Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

2016 Tinuig nga Basahon sa mga Saksi ni Jehova

 INDONESIA

Nadugangan ang mga Misyonaryo

Nadugangan ang mga Misyonaryo

Niadtong Hulyo 9, 1964, opisyal nga girehistro sa Indonesian Department of Justice ang Bible Students Association, usa ka legal nga korporasyon nga gigamit sa mga Saksi ni Jehova. Pero, aron mabatonan sa mga igsoon ang bug-os nga kagawasan sa pagsimba, kinahanglang magparehistro sab sila sa Department of Religious Affairs. Kini nga ahensiya sa gobyerno kanunayng mokonsulta sa Directorate General of Christian Community Guidance, kansang mga membro maoy debotadong mga Protestante nga supak kaayo sa mga Saksi.

Usa ka higayon niana, naestorya sa brader ang usa ka taas ug ranggo nga opisyal nga direktang nagtrabaho ubos sa direktor sa Department of Religious Affairs. Ilang nasayran nga parehas ang ilang gigikanan, maong bibo kaayo silang nag-estoryahanay gamit ang ilang pinulongan. Gisuginlan sa brader ang opisyal nga gilisodlisod sila sa Directorate General of Christian Community Guidance. Busa gihikay sa opisyal nga direktang  maestorya sa tulo ka brader ang direktor, nga usa ka mahigalaon ug buotang Muslim. Pagka-Mayo 11, 1968, ang direktor nagpakanaog ug opisyal nga desisyon nga nag-ila sa mga Saksi ni Jehova ingong relihiyon nga may katungod sa paghimo sa ilang buluhaton sa Indonesia.

Ang maong opisyal misaad sab nga siyay bahala aron dili na moagi sa Directorate General of Christian Community Guidance ang mga misyonaryo sa pagkuhag visa. Sa tabang niining buotang opisyal, 64 ka misyonaryo ang nakasulod sa Indonesia sa misunod nga pipila ka tuig.

Pagka-1968, mga 300 ka misyonaryo ug espesyal payunir ug kapig 1,200 ka magmamantala ang nagsangyaw sa tanang suok sa Indonesia. Gibansay pag-ayo sa mga misyonaryo ang lokal nga mga igsoon. Tungod niini, dali kaayong miuswag ang ilang espirituwalidad. Tayming ang maong pagbansay kay nagsingabot ang paglutos.

“Pinaskohan” Para sa mga Lider sa Relihiyon

Pagka-1974, gipadayon sa Directorate General of Christian Community Guidance ang dugay nang kampanya nga idili ang mga Saksi ni Jehova. Ang pangulong direktor niana nga ahensiya misulat sa tanang regional office sa Department of Religious Affairs nga ilegal kuno ang kalihokan sa mga Saksi. Iyang giawhag ang lokal nga opisyales nga mohimog aksiyon kon tagaan sila sa mga Saksi ug “labad sa ulo.” Gihimo ning pasumangil aron lutoson ang mga alagad ni Jehova. Ang iyang sulat wala panumbalinga sa kadaghanang opisyal. Pero gipahimuslan sa uban ang higayon nga idili ang mga tigom ug pagsangyaw sa balay ug balay.

Sa Disyembre 24, 1976, gibalita diha sa mantalaan nga gidili ang mga Saksi ni Jehova

Nianang panahona, ang World Council of Churches (WCC) nagplano ug internasyonal nga asembliya sa Jakarta. Giisip ni sa lokal nga mga Muslim nga dakong insulto.  Kay nagkainit ang tensiyon sa mga relihiyon, wala idayon sa WCC ang asembliya. Pero nahimong init nga isyu ang pagpangombertir sa Kristiyanidad, ug daghang politiko ang nabalaka. Siyempre, gipahimuslan ni sa mga lider sa relihiyon aron ang mga Saksi ni Jehova ang basolon tungod sa ilang pagsangyaw. Ingong resulta, midaghan ang opisyales nga negatibog panglantaw sa mga Saksi.

Pagka-Disyembre 1975, samtang nagkagrabe ang tensiyon sa relihiyon, gisulong sa Indonesia ang East Timor (Timor-Leste karon), nga sakop kaniadto sa Portugal. Paglabayg pito ka bulan, ang East Timor sakop na sa Indonesia, nga nakasugnod sa nasyonalismo sa mga molupyo. Ang mga igsoon nagpabiling neyutral ug midumili sa pagsundalo o pagsaludo sa bandera. Nakapasuko kini sa taas ug ranggo nga opisyales sa militar. (Mat. 4:10; Juan 18:36) Gipahimuslan sa mga lider sa relihiyon ang kahimtang. Ilang giinsistir nga mohimog aksiyon ang gobyerno kontra sa mga Saksi. Sa ulahi, sa tungatungang bahin sa Disyembre 1976, nadawat sa mga lider sa relihiyon ang ilang “pinaskohan”—gipahibalo sa gobyerno nga gidili na ang mga Saksi ni Jehova.