Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

2016 Tinuig nga Basahon sa mga Saksi ni Jehova

 INDONESIA

Nagkauban ra Gyod!

Sumala sa giasoy ni Linda ug Sally Ong

Nagkauban ra Gyod!

Linda: Niadtong 12 anyos ko, miingon si Mama nga naa koy manghod nga babaye nga ilang gipasagop. Naghunahuna ko kon amang ba siya parehas nako. Nagdako ko nga wala makaila niya.

Sally: Wala gyod koy kalibotan nga sinagop diay ko. Mangtas kog “inahan” kay kulatahon ko niya ug gitratar nga morag sulugoon, maong maguol ko pirme—lisod kaayo ilabina kay gipanganak ko nga amang. Dayon nasangyawan kog Saksi ni Jehova ug nagsugod kog tuon sa Bibliya. Pagkahibalo sa akong “inahan” iya kong gilatos ug giilisan ang kandado sa pultahan, ug gikulong ko sa balay. Milayas ko pag-edad nakog 20 ug gisagop ko sa mga Saksi. Gibawtismohan ko sa 2012.

 Linda: Sa nag-edad kog 20, nagsugod kog tuon uban sa mga Saksi ni Jehova. Sa ulahi, nagtambongan na ko sa distritong kombensiyon sa Jakarta, diin giinterpret ang programa para sa amang. Daghan kog nahimamat nga amang didto, apil ang dalagang si Sally, nga taga-North Sumatra. Gaan kaayo akong buot niya, ambot ngano.

Sally: Nagkasuod mi ni Linda. Magkamay-ong mi, pero gibalewala ra nako to.

Linda: Niadtong Agosto 2012, usa ka adlaw ayha ko bawtismohi, gibati nako nga gusto kaayo nakong makita akong manghod. Miampo ko kang Jehova ug nagpakiluoy: “Magkita unta mi sa akong manghod kay gusto nako siyang sultihan bahin nimo.” Wala madugay, naay nag-text kang Mama nga nahibalo daw bahin sa akong manghod. Sinugdanan ni sa sunodsunod nga hitabo nga miresulta sa akong pagkontak kang Sally.

Sally: Dihang miingon si Linda nga ako iyang manghod nga dugay na nilang gipangita, miadto dayon ko sa Jakarta aron magkita mi. Paggawas nako sa airport security, nakita nako si Linda—uban ni Papa, Mama, ug usa pa nako ka magulang nga babaye. Nangurog ko ug wala kasabot sa akong gibati. Naggaksanay ug naghagkanay mi—si Mama ang kinadugayang naggakos nako. Nanghilak mi. Dihang naghilak si Papa ug Mama nga nangayog pasaylo kay ila kong gipasagop, samot ming nanghilak ug nagginaksanay.

Linda: Kay lainlain man ang paagi sa pagpadako namo, kinahanglang tun-an namo kon unsaon pagpailin-ilin sa kinaiya ug batasan sa usag usa. Pero bisan pa niana, suod kaayo mi.

Sally: Kauban na mig puyo karon ni Linda ug usa ra pod mig kongregasyon sa sign language sa Jakarta.

Linda: Kapig 20 ka tuig nga wala mi magkauban ni Sally. Nagpasalamat mi kang Jehova nga nagkauban ra gyod mi!