Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

2016 Tinuig nga Basahon sa mga Saksi ni Jehova

 INDONESIA

Habog Kaayo nga Sangang Buhatan

Habog Kaayo nga Sangang Buhatan

Mga opisina sa ika-31 nga andana

Niadtong 2008, ang magmamantala sa Indonesia miabot ug 21,699. Ang sangang buhatan huot na. Layo sab ang lokasyon niini kay gitukod ni panahon sa pagdili. Klaro nga gikinahanglan ang dakodakong pasilidad duol sa Jakarta.

 Paglabayg mga duha ka tuig, ang mga igsoon mipalit ug propidad nga lahi sa sangang buhatan sa una. Gipalit nila ang ika-31ng andana sa moderno kaayong 42-andanas nga bilding duol sa sentro sa Jakarta. Dayon gipalit nila ang 12 andanas sa apartment bilding sa duol aron puy-an sa 80 o kapin pang Bethelite. Mipalit sab silag singko-andanas nga bilding para sa mga departamento sa Bethel Home.

Ang puy-anan sa mga Bethelite nag-okupar ug 12 ka andana

Usa ka grupo sa mga construction servant gikan sa lainlaing nasod ang nagtrabaho uban sa lokal nga mga kontraktor sa pagremodel sa mga opisina ug apartment. “Komplikado kaayo ang mga problema pero wala gyod mi pasagdi ni Jehova,” miingon ang tigdumala sa konstruksiyon nga si Darren Berg. “Pananglitan, gusto ming magbutang ug modernong wastewater treatment plant, pero wala kaayoy nahibaloan ang awtoridad niana nga teknolohiya maong wala ni aprobahi. Dayon, usa ka igsoon nga engineer naghisgot niini ngadto sa usa ka taas ug ranggo nga opisyal. Giaprobahan dayon sa opisyal ang among papeles kay dako siyag pagsalig sa rekomendasyon sa igsoon.”

“Wala na mi magtagotago. Mamatikdan na mi sa mga tawo. Makita nilang magpabilin gyod ang mga Saksi”

Ang bag-ong mga pasilidad sa sangang buhatan gipahinungod niadtong Pebrero 14, 2015. Si Anthony Morris III, membro sa Nagamandong Lawas, ang naghatag sa pakigpulong sa dedikasyon. “Nia na mi ron sa iladong distrito uban sa pipila ka dagkong korporasyon sa Indonesia,” matod ni Vincent Witanto Ipikkusuma, membro sa Komite sa Sangang Buhatan. “Wala na mi magtagotago.  Mamatikdan na mi sa mga tawo. Makita nilang magpabilin gyod ang mga Saksi.”

Komite sa Sangang Buhatan, wala patuo: Budi Sentosa Lim, Vincent Witanto Ipikkusuma, Lothar Mihank, Hideyuki Motoi

“Nindot Kaayong Mosangyaw Dinhi!”

Sa di pa dugayng katuigan, nagkadaghang Saksi gikan sa lainlaing nasod ang namalhin sa Indonesia. “Ang mga need-greater [mga boluntaryo diin dako ang panginahanglan] dakong tabang sa mga nasod sama sa Indonesia,” matod ni Lothar Mihank. “Sila eksperyensiyado, hamtong, ug dasig, nga nakapalig-on sa kongregasyon. Tungod nila, mas naapresyar sa mga igsoon ang tibuok kalibotang panag-igsoonay.” Nganong namalhin sila? Unsay resulta sa ilang pagbalhin? Aniay pipila sa ilang mga komento.

Mga Need-Greaters

1. Janine ug Dan Moore

2. Mandy ug Stuart Williams

3. Casey ug Jason Gibbs

4. Mari (tuo, sa atubangan) ug Takahiro Akiyama (tuo, sa likod)

Si Jason ug Casey Gibbs, gikan sa United States, miingon: “Among gisusi diha sa Tinuig nga Basahon ang gidaghanon sa populasyon kon ikompara sa gidaghanon sa magmamantala, ug among nakita nga Indonesia ang may kinadak-ang panginahanglan sa tibuok kalibotan. Giingnan pod mi sa among mga higalang need-greater nga daghag interesado sa Indonesia. Busa among gitawgan ang  sangang buhatan sa Indonesia, ug ilang gisugyot ang Bali. Mao pay pagsugod sa mga grupo nga magsangyaw sa mga nagsultig Iningles, busa makatabang gyod mi. Usa ka tuig ra unta mi dinhi, pero naabtan mig tulo ka tuig. Kadaghanan sa among masangyawan wala pa makadungog bahin sa mga Saksi ni Jehova. Makapalipay kaayo ang pagsangyaw dinhi!”

