Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

2015 Tinuig nga Basahon sa mga Saksi ni Jehova

 PAGSANGYAW UG PAGPANUDLO SA TIBUOK YUTA

Kayutaan sa America

Kayutaan sa America
  • KAYUTAAN 57

  • POPULASYON 980,780,095

  • MAGMAMANTALA 4,034,693

  • PAGTUON SA BIBLIYA 4,339,285

Mga Batang Ilo Mitambong sa mga Tigom

Si Angela, nga nagpuyo sa Suriname, miduaw sa puy-anan sa mga ilo nga duol sa iyang balay. Ang tigdumala sa maong puy-anan maoy usa ka sister nga dili aktibo, ug siya miuyon nga sangyawan ni Angela ang mga bata. Giestorya ni Angela ang 85 ka bata ug gipatan-awg mga video sa jw.org. Sa ngadtongadto, daghan  kanila ang iyang gidumalahan ug Bible study. Duha ka payunir ang mitabang, ug kada usa nila dunay grupong gitudloan. Ang sister nga dili aktibo miingon nga iyang gitudloan ug mga kanta sa songbok ang mga bata ug gibasahan silag mga estorya sa Bibliya magabii. Gusto unta siyang motambong ug tigom, pero dili niya mabiyaan ang 85 ka bata. Busa dunay gihimong mga kahikayan aron makatambong silang tanan. Kay malakaw ra ang Kingdom Hall gikan sa puy-anan, ubanan sila sa mga igsoon paingon sa tigom. Karon, ang sister ug ang 85 ka bata tigtambongan na sa mga tigom.

Gitabangan ni Gabriel ang Iyang Lolo

Paraguay: Si Gabriel nga nakig-estorya sa iyang lolo

Samtang nagbiyahe pauli gikan sa usa ka kombensiyon sa Paraguay, nahunahunaan sa sayis anyos nga si Gabriel kon unsa ka importante ang pagsangyaw. Gusto niyang sangyawan ang iyang lolo aron iya kining makauban sa Paraiso, pero dili interesado ang iyang lolo sa kamatuoran. Supakon pa gani niya ang iyang Saksi nga asawa ug mga anak.

Nianang adlawa, gihangyo ni Gabriel ang iyang ginikanan nga mag-video call sa iyang mga apohan sa Argentina. Giingnan ni Gabriel ang iyang lolo nga importante ang pagtuon sa Bibliya, ug siya nangutana, “Lo, gusto kang magtuon ta?” Misugot ang iyang lolo. Gisugyot ni Gabriel nga gamiton nila ang brosyur nga Pamati sa Diyos ug Mabuhi Ka sa Walay Kataposan. Ila kining gitun-an sulod sa pipila ka bulan. Kay parehas silang maglisod ug basa, mag-iyahay silag praktis. Kon eskedyul na sa ilang pagtuon, si Gabriel magkorbata ug mangandam sa ilang tun-an.

 Wala madugay, mibakasyon ang mga apohan ni Gabriel sa ilang balay sulod sa pipila ka semana. Anang panahona, ang iyang lolo mokuyog ug tambong sa mga tigom. Pag-uli sa Argentina, gipadayon sa iyang lolo ang pag-Bible study uban sa usa ka brader, ug siya nahimong dili bawtismadong magmamantala. Karon, ang mga apohan ni Gabriel mag-uban nag ampo kada adlaw. Miuswag sab si Gabriel, ug karon siya dili bawtismadong magmamantala na. Ang iyang lolo nakahukom nang moalagad kang Jehova ug gusto nang magpabawtismo.

‘Dili kay Natayming Lang’

Sa Brazil, si Jennifer nanagtag sa tract nga Mabuhi ba Gyod Pag-usab ang mga Patay? Siya nanuktok sa pultahan sa usa ka babaye nga nagdali kay motambong sa lubong sa iyang suod nga amiga. Giingnan siya ni Jennifer nga tayming kaayo kay ang iyang ihatag naghisgot bahin  sa paglaom nga makita pag-usab ang namatay nga mga minahal. Nakalitan ang babaye sa ulohan sa tract, pero iya kining gidawat. Dihang gipangutana siya ni Jennifer kon gusto ba siyang magdalag tract para sa pamilya sa namatay, siya miuyon ug nangayog siyam pa ka tract.

Giduaw pag-usab ni Jennifer ang babaye, ug kini miingon: “Kadtong pag-anhi nimo, nakaingon ko nga dili to kay natayming lang. Gipadala gyod ka sa Diyos aron hupayon ko.” Gipanghatag sa babaye ang tanang tract ug gibasa kinig kusog sa usa ka membro sa pamilya nga maoy naghatag sa sermon para sa patay. Gipasalamatan sa mga nanambong ang babaye tungod sa tract ug sa makapahupay nga mensahe niini. Ang babaye nagpa-Bible study.

Nagsangyaw sa Tap-Tap

Tulo ka Bethelite sa Haiti ang misakay sa mabulokon nga pangpublikong sakyanan nga gitawag ug tap-tap. Sa duha ug tunga ka oras nga biyahe, ilang gisangyawan ang mga pasahero ug nakapahimutang silag 50 ka magasin ug 30 ka tract. Ang usa ka pasahero gibasahan sa Bethelite nga si Gurvitch ug usa ka bahin sa Pagmata! Usa ka batan-on nga ginganlag Pépé namati ug miapil sa panaghisgot. Mihangyo siyang magpa-Bible study, ug nalipay sila kay sakop diay sa teritoryo sa kongregasyon ni Gurvitch ang iyang gipuy-an. Si Pépé nakontak niadtong Enero 2014, ug sukad niadto siya nakatambong na sa halos tanang tigom ug asembliya. Ginasulti niya sa uban ang iyang mga nakat-onan ug naningkamot nga mahimong dili bawtismadong magmamantala.