Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

Gingharian sa Diyos Nagmando Na!

 KAPITULO 8

Mga Galamiton sa Pagsangyaw—Paghimog Literatura Para sa Tibuok Kalibotan

Mga Galamiton sa Pagsangyaw—Paghimog Literatura Para sa Tibuok Kalibotan

PUNTO SA KAPITULO

Si Jehova nagtaganag mga galamiton nga atong gikinahanglan sa pagtudlo sa mga tawo sa matag nasod, tribo, ug pinulongan

1, 2. (a) Sa unang siglo, unsay nakatabang sa pagpakaylap sa maayong balita sa tibuok Imperyo sa Roma? (b) Unsay ebidensiya nga si Jehova nagpaluyo kanato karon? (Tan-awa sab ang kahong “ Maayong Balita sa Kapig 670 ka Pinulongan.”)

WALA makatuo ang mga bisita sa Jerusalem sa ilang nadungog. Ang mga taga-Galilea larinong nagsultig langyawng mga pinulongan, ug ang ilang mensahe nakapainteres sa mamiminaw. Pentekostes 33 C.E. niadto, ug ang mga tinun-an milagrosong nakadawat ug gasa sa pagsultig lainlaing pinulongan—pamatuod nga gipaluyohan sila sa Diyos. (Basaha ang Buhat 2:1-8, 12, 15-17.) Niadtong adlawa ang maayong balita nga ilang gisangyaw nadungog sa mga tawo nga lainlaig kagikan, ug human niadto mikaylap sa tibuok Imperyo sa Roma.—Col. 1:23.

2 Karong panahona, ang mga alagad sa Diyos dili milagrosong makasultig lainlaing pinulongan. Pero sila naghubad sa mensahe sa Gingharian sa kapig 670 ka pinulongan, mas daghan kay sa unang siglo. (Buh. 2:9-11) Ang katawhan sa Diyos nakahimog daghan kaayong literatura diha sa lainlaing pinulongan maong ang mensahe sa Gingharian nakaabot sa tibuok kalibotan. * Kini klarong nagpamatuod nga si Jehova nagagamit kang Haring Jesu-Kristo aron giyahan ang buluhatong pagsangyaw. (Mat. 28:19, 20) Samtang hisgotan nato ang pipila ka galamiton nga nagpalampos niining buluhatona sulod sa miaging 100 ka tuig, matikdi kon giunsa kita pagbansay ug pagdasig sa Hari aron makapakita kitag interes sa mga tawo ug mahimong magtutudlo sa Pulong sa Diyos.—2 Tim. 2:2.

Ang Hari Nagsangkap sa Iyang mga Alagad sa Pagpugas sa Binhi sa Kamatuoran

3. Nganong nagagamit kitag lainlaing galamiton diha sa atong pagsangyaw?

3 Ang “pulong sa gingharian” gipakasama ni Jesus sa mga binhi, ug ang kasingkasing sa tawo ngadto sa yuta. (Mat. 13:18, 19) Sama nga mogamit ang hardinero ug lainlaing himan aron pahumokon ang yuta ug maandam kini aron mapugsan ug binhi, ang katawhan ni Jehova naggamit ug lainlaing galamiton aron maandam ang kasingkasing sa minilyong tawo sa pagdawat sa mensahe sa Gingharian. Ang pipila niana napuslan  kadiyot samtang ang uban, sama sa libro ug magasin, padayong nagmapuslanon. Lahi sa mga paagi sa pagsangyaw nga nahisgotan sa miaging kapitulo, ang tanang galamiton nga hisgotan dinhi nagtabang sa mga magmamantala aron personal nga ikaestorya ang mga tawo.—Buh. 5:42; 17:2, 3.

Paghimog ponograpo ug sound equipment, sa Toronto, Canada

4, 5. Giunsa paggamit ang mga ponograpo, pero unsay dili mahimo niini?

