Laktaw ngadto sa video

Laktaw ngadto sa secondary menu

Laktaw ngadto sa kaundan

Mga Saksi ni Jehova

Cebuano

2016 Tinuig nga Basahon sa mga Saksi ni Jehova

England: Mga igsoon nga nag-abiabi sa mga delegado sa internasyonal nga kombensiyon

 PAGSANGYAW UG PAGPANUDLO SA TIBUOK YUTA

Europe

Europe
  • KAYUTAAN 47

  • POPULASYON 743,421,605

  • MAGMAMANTALA 1,614,244

  • PAGTUON SA BIBLIYA 842,091

Ang Naalaang Saksi Natun-ag Bibliya

Ang internasyonal nga kombensiyon sa London, England, nakapalipay gayod sa mga delegado ug sa mga Saksi didto. Si Andrew ug Elizabeth miadto sa usa ka hotel sa London aron abiabihon ang ubang delegado nga gikan sa laing nasod. Sa reception area, nakakita si Elizabeth ug babaye nga pormal ug sinina. Abi niyag delegado maong gigakos  niya agig pag-abiabi. Nakuratan ang babaye, maong nangayo si Elizabeth ug pasaylo. Siya miingon: “Pasensiya na ha, abi man god nakog delegado ka!”

Nangutana ang babaye, “Delegado sa unsa?”

Gitudlo ni Elizabeth ang karatula diha sa reception desk nga nag-abiabi sa mga Saksi ni Jehova ug nasorpresa siya sa reaksiyon sa babaye. “Wow kanindot!” miingon ang babaye. “Mora diay kog Saksi tan-awon?”

Sa ilang pag-estoryahanay, nahibaloan ni Elizabeth nga Vivien ang ngalan sa babaye. Siya taga-Nigeria, ug silingan ra diay sila. Misugot si Vivien nga magpa-Bible study ug gusto sab niyang iapil iyang mga anak. Si Andrew ug Elizabeth mibisita kang Vivien, ug sila na pod ang iyang gigakos. Maayo gyod ug epekto kang Vivien ang ilang wala damhang pag-ilhanay. Dihang gipakita ni Andrew ug Elizabeth ang librong Gitudlo sa Bibliya, nakurat sila kay siya miingon nga duna na siyay kopya ana ug nabasa na niya kauban sa iyang upat ka anak. Human masultihi nga mao ni ang gamiton sa libreng pagtuon sa Bibliya, si Vivien miingon dayon, “Sugod na ta!”

Sulat sa Brader nga Romany

Niadtong Nobyembre 2014, naporma didto sa Slovakia ang unang Romany nga kongregasyon. Sa di pa dugayng sirkitong asembliya, 21 ang nabawtismohan nga nagsultig Romany. Silang tanan naggikan sa usa ra ka baryo. Sa Memoryal, 495 ang mitambong sa Romany nga kongregasyon. Ang usa ka brader nga bag-ong nabawtismohan misulat:

Slovakia: Duha ka magmamantala nga malipayong nagsangyaw sa babayeng Romany

 “Romany ko nga taga-Žehra, Slovakia. Para sa mga puti sa among lugar, mga Gypsy mi o latagaw nga mga tawo, hugawan, bakakon, ug kawatan. Pag-adto nako sa simbahan, gibabagan ko sa tigbantay ug giabog. Mahanduraw ba ninyo ang akong gibati sa mga puti human niadto? Unya gidapit ko sa mga Saksi ni Jehova sa Kingdom Hall. Miadto ko pero dako akong pagduda kay basig madismaya na sab ko. Nakurat ko kay wala pa ko kasulod sa Kingdom Hall, gilamano na kog puti ug giabiabi ko. Wa ko kapaminaw ug tarong sa pakigpulong kay sige kog hunahuna, ‘Nganong buotan man kaayo sila nako?’

“Pagkagabii, dili ko katulog kay naghunahuna gihapon ko sa nahitabo didto sa Kingdom Hall. Busa mitambong kog usab aron sutaon kon buotan ba gyod sila. Pero, misamot pa hinuon sila kabuotan ug gitratar ko nila samag dugay nang amigo. Regular na ko sa panagkatigom, ug sa ulahi nagpabawtismo ko. Human sa bawtismo, wa gyod mausab ang tinagdan sa mga igsoon ug ila kong gipabilhan. Usahay, dalitan pa gani ko nilag mas maayong pagkaon kay sa ilang ginakaon! Dili na gyod ko mobiya niini nga organisasyon, ug alagaron nako si Jehova nga Diyos hangtod sa hangtod.”

