasod sa Asia, Europe, ug South America, sa pagtukod ug mga Kingdom Hall, Assembly Hall, ug pasilidad sa branch office. Si Timo miingon, “Sa miaging 30 ka tuig, sagad mabalhin ang akong asaynment kada duha ka tuig.” Si Lina, asawa ni Timo sa 25 na ka tuig, miingon: “Napulo na ka nasod nga nakauban ko kang Timo. Dili sayon ang pagpasibo sa lahi nga pagkaon, klima, pinulongan, teritoryong sangyawan, ug pagbatog  bag-ong mga higala.” * May kapuslanan ba ang ilang paningkamot? Si Lina miingon: “Dagkong panalangin ang balos sa among mga kalisod. Gipakitaan mig gugma ug pagkamaabiabihon sa mga igsoon ug giatiman mi ni Jehova. Nakita sab namong natuman ang saad ni Jesus sa Marcos 10:29, 30. Nabatonan namo ang kapig usa ka gatos ka pilo nga mas daghang espirituwal nga igsoong lalaki ug babaye ug inahan.” Si Timo miingon, “Gibati namo ang dakong katagbawan nga nagamit ang among kahanas para sa hamili kaayong katuyoan, ang pagpauswag sa kabtangan sa Hari.”

17 Si Darren ug Sarah, nga nakatabang sa pagpanukod didto sa Africa, Asia, Central America, Europe, South America, ug sa South Pacific, mibating mas dako silag nadawat kay sa nahatag. Bisan sa mga kalisdanan, si Darren miingon: “Pribilehiyo gyod nga makauban sa trabaho ang mga igsoon gikan sa lainlaing bahin sa kalibotan. Nakita nako nga ang among gugma kang Jehova samag bugkos nga naghiusa namo.” Si Sarah miingon: “Daghan kog nakat-onan sa mga igsoon nga lainlaig kultura! Ang ilang mga sakripisyo para mag-alagad kang Jehova nakadasig nako nga padayong ihatag ang akong kinamaayohan.”

18. Sa unsang paagi natuman ang Salmo 110:1-3?

18 Si Haring David mitagna nga bisan pag ang ginsakpan sa Gingharian dunay mga kalisdanan, sila “magatanyag sa ilang kaugalingon nga kinabubut-on” para sa buluhaton sa Gingharian. (Basaha ang Salmo 110:1-3.) Apil sa nakatuman niining tagnaa ang tanang nakigbahin sa buluhatong nagsuportar sa Gingharian. (1 Cor. 3:9) Ang daghang pasilidad sa branch office, ginatos ka Assembly Hall, ug libolibong Kingdom Hall sa tibuok kalibotan maoy makitang pruyba nga tinuod ang Gingharian sa Diyos ug kini nagmando na karon. Pagkadakong pribilehiyo nga makaalagad kang Haring Jesu-Kristo sa buluhatong nakapasidungog gyod kaayo kang Jehova!

^ par. 6 Sa 2013, kapig 230,000 ka boluntaryo naaprobahan nga motrabaho uban sa 132 ka RBC sa United States. Nianang nasora, sila ang nagdumala kada tuig sa pagtukod ug mga 75 ka bag-ong Kingdom Hall ug nagtabang sa pagremodel o pag-ayog mga 900 ka tigomanan.

^ par. 9 Dili apil niini nga ihap ang daghang Kingdom Hall nga gitukod diha sa mga nasod nga dili sakop sa programa.

^ par. 16 Ang internasyonal nga mga alagad ug boluntaryo sagad naggamit sa ilang panahon para sa pagpanukod, pero sa hinapos sa semana o sa gabii, sila mosangyaw uban sa lokal nga mga kongregasyon.

Pagkat-og Dugang

Mga Saksi ni Jehova—Nagkahiusa sa Pagpanukod

Ang mga Saksi ni Jehova, nga gikan sa lainlaing nasod, kultura, ug pinulongan, nagkahiusa sa pagdayeg kang Jehova pinaagi sa ilang pagpanukod ug mga Kingdom Hall ug uban pang mga bilding sa tibuok kalibotan.