Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

Gingharian sa Diyos Nagmando Na!

Sulat Gikan sa Nagamandong Lawas

Sulat Gikan sa Nagamandong Lawas

Minahal nga Isigkamagmamantala sa Gingharian:

HANDURAWA nga membro ka sa pamilyang Bethel sa Brooklyn niadtong Biyernes sa buntag, Oktubre 2, 1914. Naglingkod ka sa naandang puwesto sa lamesa para sa pamahaw, nga nagpaabot kang Brader C. T. Russell. Ang pultahan kalit nga naabri ug misulod si Brader Russell. Mihunong siya kadiyot sama sa iyang naandan, ug malipayong mitimbaya sa pamilya, “Maayong buntag sa tanan.” Pero imbes molingkod dayon sa ulohan sa lamesa, siya mipalakpak ug malipayong mipahibalo: “Ang panahon sa mga Hentil natapos na; ang pagmando sa ilang mga hari natapos na!” Di masukod ang imong kalipay—dugay na kang nagpaabot niini! Dugay ug kusog nga mipalakpak ang tibuok pamilyang Bethel sa maong balita.

 Milabay na ang daghang dekada sukad ipahibalo ni Brader Russell ang maong makapalipay nga balita. Unsay nalampos sa Gingharian sukad niadto? Daghan kaayo! Pinaagi sa Gingharian, si Jehova anam-anam nga nagdalisay ug nagbansay sa iyang katawhan, gikan sa pipila ra ka libo sa 1914 ngadto sa halos walo ka milyon karon. Sa unsang mga paagi nakabenepisyo ka sa maong pagbansay?

Sagad natong madunggan karon ang atong mga igsoon nga moingon, “Ang langitnong karo ni Jehova nagaabante na!” ug husto kana. Pero ang tinuod, sukad pa sa 1914 ang langitnong karo nga nagsimbolo sa dili makitang bahin sa organisasyon ni Jehova kusog kaayong nagaabante, ingon sa ipakita niining libroha. Aron masangyaw ang maayong balita sa tibuok kalibotan, ang mga magmamantala sa Gingharian naggamit ug lainlaing pamaagi sama sa mga mantalaan, plakard, salida, testimony card, ponograpo, radyo, ug bisan sa Internet.

Kay gipanalanginan ni Jehova ang buluhaton, kita nakahimog nindot nga literatura sa Bibliya sa kapig 670 ka pinulongan ug nagtanyag niini nga walay bayad. Ang mga boluntaryo nagsakripisyo aron motabang sa pagpanukod ug mga Kingdom Hall, Assembly Hall, ug pasilidad sa branch diha sa dato ug dili datong mga nasod. Ug dihang may katalagman, ang mahigugmaong mga igsoon motabang dayon sa mga naapektohan, nga nagpamatuod nga sila mga igsoon nga “natawo alang sa panahon sa kasakit.”—Prov. 17:17.

Usahay, gamiton sa mga lider sa relihiyon ug ubang magsusupak ang balaod aron sa ‘pagmugnag kasamok,’ pero napalig-on ang atong pagtuo kay nakita nato nga ang ilang mga paningkamot misangpot hinuon sa “pagpauswag sa maayong balita.”—Sal. 94:20; Filip. 1:12.

Usa ka pribilehiyo nga makig-uban kaninyo, among kaubang “mga sulugoon.” Palihog timan-i nga kamong tanan gimahal namo pag-ayo. Ginaampo namo nga kining libroha makatabang nga mas mapabilhan ninyo ang inyong espirituwal nga panulondon.—Mat. 24:45.

Nanghinaot sa inyong kaayohan,

Inyong mga igsoon,

Nagamandong Lawas sa mga Saksi ni Jehova