Laktaw ngadto sa video

Laktaw ngadto sa secondary menu

Laktaw ngadto sa kaundan

Mga Saksi ni Jehova

Cebuano

2016 Tinuig nga Basahon sa mga Saksi ni Jehova

Canada: Kangirsuk—baryo sa mga Inuit sa amihanang Quebec

 MAKAIIKAG NGA REPORT SA MIAGING TUIG

Mga Balita Gikan sa Lainlaing Nasod

Mga Balita Gikan sa Lainlaing Nasod

Sangyawan ang Tanang Taga-Canada

Ang video nga Nganong Tun-an ang Bibliya? gihubad sa walo ka lokal nga pinulongan aron masangyawan ang tanang teritoryo nga sakop sa sangang buhatan sa Canada. Sa 10 ka adlaw nga kampanya sa pagsangyaw sa Nunavik sa Arctic niadtong Oktubre 2014, gipasalida ang video sa pinulongang Inuktitut sa halos tanang panimalay sa 14 ka komunidad nga kapig 12,000 ang populasyon.

Mibilib ang Manedyer

Niadtong Septiyembre 2014, gipahigayon ang internasyonal nga kombensiyon sa Seoul diha sa Sangam World Cup Stadium sa South Korea. Kapig 56,000 ang  nanambong. Ang manedyer sa estadyum mibilib sa maayong pamatasan ug kooperasyon sa mga Saksi panahon sa okasyon. Siya miingon: “Ang tanan maayog pamatasan. Nakadayeg ko kay mas maayo pa silang manglimpiyo kay sa among propesyonal nga mga tiglimpiyo. Unta ang among mga tiglimpiyo ingon anag tinamdan sa trabaho. Kon gusto tang moalagad sa Diyos sa hustong paagi, kinahanglang sundogon nato ang mga Saksi ni Jehova.”

South Korea: Internasyonal nga kombensiyon sa Seoul, 2014

Gibansay ni Jehova

Niadtong Mayo 2012, wala aprobahi sa gobyerno sa Sweden ang aplikasyon sa mga Saksi ni Jehova nga makadawat ug benepisyo sama sa nadawat sa ubang relihiyon.  Ang Nagamandong Lawas misugot nga iapelar kini sa Supreme Administrative Court sa maong nasod.

Ang Korte nagpahigayon ug husay una naghimog desisyon. Daghang brader gikan sa lainlaing nasod ang nagmiting aron hisgotan kon unsaon pagtubag ang posibleng mga pangutana. Nagpraktis sila sa Kingdom Hall sa Stockholm.

Samtang nagpraktis, naay nanuktok sa Kingdom Hall. Pag-abli sa brader, nagpailaila ang duha ka dalagita, nga 13 ug 14 anyos. Naa silay pangutana bahin sa mga Saksi ni Jehova. Ang brader nahinumdom, “Sultihan unta nako sila nga mobalik sunod adlaw kay busy mi ug walay panahon para magpadisturbo.”

Pero giatubang gihapon sila sa brader. Daghan silag pangutana. Espesipiko ang ubang pangutana ilabina bahin sa isyu sa katilingban ug pagbotar panahon sa eleksiyon. Pagkahuman, ang brader mibalik sa miting ug miasoy kon unsay gipangutana sa mga dalagita ug kon giunsa niya kini pagtubag.

Pagkaugma, panahon sa husay, nasorpresa ang mga brader kay daghag pangutana ang Korte nga pareho sa pangutana sa mga dalagita. Ang brader nga nagrepresentar sa organisasyon miingon: “Kalmado kaayo ko, bisag angay unta kong kulbaan kay nag-atubang ko sa banggiitan kaayong mga abogado sa nasod. Pero para nako gipabati ni Jehova nga wala mi niya pasagdi kay gibansay na mi niya una pa ang husay.”

Ang Korte mipabor nato, ug ang kaso gibalik ngadto sa gobyerno para sa bag-ong desisyon.

Usa ka Sakong Bugas ni Ken

Si Ken sayis anyos ug nagpuyo sa Haiti. Nalipay siya pagkahibalo nga tukoran silag bag-ong Kingdom Hall.  Busa, nakadesisyon siya nga maghimog sekretong donation box diha sa iyang kuwarto. Imbes gastohon ang iyang alawans sa eskuylahan, iya kining gihulog sa iyang donation box. Padayon niya kining gihimo hangtod miabot ang grupo nga magtukod sa Kingdom Hall. Dayon iyang gihatag ang iyang donation box, nga makapalit nag usa ka sakong bugas. Sulod sa pipila ka adlaw, ang bugas ni Ken maoy gilung-ag aron ipaniudto sa mga boluntaryo.

Sugo sa Heneral

Sa miaging tuig, pipila ka bulan nga gikinahanglan ang pagkuhag permit para makasulod sa pipila ka lugar sa Sierra Leone nga gikuwarentinas tungod sa sakit nga Ebola. Pananglitan, ang tigdumala sa sirkito kinahanglang mokuhag I.D. ug permit sa sakyanan aron makasulod nianang mga lugara. Mao pod nay kinahanglang buhaton sa maghatod ug literatura ug sulat. Ang mga membro sa Disaster Relief Committee kinahanglang magdalag klorin, pagkaon, ug infrared thermometer. Pirme gyod silang mahatagan ug permit.

Usa ka eksperyensiya ang ilabinang makapadasig. Ang mga brader nagpasa ug aplikasyon para sa 34 ka I.D. ug 11 ka permit sa sakyanan, unya kinahanglan silang makigkita sa heneral sa militar aron aprobahan ilang aplikasyon. Duha ka brader gikan sa sangang buhatan ang nakigkita sa heneral sa adlaw nga kuhaon na nila ang mga I.D. ug permit. Pero nawala ilang aplikasyon. Gisugo ang mga brader nga pangitaon kini sa nagtipun-og nga papeles, pero wala nila ni makit-i. Niadto pong tungora, giingnan sa heneral ang iyang sekretarya nga isara ang opisina ug dili modawat ug aplikasyon sulod sa duha ka semana. Hilom nga miampo ang mga brader.  Dayon ang heneral mitan-aw nila ug nangutana, “Pila diay ka I.D. ug permit inyong kinahanglan?” Dihang giingnan siya kon pila, nakatindog siya ug nakasinggit, “Kadaghan man!”

Gieksplikar sa mga brader kon unsay atong buluhaton ug kon sa unsang paagi makatabang atong hinabang. Ang heneral mihilom kadiyot, mitan-aw sa sekretarya, ug miingon, “Ihatag ang tanan nilang kinahanglan.”

Guinea and Sierra Leone: Gipatuman ang pagpanghunaw diha sa mga Kingdom Hall