Si Stuart ug Mandy Williams, edarang magtiayon nga taga-Australia, miingon: “Nangita mig mga tawong giuhaw sa kamatuoran, maong mibalhin mi sa Indonesia. Sa Malang, East Java, daghan kaayo mig nasangyawang estudyante nga nagsultig Iningles. Gusto silang maminaw sa maayong balita, ug ganahan kaayo sila sa website nga jw.org! Nindot kaayong mosangyaw dinhi.”

Si Takahiro ug Mari Akiyama, nga nagpayunir sa Yogyakarta, Java, miingon: “Dili delikado dinhi kon ikomparar sa amoa sa Japan. Ang mga tawo buotan ug matinahoron. Daghan kanila, ilabina mga batan-on, interesado sa ubang relihiyon. Usa ka adlaw niana, dihang nagbantay sa lamesa sa public witnessing, nakapahimutang mig 2,600 ka magasin sulod lang sa lima ka oras.”

Si Dan ug Janine Moore, magtiayon nga halos 60 anyos na, miingon: “Dihang magsangyaw, tapokan mi sa mga tawo. Mopahiyom mi ug mobalos sab silag pahiyom. Sa primero mahibulong sila, unya mainteres, dayon maeksayted. Kon duna miy ipabasa nila sa Bibliya, ang uban moingon, ‘Puwede nako nâ isulat?’ Nakadayeg sila sa kaalam sa Bibliya. Usa ka tuig na mi dinhi, maayo untag sa una pa mi nanganhi. Kaniadto, nangita mig teritoryo nga wala pa sukad makadungog bahin kang Jehova—ug amo ning nakaplagan!”

Si Misja ug Kristina Beerens miabot dinhi sa 2009 ingong misyonaryo ug karon nag-alagad ingong tigdumala sa sirkito. Sila miingon: “Sa Madura Island, East  Java, maayo kaayog sanong ang mga tawo, bisan pag debotado ang mga Muslim dinhi. Hunongan mi sa mga sakyanan aron mangayog magasin. Moingon sila: ‘Muslim ko, pero ganahan kong mobasa aning mga magasina. Puwede ko mangayog ekstrang kopya para sa akong mga higala?’ Nindot kaayong mosangyaw dinhi!”

Ang Kaumahan Anihonon Na

Niadtong 1931, pag-abot ni Frank Rice sa Jakarta, mga 60,000,000 ang populasyon sa Indonesia. Karon halos 260,000,000 na, maong Indonesia ang ikaupat nga kinadaghanag populasyon sa kalibotan.

Ang mga Saksi ni Jehova sa Indonesia nakasinati sab ug talagsaong pag-uswag. Niadtong 1946, human sa Gubat  sa Kalibotan II, diha ray 10 ka matinumanong magmamantala. Karon duna nay kapin sa 26,000—klarong pamatuod sa panalangin ni Jehova! Ug tungod sa 55,864 nga nanambong sa 2015 nga Memoryal, dunay dakong posibilidad para sa dugang pag-uswag.

Si Jesus miingon: “Dako ang alanihon, apan diyutay ra ang mga mamumuo. Busa, pangamuyo kamo sa Agalon sa pagpangani nga magpadalag mga mamumuo ngadto sa iyang pagpangani.” (Mat. 9:37, 38) Kana sab ang pagbati sa mga alagad ni Jehova sa Indonesia. Determinado silang magpadayon sa pagkugi aron makatabang sa pagbalaan sa halangdong ngalan ni Jehova niining nasod nga daghag isla.—Isa. 24:15.

Pagkat-og Dugang

Sa Unsang Paagi Gisulat ug Gihubad ang Literatura sa mga Saksi ni Jehova?

Kami nagpatik ug literatura sa kapig 600 ka pinulongan. Nganong naghago mi sa paghimo niini?