Laktaw ngadto sa video

Laktaw ngadto sa secondary menu

Laktaw ngadto sa kaundan

Mga Saksi ni Jehova

Cebuano

2016 Tinuig nga Basahon sa mga Saksi ni Jehova

Russia: Pagpaambit sa maayong balita diha sa Moscow

 MAKAIIKAG NGA REPORT SA MIAGING TUIG

Legal nga Report

Legal nga Report

Pagparehistro

Ang mga Saksi ni Jehova dili kinahanglang magparehistro aron himoon ang ilang buluhaton. Pero ang pagparehistro makatabang aron makapanag-iya o makaabang ug mga propidad para sa panagkatigom ug makadawat ug literatura gikan sa laing nasod.

  • Niadtong 2004, gikanselar sa korte sa Russia ang rehistrasyon sa korporasyon sa mga Saksi ni Jehova sa Moscow. Tungod niadto, misamot ang paglutos. Giharas sila sa polis ug ang uban giatake sa mga tawo samtang nagsangyaw sa publiko. Gikanselar ang mga kontrata sa abang sa mga tigomanan maong wala nay katigoman ang mga igsoon. Ang 2010 nga desisyon sa European Court of Human Rights (ECHR)  nagkompirmar nga gilapas sa Russia ang katungod sa mga Saksi ni Jehova sa Moscow, ug kini nagmando nga ibalik ilang rehistrasyon. Malipay kaming ibalita nga sa Mayo 27, 2015, ang Department of the Russian Federation Ministry of Justice sa Moscow nagrehistro pag-usab sa korporasyon ingong Local Religious Organization of Jehovah’s Witnesses sa Moscow.

Pagbuhis

Ang legal nga mga korporasyon nga gigamit sa mga Saksi ni Jehova sa tibuok kalibotan sagad dili paninglan ug buhis, sama sa ubang relihiyon ug organisasyon nga naghatag ug hinabang. Pero usahay, may mga gobyerno nga maningil natog buhis.

  • Sa Sweden, ang gobyerno nag-ingon nga ang Bethel kuno nagnegosyo, unya “nagsuweldo” ug mga Bethelite. Kini kuno dili relihiyosong organisasyon sa espesyal nga bug-os panahong mga ministro. Ang Bethel ug ang matag Bethelite gisingil sa gobyerno ug libolibong euro ingong buhis. Aron masulbad kini, ang mga Saksi sa Sweden nagpasakag sumbong diha sa ubos nga korte ug nagsumiter ug unom ka lainlaing petisyon diha sa ECHR.

Neyutralidad ug Pagdumili sa Pagsundalo

Ang katawhan ni Jehova nagsunod gyod sa sugo nga ‘salsalon ang ilang mga espada nga mga punta sa daro’ ug dili na magtuon ug gubat. (Isa. 2:4) Sila nagpabiling neyutral bisan pag ang ubang gobyerno walay gihatag nga alternatibo para sa serbisyo militar.

  • Ang balaod karon sa South Korea wala mag-ila sa katungod sa pagdumili nga magsundalo. Sa milabayng 60 ka tuig, kapig 18,000 ka brader ang gipriso kay dili magsundalo. Halos matag Saksi didto dunay higala o membro sa pamilya nga napriso. Niadtong 2004 ug 2011, ang Constitutional Court sa South Korea nag-ingon nga subay sa konstitusyon ang ilang  pagkapriso. Pero pagka-Hulyo 2015, gihusay kini pag-usab sa maong Korte. Ang mga Saksi ni Jehova sa tibuok kalibotan nag-ampo nga masulbad kining dugay na kaayong isyu aron ang mga brader sa South Korea dili na mapriso tungod sa ilang pagtuo.

  • Sa Eritrea, 22 ka tuig nang napriso tungod kay dili magsundalo ang tulo ka Saksi nga si Paulos Eyassu, Negede Teklemariam, ug Isaac Mogos. Sila wala sukad makasohi o makadepensa sa kaugalingon diha sa korte. Sila ug ang kapig 50 ka igsoon nagmatinumanon bisan pa sa pagmaltratar ug sa makaluluoy nga kahimtang diha sa prisohan. Si Jehova seguradong maminaw sa “pagpanghupaw” sa mga napriso tungod sa ilang pagtuo ug Siya motabang gyod kanila.—Sal. 79:11.

  • Sa Ukraine, si Vitaliy Shalaiko gipareport niadtong Agosto 2014 aron magsundalo dihang ang nasod nangandam sa gubat. Tungod sa iyang baroganan, siya dili magsundalo pero mosugot nga magserbisyo sa komunidad. Ang prosekusyon miingon nga naglikaylikay ra siyang magsundalo, pero ang duha ka korte mihukom nga dili siya sad-an. Ang korte sa apelasyon miingon nga ang “katungod sa pagdumili sa  pagsundalo dili puwedeng lapason tungod lang kay nameligro ang seguridad sa nasod.” Ang prosekusyon miapelar pag-usab. Pagka-Hunyo 23, 2015, ang High Specialized Court of Ukraine for Civil and Criminal Cases midapig sa desisyon sa ubos nga mga korte. Gikompirmar nga ang katungod sa pagdumili sa pagsundalo ug ang alternatibong pagserbisyo sundon gihapon bisan pag may krisis sa nasod.

