Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

2016 Tinuig nga Basahon sa mga Saksi ni Jehova

 MAKAIIKAG NGA REPORT SA MIAGING TUIG

“Ganahan Kaayo Mi sa JW Broadcasting!”

“Ganahan Kaayo Mi sa JW Broadcasting!”

NIADTONG Oktubre 6, 2014, misugod pag-broadcast sa Iningles ang atong estasyon sa TV diha sa Internet. Kini gitawag ug JW Broadcasting. * Sukad sa Agosto 2015, kini gihubad sa kapig 70 ka pinulongan aron daghan pang igsoon ang makabenepisyo sa mga programa niini. Sa tibuok kalibotan, daghan ang nagpasalamat sa bag-ong espirituwal nga tagana. Pero sa unsang paagi nagsugod ang JW Broadcasting?

Kinahanglang mangitag maayong lokasyon. Ug ang napili mao ang bilding sa 30 Columbia Heights, didto sa  hedkuwarter sa mga Saksi ni Jehova sa Brooklyn, New York. Sa usa lang ka semana, gibakantehan ni. Dayon giandam kini sa Maintenance Department samtang giplano sa design team ang usa ka studio nga desente ug moderno. Ang mga igsoon sa United States migahin ug daghang oras sa pagdisenyo sa studio ug sa pagpangitag paagi aron dali kining mahuman. Kini nga trabaho maabtan untag mga bulan pero gihimo lang nila kini sa pipila ka adlaw. Unya, ang Purchasing Department namalit dayon ug daghang materyales.

Giinstalar ang tag-as kaayong kable, ug giseguro nga ang tanang gamit dili mopalyar. Kasamtangan, didto sa mga studio sa audio/video sa Patterson, girekord sa atong orkestra ang musika nga gamiton. Ang mga igsoon gikan sa lainlaing nasod miboluntaryo para niini nga mga rekording. Gisulat ang mga eskrip ug giandam ang mga drama. Nagkugi pag-ayo sa paghimog video ang mga membro sa audio/video sa Brooklyn, Patterson, Wallkill, ug ubang nasod. Dihang nahuman ang studio ug nainstalar ang tanang gamit, giandam ang mga programa nga ipasalida para sa mosunod nga mga bulan.

Studio sa JW Broadcasting, sa Brooklyn, New York

Gipangutana namo ang usa ka eksperto kon unsa ka dugay himoon ang studio nga sama niini, ingon siya nga sagad mga usa ka tuig ug tunga. Pero duha ra ka bulan nga gitrabaho ni sa atong kugihang mga igsoon!

Makapatandog gayod ang mga resulta! Ang binulan nga programa sagad i-release matag unang Lunes sa bulan, ug kapig duha ka milyon ka beses kining gitan-aw nianang bulana. Ang broadcasting ug ubang video tan-awon kapig 10 ka milyon ka beses kada bulan.

“Ang programa mas nakapasuod nako sa organisasyon ni Jehova ug sa Nagamandong Lawas. Sakop gyod diay ko sa usa ka pamilya nga naghigugmaay.”—Kenya

Unsay gibati sa katawhan ni Jehova niining bag-ong espirituwal nga tagana? Aniay pipila ka komento:

  •  “Usa ni sa malipayon kaayong mga gabii sa akong kinabuhi! Lipay kaayo ko human namo matan-aw sa akong asawa ang Mayo 2015 nga programa sa JW Broadcasting. Usa ni sa pinakanindot nga mga regalo ni Jehova. Salamat sa Nagamandong Lawas ug sa tanang igsoon nga nagkugi sa paghimo niining talagsaong espirituwal nga tagana.”—Indonesia.

  • “Kaniadto, daghan ang wa gyod kadungog ug pakigpulong sa Nagamandong Lawas. Pero karon di lang kay madungog nato sila, makita pa gyod. Mas mibati tang suod sa Nagamandong Lawas ug sa atong mga igsoon sa tibuok kalibotan.”—Kenya.

  • “Lisod mag-family worship kauban sa akong duha ka tin-edyer kay dili Saksi akong bana. Maong dako gyong tabang sa akoa ang broadcasting. Tungod ani, mibati kong bahin sa organisasyon, ug nadasig kaayo mi sa akong mga anak. Panalangin gyod kini ni Jehova.”—Britain.

  • “Ganahan kaayo mi sa JW Broadcasting! Natubag gyod ang among mga pag-ampo dihang ang programa nahubad sa ubang pinulongan. Nadasig mi sa inyong kalipay ug gugma sa pag-alagad kang Jehova. Sukad nga naa na tay estasyon sa TV, mas naapresyar namo nga membro mi sa talagsaon ug nindot nga organisasyon ni Jehova.”—Czech Republic.

  •  “Mas masuod ko kang Jehova dihang maminaw sa mga membro sa Nagamandong Lawas diha sa akong pinulongan.”—Brazil.

  • “Nag-alagad ko kang Jehova sa 16 na ka tuig, pero ang kalipay nako ron pareho sa akong gibati niadtong gibawtismohan ko. Minahal nga mga igsoon, salamat kaayo sa JW Broadcasting.”—Brazil.

Sa tabang ni Jehova, segurado ming ang JW Broadcasting padayong makadasig natong tanan ug makahatag ug kadayeganan kang Jehova.