Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

2015 Tinuig nga Basahon sa mga Saksi ni Jehova

Sulat Gikan sa Nagamandong Lawas

Sulat Gikan sa Nagamandong Lawas

Minahal nga mga Igsoon:

“Kami nagpasalamat kanunay sa Diyos sa dihang kami naghisgot kaninyong tanan sa among mga pag-ampo, kay kami walay-hunong nga nahinumdom sa inyong buhat sa pagtuo ug sa inyong mahigugmaong paghago ug sa inyong pag-antos tungod sa inyong paglaom diha sa atong Ginoong Jesu-Kristo atubangan sa atong Diyos ug Amahan.” (1 Tes. 1:2, 3) Mao gyod kanay among gibati para ninyo! Kami mapasalamaton kang Jehova tungod kaninyo ug sa inyong maayong mga buhat. Ngano?

Sa miaging tuig, kamo puliki sa mga “buhat sa pagtuo” ug ‘mahigugmaong naghago’ sa mga buluhaton sa Gingharian. Daghan kaninyo ang nangitag paagi sa pagpauswag sa inyong ministeryo. Ang pipila mibalhin sa laing lugar, o nasod, diin may dakong panginahanglan sa mga magwawali. Ang uban nagpauswag sa ilang ministeryo pinaagi sa pagpakigbahin sa publikong pagsangyaw. Daghan ang nadasig nga mag-oksilyare payunir panahon sa Memoryal, sa duaw sa circuit overseer, o panahon sa espesyal nga kampanya niadtong Agosto 2014. Lainlain ang inyong kahimtang, pero bug-os kalag mong nag-alagad kang Jehova. Gipabilhan gyod namo kini. (Col. 3:23, 24) Mapasalamaton gyod mi kang Jehova tungod sa inyong mga “buhat sa pagtuo”!

Gipabilhan sab namo pag-ayo ang inyong “mahigugmaong paghago” para sa tibuok kalibotang pagpanukod sa lainlaing pasilidad sa organisasyon. Gikinahanglan  kaayo nato kini nga mga pasilidad, ilabina kay nagkadaghan ang katawhan ni Jehova. (Isa. 60:22) Hunahunaa lang, ang atong kinatas-ang ihap sa magmamantala sa miaging tuig maoy 8,201,545, samtang ang gidaghanon sa mga Bible study nag-aberids ug 9,499,933 kada bulan. Tungod niini, daghan sa atong mga branch office ang nanginahanglag dugang pasilidad o kinahanglang bag-ohon. Siyempre, nagkinahanglan sab ug dugang mga Kingdom Hall. Duna poy panginahanglan para sa mga remote translation office, aron ang atong mga maghuhubad didto magtrabaho sa mga lugar diin ginasulti ang ilang pinulongan.

Busa, maayong pangutan-on ang kaugalingon, ‘Unsay akong ikatabang sa pagpanukod niini nga mga pasilidad?’ Ang uban tingali makaboluntaryo sa pagpanukod. Ug kitang tanan, hanas man sa pagpanukod o dili, makapribilehiyo sa pagsuportar niini nga mga proyekto pinaagi sa materyal nga mga butang. (Prov. 3:9, 10) Dihang gitukod ang tabernakulo, nadasig kaayo ang mga Israelitas sa paghatag. Gani, kinahanglan silang pahunongon kay sobra na ang ilang gihatag. (Ex. 36:5-7) Seguradong natandog ug nadasig ta sa maong panig-ingnan. Ang inyong “mahigugmaong paghago” niining bahina sa sagradong pag-alagad maoy laing rason nga kami mapasalamaton kang Jehova.

Malipay kaayo ta dihang atong makita ang pagkamalahutayon sa atong mga igsoon. Pananglitan, tagda ang atong mga igsoon sa South Korea. Sukad sa 1950, ang batan-ong mga brader didto gipriso sa lainlaing gidugayon kay dili nila ikompromiso ang ilang neyutralidad. Daghang henerasyon na sa atong mga igsoon ang nakalahutay niining matanga sa pagtratar. Makapalig-on gyod sa pagtuo ang ilang pagkamalahutayon!

 Sa Eritrea, tulo ka brader ang kapig 20 ka tuig nang napriso. Ang uban, apil ang mga sister ug ang ilang mga anak, gihatagag mubong sentensiya. Daghang paningkamot ang ginahimo aron makagawas sila, pero wala pay bisag usa niini ang milampos. Ang atong mga igsoon wala gyod mokompromiso. Sila nagpabiling matinumanon bisan pa sa lisod nga mga kahimtang. Kanunay gyod namo silang ilakip sa among mga pag-ampo.—Roma 1:8, 9.

Hinuon, kadaghanan kaninyo wala mapriso tungod sa pagtuo. Pero daghan kaninyo ang nag-antos tungod sa pagkatigulang, grabeng sakit, pagsupak sa di-magtutuong kapikas o mga paryente, ug sa uban pang personal nga mga problema. Bisan pa niana, kamo padayong nag-alagad nga matinumanon kang Jehova! (Sant. 1:12) Salamat kaayo. Ang inyong paglahutay maoy lain pang rason nga kami mapasalamaton kang Jehova.

Oo, ang inyong mga buhat sa pagtuo, mahigugmaong paghago, ug pagkamalahutayon maoy mga rason nga kami ‘magpasalamat kang Jehova, kay siya maayo.’ (Sal. 106:1) Pinangga kaayo mo namo. Kami nagaampo nga si Jehova maglig-on, magtabang, ug magpanalangin kaninyo aron kamo makaalagad kaniya hangtod sa hangtod.

Inyong mga igsoon,

Nagamandong Lawas sa mga Saksi ni Jehova