Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

2016 Tinuig nga Basahon sa mga Saksi ni Jehova

Asembliya panahon sa pagdili diin ang ubang mamiminaw nanglingkod sa lansa

 INDONESIA

Determinadong Magpadayon

Determinadong Magpadayon

Dihang nahibaloan sa sangang buhatan ang pagdili, sila mihimo dayog aksiyon. “Among gitagoan ang mga rekord, literatura, ug pondo sa sangang buhatan diha sa sekretong mga lokasyon sa Jakarta,” miingon si Ronald Jacka. “Dayon gibalhin namo ang sangang buhatan sa sekretong lokasyon ug gibaligya ang kanhing pasilidad.”

Kadaghanan sa mga igsoon nagpabiling aktibo ug wala mahadlok. Nakalahutay sila sa grabeng mga pagsulay hangtod nga gidili ang buluhaton, ug wala molubad ang ilang pagsalig kang Jehova. Pero ang ubang igsoon mikompromiso. Dihay mga ansiyano nga nahadlok ug mipirma sa dokumento nga nag-ingong dili na sila mosangyaw. Ang uban mitug-an kon kinsay mga membro sa kongregasyon. Ang sangang buhatan nagpadalag hamtong nga mga brader aron palig-onon ang mga kongregasyon ug tabangan kadtong mikompromiso. Ang membro sa Nagamandong Lawas nga si John Booth mibisita sab sa Indonesia ug naghatag ug inamahang tambag.

Klaro nga si Jehova, ang Dakong Magbalantay, nagpalig-on ug naghupay sa iyang katawhan. (Ezeq. 34:15) Tungod niana, ang mga ansiyano nagkugi pa sa pagpanguna. Ang mga igsoon sab nakahunahunag bag-o ug mataktikanhong paagi sa pagsangyaw. (Mat. 10:16) Daghang igsoon ang namalit ug nagtanyag sa moderno ug baratong Bibliya sa Indonesian Bible Society. Mataktikanhon sab silang nagpaambit sa mensahe sa Gingharian. Gitangtang sa uban ang copyright page sa atong publikasyon ug gitanyag kini ngadto sa mga interesado.  Daghang payunir padayong nagsangyaw sa balay ug balay nga kunohay mga ahente, sama sa gihimo sa mga igsoon kaniadto panahon sa Hapon.

Si Margarete ug Norbert Häusler

Dayon pagka-1977, grabe na sab ang gihimo sa Department of Religious Affairs—wala nila tugti nga mag-renew ug visa ang mga misyonaryo sa mga Saksi ni Jehova. Daghan sa maong mga misyonaryo gibalhin sa ubang nasod. * “Daghan kaayong igsoon ang nangadto sa airport aron manamilit,” nahinumdom si Norbert Häusler, nga naasayn sa Manado, North Sulawesi uban sa iyang asawang si Margarete. “Pagsaka namo sa hagdan, mihunong  mi kadiyot. Paglingi namo, among nakita ang mga kamot sa mga igsoon nga nagbabay ug naglanoglanog ang ilang tingog: ‘Salamat. Salamat kaayo sa inyong pag-anhi.’ Pagsulod namo sa eroplano, nanghilak mi.”

Paglutos sa Sumba

Kay nabaniog sa lainlaing isla ang pagdili, giingnan sa Indonesian Communion of Churches ang ilang mga membro nga mosumbong sa awtoridad kon makamatikod silag kalihokan sa mga Saksi. Tungod niini, sunodsunod ang pagdakop ug pagsukitsukit diha sa mga isla.

Sa Waingapu, sa isla sa Sumba, gipatawag sa district commander ang 23 ka brader ngadto sa kampo sa militar ug gipapirma ug dokumento nga dili na mag-Saksi. Wala sila mopirma, maong giingnan silang mobalik sa kampo pagkaugma—14 kilometros tanan padulong ug pauli nga nagbaklay.

