Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

2016 Tinuig nga Basahon sa mga Saksi ni Jehova

 INDONESIA

Maisogong Payunir

André Elias

Maisogong Payunir
  • NATAWO 1915

  • NABAWTISMOHAN 1940

  • MUBONG IMPORMASYON Maisogong payunir nga nagmatinumanon bisan pag kanunayng giimbestigar ug gihulga.

PANAHON sa Gubat sa Kalibotan II, si Brader Elias ug iyang asawa nga si Josephine miatubang sa mga opisyales sa Sukabumi, West Java. Nahitabo kini diha sa hedkuwarter sa gikahadlokang mga sundalo sa Japan, ang Kempeitai. Si André ang unang gisukitsukit. Gipaulanan siyag mga pangutana. “Unsa nang mga Saksi ni Jehova? Supak ba mo sa gobyerno sa Japan? Mga espiya ba mo?”

“Mga alagad mi sa Labing Gamhanang Diyos ug wala mi gihimong daotan,” mitubag si André. Gikuha sa komandante ang samurai diha sa bungbong ug gihana kang André.

“Patyon kaha tika!” siya misingka. Si André miduko, gidapat ang ulo sa lamesa, ug hilom nga nag-ampo. Namingaw kadali, ug kalit nga may nangatawa. “Isog ka dâ!” miingon ang opisyal. Dayon iyang gipatawag si Josephine. Dihang pareho ra sa iyang bana ang iyang testimonya, ang opisyal misingka: “Dili mo mga espiya. Pahawa mo diri!”

 Pipila ka bulan sa ulahi, si André gitraydor sa “mini nga mga igsoon” ug gipriso. (2 Cor. 11:26) Sulod sa pipila ka bulan, linabayng pagkaon diha sa kanal sa prisohan ang iyang ginakaon. Pero siya nagmaunongon gihapon. Dihang gibisita siya ni Josephine, si André mihunghong: “Ayawg kabalaka. Patyon man ko o buhian, magmatinumanon ko kang Jehova. Dili gyod ko motraydor, bahalag ila kong patyon.”

Human sa unom ka bulan nga pagkapriso, gidepensahan ni André iyang kaugalingon diha sa Jakarta High Court ug siya gibuhian.

Mga 30 ka tuig sa ulahi, dihang gidili na pod sa gobyerno sa Indonesia ang mga Saksi ni Jehova, gipatawag na sab si André sa district attorney sa Manado, North Sulawesi. “Kabalo ba kang gidili na ang mga Saksi ni Jehova?” siya nangutana.

“Kabalo ko,” mitubag si André.

“Unsa man, mobalhin na kag relihiyon?” nangutana ang abogado.

Si André mipaduol ug gipukpok ang iyang dughan. “Puwede ninyong langkaton akong kasingkasing, pero dili ko ninyo mapabalhin ug relihiyon,” siya miingon nga naglanoglanog ang tingog.

Si André gipalakaw sa district attorney ug wala na samoksamoka.

Si André kugihang nagpayunir sa mga 60 ka tuig. Siya namatay niadtong 2000 sa edad nga 85.