Gitubag ang Pag-ampo nga Makasangyaw

Ang sister nga si Aysel nag-bus gikan sa Ganja padulong sa Baku sa Azerbaijan. Miampo siya kang Jehova nga gusto niyang makasangyaw samtang nagbiyahe. Bisag duna nay lingkoranan si Aysel, gipugos siya sa usa ka babaye nga pataparon. Nag-estoryahanay sila, ug nangitag paagi si Aysel nga mahisgotan nila ang Bibliya. Miingon ang babaye nga gihigugma niya si Jesus ug gusto niyang masayod pag dugang. Nagbayloanay silag  numero sa telepono ug nagkasabot nga magkita pag-usab. Nangayog Bibliya ang babaye kang Aysel.

Sa nakabalik si Aysel sa Ganja, gibisita niya ang babaye sa trabahoan. Nahisgotan sa babaye nga duna siyay “librita sa pangadyeon” nga kada adlaw niyang ginabasa. Nakurat si Aysel kay ang giingon niyang librita mao diay ang 2013 nga Pagsusi sa Kasulatan sa Adlaw-Adlaw. Nasugdan ang pagtuon sa Bibliya, ug nalipay si Aysel nga gihatagan siya ni Jehova ug determinasyon sa pagsangyaw sa impormal.

Sulat Pasalamat sa Usa ka Piniriso

Sulat kini gikan sa Spain:

“Una sa tanan, gusto kong magpasalamat sa inyong paningkamot nga masangyawan ang tanang tawo sa mensahe sa Bibliya.

“Una nakong naestorya ang mga Saksi ni Jehova 15 ka tuig kanhi didto sa Tiranë, Albania. Natingala ko kay wa mahadlok ang usa ka Saksi sa pagduol sa among gang nga 10 ka batan-on. Walay makaako nga makig-estorya namo, apan giestorya mi sa maong brader bisag duna miy mga armas. Nakadayeg ko niya kay wa siya mahadlok nga moestorya namo bahin sa Bibliya.

“Upat ka tuig kanhi gibisita kog Saksi dinhi sa prisohan sa Spain ug gitanyagan ko niyag pagtuon sa Bibliya. Misugot ko, ug sukad adto nagbag-o ko. Dili na ko bayolente, agresibo, ug dugay nang wala makig-away. Nailhan nako si Jehova, ug tungod ana may katuyoan na ang akong kinabuhi. Naningkamot ko nga magmakigdaiton, ug karon dili bawtismadong magmamantala na ko sa kapig usa ka tuig.

“Ika-12 ka tuig na nako ron sa prisohan. Sa milabayng 4 ka tuig, natagamtam nako ang kalipay ug kalinaw sa  hunahuna nga wala nako mabati kaniadto. Tungod ana, mapasalamaton kaayo ko kang Jehova kada adlaw.

“Sa miaging mga semana mitan-aw kog mga video sa jw.org. Natandog gyod ko sa video bahin sa usa ka brader nga napriso sa United States. Dili ko emosyonal nga tawo, pero dihang nakita nako ang iyang pagbag-o, dili nako mapugngan ang akong mga luha.

“Hinaot padayong panalanginan ni Jehova ang inyong mga paningkamot nga masangyawan ang tanang tawo pinaagi sa paghubad sa maayong balita ngadto sa daghan kaayong pinulongan ug sa pagbisita sab namo dinhi sa prisohan.

“Daghan kaayong salamat.”

“Malinawon na Gyod ang Akong Hunahuna”

“Haw-ang kanunay ang akong kinabuhi ug walay kalinaw sa hunahuna,” miingon si Felicity, 68 anyos ug nagpuyo sa Sweden. Kay wala matagbaw sa mga pagtulon-an sa Katoliko, gitun-an niya ang mga doktrina sa  daghang relihiyon hangtod nga nalangkit siya pag-ayo sa espiritismo.

Naguol kaayo siya kay wala niya makaplagi ang tinuod nga kahulogan sa kinabuhi maong nakahunahuna siyang magpakamatay. “Nagdagayday ang akong mga luha samtang nag-ampo sa Diyos. Gihangyo nako siya nga tug-anan ko kon unsay gusto niyang akong buhaton. Paglabayg duha ka semana, may nanuktok. Gipangutana ko sa mapahiyomong batan-on nga lalaki kon gusto ba kong maminaw sa Pulong sa Diyos. Nakaingon ko sa akong kaugalingon, ‘Diyos ko, dili ni ang akong gipasabot. Nganong mga Saksi ni Jehova pa man?’”

Gusto unta niyang isira ang pultahan, pero nakadesisyon siya nga maminaw. Dayon, nagpa-Bible study siya sa librong Gitudlo sa Bibliya. Miingon siya, “Bag-o ang pagkapresentar sa impormasyon sa Bibliya.” Si Felicity nabawtismohan sa 2014 nga rehiyonal nga kombensiyon sa Sweden. Siya miingon: “Mao ni ang akong gipangita sa tibuok nakong kinabuhi. Malinawon na gyod ang akong hunahuna.”