Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

2016 Tinuig nga Basahon sa mga Saksi ni Jehova

Burundi: Si Nolla nga nagpakita sa Bantayanang Torre sa mga lalaki nga nangayog baga

 PAGSANGYAW UG PAGPANUDLO SA TIBUOK YUTA

Africa

Africa
  • KAYUTAAN 58

  • POPULASYON 1,082,464,150

  • MAGMAMANTALA 1,453,694

  • PAGTUON SA BIBLIYA 3,688,959

Nagsangyaw Samtang Nagmotor

Benin: Si Désiré nga nagbutang ug audio player sa iyang motor aron makasangyaw sa pasahero

Ang depasaherong motor, nga gitawag ug zem, maoy paboritong sakyanan sa mga siyudad sa habagatang Benin. Ang oksilyare payunir nga si Désiré nagbutang ug audio player sa iyang zem ug gipaatubang ang duha ka speaker sa pasahero. Pirmeng i-play ni Désiré ang rekording sa mga publikasyon ug drama sa Bibliya. Ang pasahero makapaminaw dayon sa rekording inigsakay niya.  Daghan ang ganahan sa ilang madunggan mao nga bisag makaabot na sila sa ilang destinasyon, halos dili sila gustong manaog sa zem hangtod dili mahuman ang rekording. Si Désiré miingon: “Gusto kong mobayad dayon sila ug manaog aron makapamasahero pa ko, pero mas importante nga madunggan nila ang kamatuoran kay sa makakuwarta ko. Gani, mas daghan kog matanyag nga literatura sa ingon ani nga paagi.”

Bata nga Namugos

Ang sayis anyos nga si Nolla nagpuyo uban sa iyang pamilya sa kabukiran sa Burundi. Usa ka adlaw, dihang nagluto ang iyang ginikanan, duha ka lalaki nga nagtrabaho sa silingan ang nangayog baga. Si Nolla, nga wala pa mag-eskuyla, mao ang nagbantay sa giluto. Misugot siya nga manguha silag baga. Pero taudtaod, nakita ni Nolla nga gigamit sa duha ka lalaki ang baga aron magdagkot ug sigarilyo. Nasuko si Nolla ug miingon, “Kon kabalo pa ko nga gamiton ra diay ninyo ang baga para sa sigarilyo, dili gyod mo nako tagaan.” Dayon, nakahinumdom siya nga naay magasin didto sa Kingdom Hall nga may picture sa sigarilyo. Midagan siya padulong sa Kingdom Hall ug nagkuhag duha ka kopya sa Hunyo 1, 2014 nga Bantayanang Torre, nga naghisgot bahin sa pagpanigarilyo. Gihatag kini ni Nolla sa mga lalaki, ug namugos nga basahon dayon nila ni. Wala madugay, nagkita na pod sila ug gihatagan niya silag imbitasyon sa rehiyonal nga kombensiyon. Kay mibilib sa pagkaporsigido sa bata, nakadesisyon sila nga tambongan ang duha ka adlaw sa kombensiyon. Pagkaudto, nakit-an  sila ni Nolla ug giimbitar nga maniudto uban sa iyang pamilya. Nakadayeg sila sa ilang nakita ug nadunggan sa kombensiyon maong nagpa-Bible study sila.

Pagsangyaw Diha sa Prisohan

Ang mga ansiyano sa Liberia nagsangyaw sa mensahe sa Gingharian diha sa lainlaing prisohan. Si Yves nga espesyal payunir sa Monrovia, ang kaulohan, miingon: “Niadtong Marso, tulo sa mga piniriso ang nahimong dili bawtismadong magmamantala maong unom na ka magmamantala ang naa sa Monrovia Central Prison.” Unsaon nila pagsangyaw? “Kada Miyerkoles ug Sabado magtigom sila alang sa pagsangyaw,” miingon si Yves. “Unya, tugtan sila nga sangyawan ang ubang piniriso sa matag selda.” Daghang piniriso karon ang nagpa-Bible study ug nagtambongan sa mga tigom nga gipahigayon diha sa prisohan. Nakapakigpulong ang usa ka representante sa sangang buhatan diha sa prisohan, ug 79 ka piniriso ang mitambong. May unom pa ka prisohan nga nagpahigayon ug ginurupo nga pag-Bible study, ug nakatabang kini nga magbag-o ang mga piniriso.

“Nanginahanglan Kaayo Mig Tabang”

Dakong paningkamot ang gihimo aron matabangan ang mga interesado sa hilit nga mga dapit para makatambong sa Memoryal. Pananglitan, ang tribong San, nga gitawag sab nga mga Nitibo, mao ang orihinal nga mga molupyo sa habagatang Africa. Sila simpleg kinabuhi, magbalhinbalhin, mangayam, ug mamunit ug bisag unsang  mapuslan. Sa ikaduhang higayon, gipahigayon ni Glenn nga usa ka espesyal payunir sa norte sa Namibia ang 2015 nga Memoryal sa hilit nga baryo sa mga San, nga 270 kilometros silangan sa Rundu. Sama sa miagi, libreng gipagamit sa mga lider sa tribo ang pasilidad sa korte. Kusog kaayo ang ulan sa wala pa magsugod ug panahon mismo sa pagsaulog, pero 232 gihapon ang nakatambong sa Memoryal. Ang mga Nitibo niining lugara nagsultig Khwe—pinulongan nga ilado sa daghang takla nga tunog. Gihubad ang pakigpulong nga Iningles ngadto sa Khwe. Kay walay Bibliya sa Khwe, naay gipasalida gamit ang projector aron ipatin-aw ang mga teksto sama sa Isaias 35:5, 6. Si Glenn nga nagdumalag daghang Bible study sa maong lugar miingon: “Sa milabayng duha ka tuig, tig-anhian ko kaduha sa usa ka bulan ug sa tolda ra ko magpuyo sa pipila ka adlaw. Hinay ang pag-uswag tungod sa pinulongan ug sa distansiya maong nanginahanglan kaayo mig tabang. Dihang giestorya nako ang mga lider sa tribo panahon sa pagpangandam sa Memoryal, usa sa mga nagdumala sa baryo mihangyo nga magtukod ang mga Saksi ug simbahan sa maong lugar. Siya nagpasalig nga ang baryo nay bahala sa lote ug sa gasto sa pagtukod! Ang himoon na lang namo mao ang pag-asayn ug ‘pastor’ o kaha bansayon ang usa nila nga mahimong pastor!”

Namibia: Duha ka sister nga malipayong nagsangyaw sa babayeng Himba