Ukraine: Si Vitaliy Shalaiko nga malipayong nagsangyaw

Kon bahin sa positibong resulta sa kaso, si Brader Shalaiko miingon: “Nalig-on ko sa giingon sa Jeremias 1:19. Andam ko bisag unsay desisyon—importante lang nga magmatinumanon kang Jehova. Seguradong dili ko niya pasagdan ug hatagan ko niyag kusog aron magmatinumanon. Pero labaw pa sa akong gidahom ang resulta. Midaog akong kaso sa tulo ka korte. Ug panahon sa husay, gisuportahan ko sa mga igsoon. Wala gyod ko pasagdi.”

Neyutralidad ug Nasyonalistikong Seremonyas

Ang Kristohanong neyutralidad masulayan sab tungod sa nasyonalistikong mga seremonyas. Ang mga kabataan mapresyur nga mokompromiso kay pugson sila sa titser sa pagkantag nasodnong awit o pagsaludo sa bandera.

  • Sa Karongi District, Rwanda, ang mga titser miingon nga ang mga estudyante nga Saksi wala daw magtahod sa nasodnong awit kay dili sila mokanta niini. Ang mga estudyante gipalagpot sa eskuylahan ug gipriso pa gani. Niadtong Nobyembre 28, 2014, ang Intermediate Court sa Karongi mipabor sa mga Saksi ug miingon nga ang pagdumili sa mga estudyante sa pag-awit wala magpasabot nga wala silay tahod. Sa ubang nasod sa Africa, sama sa Cameroon, Democratic Republic of Congo, Equatorial Guinea, ug Malawi, ang batan-ong mga Saksi nakaeksperyensiya usab ug samang isyu ug ang uban gipalagpot sa eskuylahan. Ang atong mga igsoon didto naningkamot nga maestorya ang mga opisyales sa gobyerno ug mga titser bahin sa neyutral nga baroganan sa mga Saksi.

  • Honduras: Si Mirna Paz ug Bessy Serrano nga nahatagan ra gyod ug diploma

      Niadtong Disyembre 2013, duha ka estudyanteng Saksi sa publikong eskuylahan sa Lepaera, Honduras, ang wala makakuhag diploma kay dili mokantag nasodnong awit ug dili manumpa atubangan sa bandera. Aron sulbaron kini, duha ka abogadong Saksi ang nakig-estorya sa representante sa Ministry of Education bahin sa mga desisyon sa korte sa ubang nasod nga nagsuportar sa baroganan sa mga estudyanteng Saksi. Buotan kaayo ang opisyal ug misugot siya nga ang mga estudyante ug ilang ginikanan magpadalag sulat ngadto sa abogado sa Secretariat of Education sa Honduras. Human masusi ang reklamo, siya nag-isyu ug direktiba niadtong Hulyo 29, 2014, nga nag-ingon nga kinahanglang walay diskriminasyon ang paghatag ug edukasyon sa tanan diha sa komunidad ug nagmando nga hatagag diploma ang mga estudyanteng Saksi.

May Diskriminasyon ang Gobyerno

Sa matag nasod, ang mga Saksi ni Jehova nagsunod sa sugo ni Jesus nga isangyaw ang maayong balita sa Gingharian, magtigom kauban sa isigkamagtutuo, ug regular nga magtuon sa Pulong sa Diyos. Gisunod sab nato ang sugo sa Bibliya nga  itisok ang balaod ni Jehova diha sa kasingkasing sa atong mga anak ug nga “mag-ayad . . . sa dugo.” (Buh. 15:20; Deut. 6:5-7) Usahay ang pagsunod sa maong mga sugo mahimong rason nga supakon ta sa gobyerno, kinsa wala kasabot sa atong baroganan.

  • Sa Florida, U.S.A., ang dili Saksing inahan maoy gihatagan sa ubos nga korte ug bugtong katungod sa pagtudlo sa iyang tulo ka anak bahin sa relihiyon. Ang Saksi nga amahan gidid-an sa pagtudlog bisan unsa nga supak sa Katoliko. Ang amahan miapelar, ug sa Agosto 18, 2014, gibali sa korte sa apelasyon ang desisyon sa ubos nga korte. Nagbase sa mga desisyon sa miagi, ang korte miingon: “Usahay, did-an sa korte ang ginikanan nga tudloan bahin sa iyang relihiyon ang anak nga wala sa iyang poder. Pero kini nga desisyon pirmeng balihon kon walay klarong ebidensiya nga makadaot sa bata ang kalihokan sa maong relihiyon.”