Pagkaugma, sayo sila nangabot sa kampo, ug giusa-usag tawag aron papirmahon sa dokumento. Ang dili mopirma pusposan ug sanga nga tunokon. Grabe ang pagpangulata kay gipanguyapan tawon ang mga brader. Ang ubang brader naghulat pod sa ilang turno. Sa ulahi, ang batan-ong brader nga si Mone Kele miboluntaryo nga mosulat sa dokumento. Nahugno pag-ayo ang mga brader, pero puwerte pong sukoa sa komander. Si Mone misulat, “Saksi ni Jehova ko hangtod sa hangtod!” Siya gikulata pag-ayo hangtod nga naospital, pero wala gyod matarog iyang integridad.

Sulod sa 11 ka adlaw, ang komander nangitag paagi aron mokompromiso ang mga igsoon. Tibuok adlaw niya silang gibulad sa naglagiting nga kainit. Gipakamang silag pila ka kilometro, unya gipadagan ug layo samtang nagpas-an ug bug-at. Gitionan silag bayoneta sa liog ug gisugo sa pagsaludo sa bandera. Kay wala  man mokompromiso, gipakulata pa silag samot.

Kada buntag, ang mga brader maglakaw padulong sa kampo nga maghunahuna kon unsa na pong klase sa pag-antos ang nagpaabot nila. Padulong sa kampo, sila mag-usag ampo ug magdinasigay sa pagpabiling maunongon. Kada gabii, mouli sila nga bun-og ug nagkadugo pero malipayon kay nakapabiling matinumanon kang Jehova.

Dihang nahibaloan sa sangang buhatan nga gimaltratar ang mga brader, mireklamo sila pinaagi sa pagpadala dayon ug telegrama ngadto sa komander sa Waingapu, regional commander sa Timor, divisional commander sa Bali, kinalabwang komander sa Jakarta, ug sa ubang importanteng ahensiya sa gobyerno. Kay nahibaloan sa tibuok Indonesia ang maong pagmaltratar, ang komander sa Waingapu naulaw ug wala na niya lutosa ang mga igsoon.

“Ang mga Saksi ni Jehova Morag Lansang”

Sa misunod nga mga tuig, daghang Saksi sa Indonesia ang gipriso, gisukitsukit, ug gikulata. “Dihay lugar nga nangapangag ang mga brader tungod sa pagkulata kanila,” miingon ang misyonaryong si Bill Perrie. “Kon naay brader nga kompletog ngipon, magpasiaw sila: ‘Bag-ohan ka o nikompromiso?’ Bisan pa sa mga paglutos, wala gyod mawala ang ilang kalipay o kakugi sa pag-alagad kang Jehova.”

“Tungod sa akong pagkapriso nakakat-on ko nga mas mosalig kang Jehova, ug kini pa hinuon ang nakapalig-on nako sa espirituwal”

Dihay higayon nga sulod sa 13 ka tuig, 93 ka Saksi ang gisentensiyahan nga mapriso sulod sa duha ka bulan  ngadto sa upat ka tuig. Kini nga eksperyensiya nakapalig-on hinuon sa ilang determinasyon nga magpabiling maunongon kang Jehova. Human mapriso sa walo ka bulan, giduaw ni Musa Rade ang mga igsoon sa iyang lugar aron dasigon nga magpadayon sa pagsangyaw. Siya miingon, “Tungod sa akong pagkapriso nakakat-on ko nga mas mosalig kang Jehova, ug kini pa hinuon ang nakapalig-on nako sa espirituwal.” Bantog ra nga ang uban miingon: “Ang mga Saksi ni Jehova morag lansang. Kon sige nimo silang dukdokon, mas lisod silang ibton.”

Mga igsoon nga manangyaw sa Ambon, Maluku

^ par. 1 Wala ra pahawaa sa Indonesia ang karaang mga misyonaryo nga si Peter Vanderhaegen ug Len Davis kay sila kapin nag 60 anyos. Wala pod pahawaa si Marian Tambunan (Stoove kaniadto) kay naminyog Indonesian. Silang tulo aktibo ug mabungahon sa pag-alagad panahon sa pagdili.