4 Girekord nga mga pakigpulong. Sa katuigang 1930 ug 1940, gigamit ang girekord nga mga diskurso nga gipatokar sa mabitbit nga ponograpo. Wala ray singko minutos ang matag rekording. Usahay kini may mugbong ulohan, sama sa “Trinidad,” “Purgatoryo,” ug “Gingharian.” Giunsa kini paggamit? Si Brader Clayton Woodworth, Jr., nabawtismohan sa 1930 sa United States, miingon: “Magdala kog ponograpo nga samag gamayng maleta nga gipaandar pinaagig espring, nga may matangtang nga parteng taoran sa dagom nga kinahanglang hustong pagkaplastar daplin sa plaka aron motokar. Moduol ko sa pultahan, ipagawas ang ponograpo, itaod ang parteng may dagom, ug modorbel. Pag-abli sa tagbalay, moingon ko, ‘Duna koy importanteng mensahe nga gusto nakong madunggan nimo.’” Unsay ilang reaksiyon? Matod ni Brader Woodworth, “Kasagaran mamati sila. Usahay, ilang sirhan dayon ang pultahan. Abi pod sa uban nga ahente kog ponograpo.”

Pagka-1940, kapig 90 na ang girekord nga pakigpulong ug kapig milyon nga plaka ang nahimo

5 Pagka-1940, kapig 90 na ang girekord nga pakigpulong ug kapig milyon nga plaka ang nahimo. Si John E. Barr, payunir niadto sa Britain nga nahimong membro sa Nagamandong Lawas, miingon: “Gikan sa 1936 hangtod 1945, dala nako pirme ang ponograpo. Gani, ambot unsay akong buhaton niadto kon wala kana. Makapadasig kaayo ang tingog ni Brader Rutherford  diha sa pultahan; morag diha siya sa akong tupad. Hinuon, ang ponograpo kulag katakos sa pagpanudlo, kay kini dili makatandog sa kasingkasing.”

6, 7. (a) Unsay kaayohan ug limitasyon sa paggamit ug mga testimony card? (b) Sa unsang paagi si Jehova ‘nagbutang sa mga pulong diha sa atong baba’?

6 Mga testimony card. Sugod sa 1933, ang mga magmamantala gidasig nga mogamit ug testimony card sa ilang pamalaybalay. Sama kinig gidak-on sa report slip. Kini may mubong mensahe sa Bibliya ug deskripsiyon sa literatura nga puwedeng mabatonan sa tagbalay. Itunol lang kini sa tagbalay ug ipabasa. “Nakaangay ko sa paggamit sa testimony card,” miingon si Lilian Kammerud, sa ulahi nag-alagad nga misyonaryo sa Puerto Rico ug Argentina. Ngano? Siya miingon: “Dili tanan ang maayong mopresentar sa mensahe. Busa nakatabang nako ni nga maanad sa pagduol sa mga tawo.”

Testimony card (Italian)

7 Si Brader David Reusch, nabawtismohan sa 1918, miingon: “Nakatabang ang testimony card sa mga igsoon, kay pipila ray mibati nga husto ang ilang presentasyon.” Pero, kini nga galamiton may limitasyon. Si Brader Reusch miingon: “Usahay, may mga tawong magtuo nga di mi makamaong mosulti. Ang tinuod, daghan kanamo ang way abilidad sa pagpanulti. Pero giandam mi ni Jehova sa pag-atubang sa mga tawo ingong iyang mga ministro. Sa wa madugay, gibutang niya ang iyang mga pulong sa among baba pinaagig pagtudlo namo nga gamiton ang Kasulatan sa pamalaybalay. Nalampos kini tungod sa Teokratikanhong Tunghaan sa Ministeryo nga nagsugod sa 1943.”—Basaha ang Jeremias 1:6-9.

