Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

Balik Kang Jehova

 BAHIN 5

Balik sa ‘Magbalantay ug Magtatan-aw sa Imong Kalag’

Balik sa ‘Magbalantay ug Magtatan-aw sa Imong Kalag’

Ang imo bang kahimtang karon sama sa mga kahimtang nga gihisgotan niini nga brosyur? Kon mao, wala ka mag-inusara. Daghang matinumanong alagad sa Diyos, panahon sa Bibliya ug sa atong panahon karon, ang nag-atubang ug susamang mga kahimtang. Kon gitabangan sila ni Jehova, tabangan sab ka niya.

Dawaton ka ni Jehova dihang mobalik ka niya

 MAKASEGURO ka nga dawaton ka ni Jehova dihang mobalik ka niya. Tabangan ka niyang masagubang ang mga kabalaka, kahiubos, ug makabatog kalinaw sa hunahuna ug kasingkasing nga maoy resulta sa hinlong konsensiya. Sa ingon, madasig kang moalagad pag-usab kang Jehova uban sa imong mga isigkamagtutuo. Ang imong kahimtang mahisama unya sa ubang Kristohanon sa unang siglo, nga gisulatan ni apostol Pedro: “Kamo sama sa mga karnero nga nangahisalaag; apan karon kamo namalik sa magbalantay ug magtatan-aw sa inyong mga kalag.”—1 Pedro 2:25.

Ang pagbalik kang Jehova mao ang kinamaayohang desisyon nga imong mahimo. Ngano? Mapalipay nimo ang iyang kasingkasing. (Proverbio 27:11) Nahibalo ka nga si Jehova dunay pagbati, ug dunay epekto kaniya ang atong ginahimo. Siyempre, wala ta pugsa ni Jehova nga higugmaon ug alagaron siya. (Deuteronomio 30:19, 20) Sumala pa sa usa ka eskolar sa Bibliya: “Walay kuptanan sa gawas ang pultahan sa kasingkasing sa tawo. Kinahanglang sa sulod kini ablihan.” Kon kita mosimba kang Jehova uban ang kasingkasing nga punog gugma kaniya, sama rag atong giablihan ang pultahan sa atong kasingkasing. Sa ingon, gihatagan nato si Jehova ug bililhong gasa—ang atong integridad—ug mapalipay gyod nato siya. Sa pagkatinuod, dili matupngan ang kalipay nga atong bation kon atong ihatag kang Jehova ang pagsimba nga angay ra gyod kaniya.—Buhat 20:35; Pinadayag 4:11.

Dugang pa, kon mobalik ka sa pag-alagad, matagan-an ang imong espirituwal nga panginahanglan. (Mateo 5:3) Daghang tawo ang nagkadiindiin sa pagpangitag tubag sa mga pangutana bahin sa katuyoan sa kinabuhi. Dili kana ikatingala kay gilalang ta ni Jehova nga dunay ingon niana nga panginahanglan. Kita gidisenyo nga mosimba kaniya, busa matagbaw lang ta kon mao nay atong himoon. Wala nay laing makahatag natog tinuod nga kalipay gawas sa pagsimba kang Jehova tungod sa gugma.—Salmo 63:1-5.

Gusto kaayo ni Jehova nga mobalik ka niya. Nganong makaseguro ka niana? Hunahunaa: Daghang pag-ampo ang gihimo sa pag-andam niini nga brosyur. Nakadawat ka niini, lagmit gikan sa usa ka ansiyano o isigkamagtutuo. Dayon nadasig ka sa pagbasa ug sa pagsanong sa mensahe niini. Kining tanan maoy pamatuod nga wala gyod ka kalimti ni Jehova. Siya mahigugmaong nag-agak kanimo pabalik kaniya.—Juan 6:44.

Makapahupay ang pagkahibalo nga si Jehova dili gyod malimot sa iyang mga alagad nga nahisalaag. Napamatud-an kana sa sister nga si Donna. Siya miingon: “Anam-anam kong napalayo sa kamatuoran, pero kanunay nakong mahunahunaan ang Salmo 139:23, 24, nga nag-ingon: ‘Oh Diyos, susiha ako, ug hibaloi ang akong kasingkasing. Susiha ako, ug hibaloi ang akong makapatugaw nga mga hunahuna, ug tan-awa kon aduna bay masakit nga dalan diha kanako, ug tultoli ako sa dalan nga hangtod sa panahong walay tino.’ Nahibalo ko nga dili gyod ko bahin sa kalibotan—dili ko malipayon—ug nahibalo ko nga kinahanglan kong mobalik sa organisasyon ni Jehova. Nakita nako nga wala gyod ko biyai ni Jehova; kinahanglan lang nakong pangitaon ang dalan balik kaniya. Ug nalipay kaayo ko nga nakita nako ni!”

“Nakita nako nga wala gyod ko biyai ni Jehova; kinahanglan lang nakong pangitaon ang dalan balik kaniya”

Kami kinasingkasing nga nag-ampo nga hinaot matagamtam nimo pag-usab ang kalipay nga ihatag ni Jehova. (Nehemias 8:10) Dili gyod ka magmahay kon mobalik ka kang Jehova.