Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

2016 Tinuig nga Basahon sa mga Saksi ni Jehova

Sulat Gikan sa Nagamandong Lawas

Sulat Gikan sa Nagamandong Lawas

Minahal nga mga Igsoon:

Si propetang Isaias mapainubsanong miangkon nga nasinati sa Gingharian sa Juda ang kalamposan ug kauswagan tungod sa panalangin ni Jehova. Ang Isaias 26:12 nag-ingon: “Oh Jehova, . . . ang tanan namong mga buluhaton imong gihimo alang kanamo.” Masulti sab nato ni kon atong palandongon ang mga nalampos sa miaging tuig sa pag-alagad. Si Jehova nagabuhat gyod ug “katingalahang mga butang” nga wala pa sukad mahitabo! (Ex. 34:10) Hunahunaa ang pipila sa mga panalangin nga atong nadawat gikan kang Jehova.

Ang atong website nga jw.org mapuslanon kaayo. Kini nahubad sa kapig 600 ka pinulongan, ug kini may publikasyong mabasa ug ma-download sa kapig 750 ka pinulongan. Unsa kini ka epektibo sa pagtabang sa sinserong mga tawo nga mahibalo sa kamatuoran? Pananglitan: Usa ka magtiayon ang nadismaya sa relihiyon tungod sa pagpakaaron-ingnon nga ilang naobserbahan. Sa ilang pagpangitag espirituwal nga giya, naablihan nila ang atong website. Wala madugay, tigbasahan na silag mga artikulo ug tigtan-awag mga video diha sa atong website. Nag-download pa gani silag Pagsusi sa Kasulatan sa Adlaw-Adlaw ug naghisgot niini uban sa ilang duha ka tin-edyer. Gani, kana mismo  ang ilang ginahimo dihang nasangyawan sila sa mga Saksi. Nadiskobrehan sa mga Saksi nga nakahimo na silag dagkong kausaban sa ilang kinabuhi tungod sa ilang nakat-onan diha sa website. Ilang gipatangtang ang ilang mga tattoo, ariyos sa lainlaing bahin sa lawas, ug mga rebulto. Wala na sab sila mag-apil-apil sa selebrasyon sa kalibotan, ug wala na magtan-awg dili maayong mga salida. Gihimo nila ni sa wala pa sila masangyawi sa mga Saksi! Dihang gisulat ni nga estorya, ang magtiayon ug usa nila ka anak magmamantala na ug ang magtiayon nagplano nang magpabawtismo.

Daghan sab tay nadawat nga pasalamat sa laing nindot nga tagana: Ang JW Broadcasting. Ang binulan nga programa niini nahubad sa kapig 70 ka pinulongan, ug hubaron pa kini sa ubang pinulongan. Daghang pamilya ang motan-aw sa programa panahon sa ilang Pamilyahanong Pagsimba. Usa ka brader miingon, “Dako na gyod kaayo ang organisasyon ni Jehova pero suod gihapon kaayo ta sa hedkuwarter!”

Makapalipay nga okasyon ang mga kombensiyon para sa katawhan ni Jehova, ug apil niana ang serye sa kombensiyon sa 2015 nga tuig sa pag-alagad. Ang 2015 nga programa may 42 ka video ug picture. May unom pod ka pasiunang musika—kada usa i-play matag sugod sa sesyon. Bahin sa programa, usa ka hamtong nga brader ang nakamatikod, “Halos ang tanan dili gustong mohawa sa ilang lingkoranan panahon sa sesyon kay dili nila gustong may malaktawan.” Bahin sa kombensiyon sa miaging tuig, usa ka misyonarya ang miingon, “Tungod sa mga video, nahimong mas tinuod nako ang kamatuoran ug ang Gingharian.”

 Gipanalanginan sab ta ni Jehova ug bag-ong mga awit sa Gingharian sa miaging tuig. Usa ka magtiayon ang misulat: “Mora mig gigakos ni Jehova tungod sa bag-ong mga kanta. Naghupay ni namo panahon nga naluya mi.” Ang atong mga kombensiyon nagpahinumdom nga nagkugi atong mga igsoon sa Watchtower orchestra para nato, ang tanan gihimo aron mas madayeg pa si Jehova!

Ingong pagsundog kang Jehova, hinaot malipayon ninyong abiabihon ang mga namalik sa panon

Gipahimuslan ba sa inyong kongregasyon ang publikong pagsangyaw gamit ang cart? Nindot kaayo ni nga paagi sa pagsangyaw! Pinaagi niini, ang mga nagpuyo sa guwardiyado nga mga subdibisyon o condominium masangyawan na, ug daghang dili aktibo ang natabangan. Niadtong Enero 2015, usa ka lalaki sa South Korea ang miduol sa cart. Siya bag-o lang naghunahuna bahin sa espirituwal nga mga butang. Busa nasugdan siyag Bible study. Pagka-Pebrero, mitambong siyag tigom sa unang higayon. Pagka-Marso, miundang siyag sigarilyo. Pagka-Abril, mibisita siya sa sangang buhatan sa South Korea, ug siya padayong nag-uswag sa espirituwal. Usa lang ni sa daghang eksperyensiya nga among nadawat dinhi sa hedkuwarter.

Among giampo nga ang impormasyon nga gihisgotan sa kombensiyon magdasig sa daghang dili aktibo nga mobalik sa mahigugmaong pag-atiman ni Jehova sa dili pa ulahi ang tanan! Ingong pagsundog kang Jehova, hinaot malipayon ninyong abiabihon ang mga namalik sa panon.—Ezeq. 34:16.

Gipanalanginan gyod ni Jehova ang iyang katawhan sa miaging tuig sa pag-alagad. Unsa pay atong madahom?  Paaboton lang nato kon unsay mahitabo. Kasamtangan, palihog hinumdomi nga gimahal mo pag-ayo sa Nagamandong Lawas ug apil mo pirme sa among mga pag-ampo.

Nanghinaot sa inyong kaayohan,

Inyong mga igsoon,

Nagamandong Lawas sa mga Saksi ni Jehova