8. Unsay imong buhaton aron mabansay ka ni Kristo?

8 Mga libro. Sukad 1914, ang katawhan sa Diyos nakahimog kapin sa 100 ka libro bahin sa Bibliya. Ang pipila niini gidisenyo aron mabansay ang mga magmamantala nga mahimong epektibong mga ministro. Si Anna Larsen, taga-Denmark ug mga 70 ka tuig nang magmamantala, miingon: “Gitabangan mi ni Jehova nga mahimong epektibong mga magmamantala pinaagi sa Teokratikanhong Tunghaan sa Ministeryo ug sa mga librong among nadawat para niana. Nakahinumdom ko nga ang unang libro mao ang Theocratic Aid to Kingdom Publishers nga gi-release sa 1945. Gisundan kinig “Equipped for Every Good Work,” nga giimprenta sa 1946. Karon duna kitay Pahimusli ang Edukasyon sa Teokratikanhong Tunghaan sa Ministeryo nga giimprenta sa 2002.” Walay duda, gigamit ni Jehova ang Teokratikanhong Tunghaan sa Ministeryo ug ang maong mga libro aron kita “makabaton ug igong katakos ingong mga ministro.” (2 Cor. 3:5, 6) Naenrol na ba ka sa Teokratikanhong Tunghaan sa Ministeryo? Dala ba nimo pirme ang librong Tunghaan sa Ministeryo kada tigom ug sundan kini samtang hisgotan sa magtatan-aw sa tunghaan? Kon oo, imong gitugotan si Kristo  sa pagbansay nimo nga mahimong mas maayong magtutudlo.—2 Cor. 9:6; 2 Tim. 2:15.

9, 10. Sa unsang paagi ang mga libro nakatabang sa pagpugas ug pagbisbis sa mga binhi sa kamatuoran?

9 Pinaagi sa iyang organisasyon, si Jehova nagtagana kanatog mga libro nga makatabang nato sa pagpatin-aw sa paninugdang mga pagtulon-an sa Bibliya. Epektibo kaayo ang librong Ang Kamatuoran nga Motultol sa Kinabuhing Dayon. Una kining giimprenta sa 1968 ug dako dayon kinig epekto. Ang Nobyembre 1968 nga Ministeryo sa Gingharian miingon: “Daghan kaayog nag-order sa librong Kamatuoran mao nga sa Septiyembre, ang imprentahanan sa Sosyedad didto sa Brooklyn nagdugang ug panggabii nga eskedyul sa trabaho.” Ang artikulo midugang: “Sa Agosto, ang order niana milabaw ug kapig usa ka milyon ug tunga ka kopya kay sa suplay!” Pagka-1982, kapig 100 ka milyong kopya sa libro ang naimprenta sa 116 ka pinulongan. Sulod sa 14 ka tuig, gikan sa 1968 hangtod 1982, nadugangan ug kapig usa ka milyon ang mga magmamantala tungod sa librong Kamatuoran. *

10 Sa 2005, gi-release ang laing mapuslanong tabang sa pagtuon sa Bibliya, ang librong Unsay Tinuod nga Gitudlo sa Bibliya? Mga 200 ka milyong kopya ang giimprenta sa 256 ka pinulongan! Unsay resulta? Sa pito ra ka tuig, gikan sa 2005 hangtod 2012, mga 1.2 ka milyon ang nahimong magmamantala sa maayong balita. Nianang mga tuiga sab, ang gidaghanon sa mga Bible study miuswag gikan sa mga 6 ka milyon ngadto sa kapig 8.7 ka milyon. Gipanalanginan gyod ni Jehova ang atong paningkamot sa pagpugas ug pagbisbis sa mga binhi sa kamatuoran sa Gingharian.—Basaha ang 1 Corinto 3:6, 7.

11, 12. Base sa gisitar nga mga teksto, para kang kinsa gidisenyo ang atong mga magasin?

11 Mga magasin. Sa sinugdan, ang Watch Tower maoy para lang sa “gamayng panon,” nga may “langitnong pagtawag.” (Luc. 12:32; Heb. 3:1) Sa Oktubre 1, 1919, gi-release sa organisasyon ang laing magasin nga gidisenyo para sa publiko. Nagustohan kaayo sa mga Estudyante sa Bibliya ug sa publiko ang maong magasin nga sa daghang katuigan, mas daghang kopya niini ang napanagtag kay sa Watch Tower. Kana unang gitawag The Golden Age. Sa 1937, giilisan kanag Consolation. Ug sa 1946, kana nailhang Pagmata!