    Ang desisyon naghatag sa mga bata ug kagawasan nga makabenepisyo sa instruksiyon ug paggiya ni Jehova nga Diyos. Sila padayong nag-uswag sa espirituwal samtang nakig-uban sa lokal nga kongregasyon. Ang amahan miingon: “Ang mga pagsulay nagtudlo nakog daghang leksiyon. Di pa dugay, may mga pagsulay kong giatubang pero gitabangan ko ni Jehova sa pagpabiling lig-on! Kabalo kong naa gyoy paglutos kon pilion natong alagaran si Jehova.”

  • Namibia: Si Efigenia Semente ug iyang tulo ka anak

    Nasulayan pag-ayo ang pagkamatinumanon ni Sister Efigenia Semente, kinsa may tulo ka anak ug taga-Namibia. Dihay komplikasyon pagpanganak niya sa iyang ikatulong anak. Ang mga doktor, nars, ug dili Saksing mga paryente nangayog desisyon sa korte nga paabonohan siyag dugo. Si Sister Semente naningkamot pag-ayo nga dili maabonohan ug midangop sa korte aron depensahan ang iyang katungod sa pagpilig gusto niyang paagi sa pagtambal. Niadtong Hunyo 24, 2015, ang Korte Suprema sa Namibia mipabor kang Sister Semente. Ang korte miingon nga “katungod sa matag  tawo ang pagpili kon unsay buhaton ug dili buhaton sa iyang lawas, ginikanan man siya o dili.” Si Sister Semente miingon: “Nabati gyod namo ang tabang ni Jehova. Nindot kaayo nga mahimong bahin niini nga organisasyon. Gimahal gyod ta ni Jehova.”

  • Ang mga Saksi sa Switzerland gawasnon nga makapahigayon ug publikong pagsangyaw sa kadalanan sa dagkong siyudad. Pero naghimog ordinansa ang siyudad sa Geneva nga nagdili sa paggamit ug “cart nga nagsabwag ug relihiyosong impormasyon diha sa publikong mga dapit.” Ang mga Saksi mireklamo sa korte ug miingon nga ang pagdili sa pagsabwag ug relihiyosong impormasyon gamit ang cart “klarong naglapas sa kagawasan sa relihiyon ug pagpahayag sa opinyon.” Ang korte mipabor kanila, ug nagtinabangay pa gani ang mga Saksi ug lokal nga awtoridad sa pagpangitag haom nga lokasyon ug oras para sa publikong pagsangyaw gamit ang cart.

  • Mas gilisodlisod sa gobyerno sa Azerbaijan ang kalihokan sa mga Saksi ni Jehova. Pirmeng ipatawag sa Ministry of National Security ang mga Saksi aron sukitsukiton. Kanunay  pod nilang sudlon ang balay sa mga Saksi aron mangitag literatura nga wala aprobahi nga ipasulod sa nasod. Nabaniog sa lainlaing nasod ang balita nga gipapriso sa Ministry of National Security niadtong Pebrero 2015 ang duha ka Saksi, si Irina Zakharchenko ug Valida Jabrayilova, kay nagpaambit sa uban ug mga pagtulon-an sa Bibliya. Bisag naguol ta tungod sa dili maayong pagtratar, nalipay ta kay ang mga igsoon sa Azerbaijan padayon nga madasigon ug maisogong nagpaambit sa uban sa “maayong balita sa gingharian.”—Mat. 24:14.

  • Ang gobyerno kanunay nga nanghilabot sa kalihokan sa mga Saksi sa Russia. Gani, 80 ka publikasyon sa mga Saksi ni Jehova ang gideklarar sa Russian Federation nga “kontra sa gobyerno.” Kini nagpasabot nga ilegal ang pagpanagtag o pagpanag-iyag kopya nianang “kontra sa gobyerno” nga publikasyon, sama sa Akong Basahon sa mga Estorya sa Bibliya. Dugang pa, niadtong Disyembre 2014, ang Korte Suprema sa Russian Federation mideklarar nga “kontra sa gobyerno” ang atong website nga jw.org. Dili ma-access ang jw.org sa tibuok Russia ug ilegal ang pag-endorso niana. Sukad Marso 2015, wala na pasudla sa customs ang mga literatura sa Saksi, apil ang Bibliya ug ubang literatura nga gideklarar kaniadto sa korte nga dili kontra sa gobyerno.

Nagpadayon pa ang husay sa siyudad sa Taganrog, diin 16 ka magmamantala ang gipasakaag sumbong sa “krimen” nga pag-organisar ug pagtambong ug relihiyosong tigom. Sa siyudad sa Samara, ang awtoridad mikuhag mando sa korte nga ipasara ang korporasyon nga gigamit sa mga Saksi kay kuno kontra sa gobyerno. Bisan pa nianang tanan, ang atong mga igsoon sa Russia nagpadayon sa paghatag sa “mga butang sa Diyos ngadto sa Diyos” ug wala magpadala sa pagpanghilabot sa gobyerno.—Mat. 22:21.