Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

2016 Tinuig nga Basahon sa mga Saksi ni Jehova

Gihimong pasangil ang seremonyas sa kasal aron makapahigayog mga asembliya

 INDONESIA

Sila Padayong Nagtigom

Sila Padayong Nagtigom

Panahon sa pagdili, kadaghanang kongregasyon padayong nagtigom sa mga balay. Aron dili masakpan, dili sila manganta. Ang ubang panagkatigom gisulong sa mga polis, pero kasagaran wala ra kaayo maapektohi ang mga igsoon.

Kasagaran, ang mga reunion o kasal maoy himoong pasangil sa mga igsoon aron makapahigayog mga asembliya. “Ang minyoonon magparehistro ug magkuhag permit para sa dakong hikay sa kasal,” miingon si Tagor Hutasoit. “Panahon sa seremonyas, ang mga partisipante sa kasal molingkod sa plataporma samtang ihatag ang sunodsunod nga pakigpulong.”

Sa usa ka asembliya, dihay polis nga nangutana kang Tagor.

“Kasagaran, duha o tulo ra ka oras ang kasal. Nganong buntag hangtod gabii man inyong mga kasal?” nangutana ang polis.

“Ang ubang kaslonon daghag problema ug nagkinahanglag daghang tambag sa Bibliya,” miingon si Tagor.

“Bitaw no?” miyango ang polis.

 Pinaagi sa dungan nga mga kasal, napahigayon sa mga igsoon ang 1983 “Panaghiusa sa Gingharian” Distritong Kombensiyon sa dakong estadyum sa Jakarta. Halos 4,000 ka igsoon ug mga interesado ang nanambong, ug 125 ang sekretong nabawtismohan sa wala pa magsugod ang programa. Sa ulahi, dili na kaayo estrikto ang pagdili. Ang mga igsoon nakapahigayon nag mas dagkong kombensiyon, ug usa niana gitambongan ug kapig 15,000.

 Pagtukod ug Sangang Buhatan Panahon sa Pagdili

Sa mga tuig sa 1980 ug 1990, ang sangang buhatan balikbalik nga mipetisyon nga tangtangon ang pagdili sa mga Saksi ni Jehova. Ang mga igsoon sa ubang nasod misulat sab sa gobyerno sa Indonesia ug sa mga embahador, nga nangutana kon nganong gidili ang mga Saksi. Daghang opisyal ang pabor nga tangtangon ang pagdili, pero pirme kanang babagan sa gamhanang Directorate General of Christian Community Guidance.

Pagka-1990, nakahunahuna ang mga igsoon nga basin puwedeng magtukod ug bag-ong sangang buhatan diha sa di kadudahang lugar. Nianang tuiga, giaprobahan sa Nagamandong Lawas ang pagpalit ug lote duol sa Bogor—gamayng siyudad nga mga 40 kilometros habagatan sa Jakarta. Pero pipila ra ka igsoon ang hanas sa konstruksiyon. Unsaon nila pagtukod ang bag-ong pasilidad?

Gitabangan sila sa mga igsoon sa laing nasod. Ang Brooklyn Construction Office ug Regional Engineering Office sa Australia ang nagtaganag plano sa konstruksiyon. Mga 100 ka hanas nga boluntaryo gikan sa laing nasod ang mitabang sulod sa duha ka tuig nga proyekto.

Si Hosea Mansur, Indonesian nga brader nga maoy tigkontak sa lokal nga opisyales, miingon: “Dihang makita sa Muslim nga opisyales ang mga letrang H.M. diha sa akong hard hat, nagtuo sila nga ang H nagkahulogang ‘Hājjī,’ usa ka tinahod nga titulo para niadtong nakaadto nag Mecca. Busa gitahod ko nila pag-ayo. Tungod niini, mas dali ang pag-asikaso sa trabaho.”

Kini nga sangang buhatan gitukod panahon sa pagdili

Gidedikar ang bag-ong pasilidad niadtong Hulyo 19, 1996. Ang membro sa Nagamandong Lawas nga si John Barr ang mihatag sa pakigpulong sa dedikasyon. Gitambongan kinig 285, apil niini ang 118 ka Bethelite, espesyal payunir, mga misyonaryo gikan sa lainlaing nasod,  ug 59 ka Bethelite sa Indonesia. Duha ka adlaw human sa dedikasyon, gipahigayon sa Jakarta ang “Mga Mensahero sa Diyosnong Pakigdait” Distritong Kombensiyon, ug 8,793 ang mitambong.

Si Jehova Nagluwas sa Iyang Katawhan

Pagka-1998, nanaog sa puwesto ang dugay nang presidente sa Indonesia nga si Soeharto (Suharto). Tungod niana, natukod ang bag-ong gobyerno. Sa laing bahin, ang mga igsoon naningkamot pag-ayo nga matangtang ang pagdili sa buluhaton.

Niadtong 2001, mibisita sa New York ang Secretary of State sa Indonesia nga si Mr. Djohan Effendi. Nag-tour siya sa Brooklyn Bethel ug nakigkita sa tulo ka membro  sa Nagamandong Lawas. Nakadayeg kaayo siya sa iyang nakita ug sa maayong reputasyon sa mga Saksi ni Jehova sa tibuok kalibotan. Pabor si Mr. Effendi nga tangtangon ang pagdili, pero miingon siya nga ang modesisyon niini mao ang attorney general sa Indonesia, si Mr. Marzuki Darusman.

Pabor sab ang attorney general nga tangtangon ang pagdili, pero gilangaylangay kini sa supakerong opisyales sa iyang departamento kay gusto nilang mapulihan siya sa puwesto. Sa kataposan, pagka-Hunyo 1, 2001, gipatawag si Tagor Hutasoit sa opisina sa attorney general. “Niana nga opisina, mga 25 na ka tuig ang milabay, gitunolan kog dokumento nga nag-ingong gidili ang mga Saksi ni Jehova,” nahinumdom si Tagor. “Pero nianang adlawa, sa kataposang adlaw sa attorney general sa iyang puwesto, gitunol niya ang dokumento nga nagtangtang sa pagdili.”

Pagka-Marso 22, 2002, rehistrado na sa Department of Religious Affairs ang organisasyon sa mga Saksi ni Jehova sa Indonesia. Giingnan sa direktor sa maong departamento ang mga representante sa sangang buhatan: “Kini nga dokumento sa pagrehistro wala maghatag ninyog kagawasan sa pagsimba. Kana nga kagawasan naggikan sa Diyos. Ang dokumento nag-ingon lang nga opisyal nang giila sa gobyerno ang inyong relihiyon. Duna na moy katungod sama sa ubang relihiyon, ug ang gobyerno andam moserbisyo ninyo.”