12 Sulod sa daghang katuigan, giusab-usab ang estilo ug kahan-ayan sa mga artikulo sa Bantayanang Torre ug Pagmata! pero ang katuyoan mao gihapon—pagmantala sa Gingharian ug ang pag-ugmad ug pagtuo diha sa Bibliya. Pagkakaron, ang Bantayanang Torre dunay tun-anan ug publikong edisyon. Ang tun-anang edisyon maoy para sa “mga sulugoon sa panimalay”—ang “gamayng panon” ug ang “ubang mga karnero.” * (Mat. 24:45; Juan 10:16) Ang publikong edisyon maoy para sa wala pa mahibalo sa kamatuoran pero nagtahod sa Bibliya ug sa Diyos.  (Buh. 13:16) Ang Pagmata! maoy para sa gamay rag kahibalo sa Bibliya ug sa matuod nga Diyos, si Jehova.—Buh. 17:22, 23.

13. Nganong talagsaon ang atong mga magasin? (Hisgoti ang tsart nga “ World Record sa mga Publikasyon.”)

13 Sugod sa 2014, ginaimprenta kada bulan ang kapig 44 ka milyong kopya sa Pagmata! ug mga 46 ka milyong kopya sa Bantayanang Torre. Ang Pagmata! gihubad sa mga 100 ka pinulongan, ug ang Bantayanang Torre sa kapig 200, busa kining duha mao ang kinadaghanag pinulongan ug kopya nga napanagtag sa tibuok kalibotan! Dili kita angayng matingala nianang talagsaong mga kalamposan, kay kining mga magasina nagdala sa mensahe nga igawali sa tibuok yuta, sumala ni Jesus.—Mat. 24:14.

14. Unsay atong madasigong gipasiugda, ug ngano?

14 Ang Bibliya. Sa 1896, giusab ni Brader Russell ug iyang mga kauban ang ngalan sa korporasyon nga gigamit sa pag-imprentag literatura aron maapil ang pulong Bibliya; kini nailhang Watch Tower Bible and Tract Society. Haom kana kay ang Bibliya maoy pangunang galamiton sa pagpakaylap sa maayong balita sa Gingharian. (Luc. 24:27) Uyon sa legal nga ngalan sa korporasyon, ang mga alagad sa Diyos madasigong nagpasiugda sa pagpanagtag ug pagbasa sa Bibliya. Pananglitan, sa 1926, ang The Emphatic Diaglott nga hubad ni Benjamin Wilson sa Kristohanon Gregong Kasulatan giimprenta sa atong imprentahan. Sugod sa 1942, atong giimprenta ug gipanagtag ang mga 700,000 ka kopya sa tibuok King James Version. Duha lang ka tuig sa ulahi, misugod ta pag-imprenta sa American Standard Version, diin ang ngalan ni Jehova makitag 6,823 ka beses. Pagka-1950, atong napanagtag ang kapig 250,000 ka kopya niini.

15, 16. (a) Unsay imong nagustohan sa Bag-ong Kalibotang Hubad? (Hisgoti ang kahong “ Pagpadali sa Paghubad sa Bibliya.”) (b) Unsay imong buhaton aron matandog ni Jehova ang imong kasingkasing?

15 Sa 1950 gi-release ang Ingles nga Bag-ong Kalibotang Hubad sa Kristohanon Gregong Kasulatan. Ang kompletong Ingles nga Bag-ong Kalibotang Hubad sa Balaang Kasulatan gi-release sa 1961 sa usa lang ka tomo. Kini nga hubad nagpasidungog kang Jehova kay ang iyang ngalan gipasig-uli sa dapit niini sa orihinal nga Hebreohanong sinulat. Ang balaang ngalan makita sab ug 237 ka beses sa mga basahon sa Kristohanon Gregong Kasulatan. Aron kini tukma ug daling mabasa, ang Bag-ong Kalibotang Hubad kadaghan gihimoag rebisyon, ang kinabag-ohan sa 2013. Sa 2013, ang Bag-ong Kalibotang Hubad naimprenta sa kapin nag 201 ka milyong kopya, sa tibuok o sa bahin, diha sa 121 ka pinulongan.

