“MAPASALAMATON kaayo ko kang Jehova kay natudloan ko bahin niya gamit ang ako mismong pinulongan,” miingon si Gulizar.

Walo ka tuig nang nakig-uban si Gulizar sa mga Saksi ni Jehova. Pero dihang nakatambong siyag tigom gamit ang iyang pinulongan, ang Kurdish, ayha pa siya nakadesisyon nga magpabawtismo. Usa siya sa daghang Kurd sa Georgia nga midawat sa kamatuoran. Pero kinsa ang mga Kurd?

Ang mga Kurd nagpuyo sa Middle East sulod na sa ginatos ka katuigan. Nagtuo ang ubang eskolar nga sila maoy mga  kaliwat sa mga Medianhon nga gihisgotan sa Bibliya. (2 Hari 18:11; Buh. 2:9) Ang ilang sinultihan maoy usa sa Iranian nga mga pinulongan.

Karon, milyonmilyon sa mga Kurd ang nagpuyo sa lainlaing nasod, lakip sa Armenia, Iran, Iraq, Syria, ug Turkey. Mga 20,000 ka Kurd ang nagpuyo sa Georgia. Kadaghanan nila mga tawong diyosnon ug dakog pagtahod sa espirituwal nga mga butang.

Duna nay 500 ka Kurdish nga mga igsoon sa Georgia, ug tulo ka Kurdish nga kongregasyon. Niadtong 2014, nalipay kaayo ang tanan kay sa unang higayon, gihimo ang Kurdish nga rehiyonal nga kombensiyon sa Tbilisi. Kini gitambongan sa mga delegado gikan sa Armenia, Germany, Turkey, ug Ukraine.