16 Unsay reaksiyon sa pipila pagkabasa nila sa Bag-ong Kalibotang Hubad sa ilang pinulongan? Usa ka lalaking taga-Nepal miingon: “Para sa daghan, ang among karaang Nepalese nga hubad lisod masabtan kay gigamit ang pormal kaayong mga pulong. Pero karon, mas masabtan na namo ang Bibliya kay naggamit kinig ordinaryong mga pulong.” Dihang gisugdan  pagbasa sa usa ka babaye sa Central African Republic ang Sango nga hubad, siya mihilak ug miingon, “Kini ang pinulongan sa akong kasingkasing.” Sama niya, matandog ni Jehova ang atong kasingkasing kon basahon nato kada adlaw ang iyang Pulong.—Sal. 1:2; Mat. 22:36, 37.

Mapasalamaton sa mga Galamiton ug sa Pagbansay

17. Unsaon nimo pagpakitag apresasyon sa nadawat nga mga galamiton ug pagbansay, ug unsay resulta niana?

17 Gipabilhan ba nimo ang mga galamiton ug ang pagbansay nga padayong gitagana ni Haring Jesu-Kristo? Naggahin ka bag panahon sa pagbasa sa literatura sa organisasyon, ug naggamit ka ba niini sa pagtabang sa uban? Kon oo, mouyon ka kang Sister Opal Betler, nga nabawtismohan sa Oktubre 4, 1914. Siya miingon: “Sa daghang katuigan, kami sa akong bana [si Edward] naggamit sa ponograpo ug testimony card. Namalaybalay mi nga may dalang mga libro, pulyeto, ug magasin. Miapil mig mga kampanya ug martsa sa pagpanagtag ug naimprentang mga deklarasyon. Sa ulahi kami gibansay sa pagbalikduaw ug pagdumalag Bible study sa balay sa mga interesado. Puliki kaayo mi pero malipayon.” Misaad si Jesus nga ang iyang ginsakpan mapuliki sa pagpugas, pag-ani, ug pagmaya nga magkauban. Sama kang Opal, milyonmilyon ang makapamatuod nga natuman kana.—Basaha ang Juan 4:35, 36.

18. Unsay atong pribilehiyo?

18 Tingali, para sa daghang dili pa alagad sa Hari, ang katawhan sa Diyos “dili edukado ug ordinaryo.” (Buh. 4:13) Pero palandonga! Gihimo sa Hari ang iyang ordinaryong katawhan ingong higanteng tig-imprenta, nga nakahimo sa pipila ka publikasyon nga kinadaghanag pinulongan ug kopya nga napanagtag sa kasaysayan! Mas importante pa, siya nagbansay ug nagdasig nato nga gamiton kana aron ipakaylap ang maayong balita sa tanang nasod. Pagkadakong pribilehiyo nga makauban nato si Kristo sa pagpugas sa mga binhi sa kamatuoran ug sa pag-anig mga tinun-an!

^ par. 2 Sa miaging dekada lamang, ang katawhan ni Jehova nakahimog kapin sa 20 ka bilyong publikasyon nga gibase sa Bibliya. Dugang pa, ang atong Web site nga jw.org ma-access na sa kapig 2.7 ka bilyong may Internet sa tibuok kalibotan.

^ par. 9 Ang pipila ka libro nga gigamit sa mga magmamantala sa pagtudlo sa kamatuoran mao ang The Harp of God (naimprenta sa 1921), “Pasagdi Ang Diyos Maminatud-on” (naimprenta sa 1956), Ikaw Mabuhing Walay Kataposan sa Paraiso sa Yuta (naimprenta sa 1983), ug Kahibalo nga Motultol sa Kinabuhing Walay Kataposan (naimprenta sa 1995).

^ par. 12 Para sa katin-awan kon kinsa ang “mga sulugoon sa panimalay,” tan-awa ang Hulyo 15, 2013 nga Bantayanang Torre, panid 23, parapo 13.

Pagkat-og Dugang

Gipiyalan sa Paghubad sa “Sagradong mga Pahayag sa Diyos”—Roma 3:2

Ang mga Saksi ni Jehova naggamit ug mga hubad sa Bibliya daghang katuigan nga miagi. Nganong naghubad man silag Bibliya gamit ang modernong Iningles?