Laktaw ngadto sa video

Laktaw ngadto sa secondary menu

Laktaw ngadto sa kaundan

Mga Saksi ni Jehova

Cebuano

2015 Tinuig nga Basahon sa mga Saksi ni Jehova

 PAGSANGYAW UG PAGPANUDLO SA TIBUOK YUTA

Asia ug Middle East

Asia ug Middle East
  • KAYUTAAN 48

  • POPULASYON 4,315,759,010

  • MAGMAMANTALA 703,271

  • PAGTUON SA BIBLIYA 732,106

Nangutana Siya kon Puwede Bang Magdalag mga Kauban

Duha ka adlaw una ang Memoryal, usa ka brader sa Indonesia ang mihatag ug imbitasyon sa usa ka parking attendant nga Muslim. Nangutana ang attendant kon puwede ba siyang magdalag kauban bisag usa ra ang iyang imbitasyon. Siyempre miingon ang brader nga puwede. Ang parking attendant miingon  nga dako ang iyang pamilya maong nangayo siyag dugang nga imbitasyon. Gihatagan siya sa brader ug 20 ka imbitasyon ug giingnan nga para kadto sa Memoryal sa kamatayon ni Jesus ug imbitado ang tanan, Kristiyano man o Muslim. Siya miingon nga mga 60 ngadto sa 70 ang iyang iuban.

Pagsugod sa pakigpulong sa Memoryal, diha nay 248 nga nanambong. Taudtaod, ang parking attendant miabot uban ang 100 ka tawo—mga lalaki, babaye, bata, hasta mga tigulang ug usa ka babaye nga hapit nang manganak. Nag-abang silag mga sakyanan paingon sa hotel diin gipahigayon ang Memoryal. Dihang nakita sila sa mga guwardiya sa hotel, wala sila pasudla. Natingala ang mga guwardiya kon nganong daghan kaayong Muslim ang gustong motambong sa okasyon sa mga Kristiyano. Pero, dihang gipakita nila ang ilang imbitasyon sa Memoryal, giubanan sila sa mga guwardiya pasulod sa awditoryum. Mga 60 lang kanila ang gipasulod kay puno na kaayo ang awditoryum.

Paglabay sa pipila ka adlaw, giduaw sa brader ang parking attendant ug gipangutana kon unsay ilang hunahuna sa programa. Siya miangkon nga naulaw silang motambong, pero nakadayeg kaayo sila kay gitagad silag maayo ug gilamano sa mga igsoon human sa programa. Dayon gidapit siya sa brader para sa espesyal nga pakigpulong pagkasunod Dominggo. Nianang adlawa, mga 40 niya ka paryente ug silingan ang mikuyog. Hapit nang mahuman ang tigom pag-abot nila, busa nakadesisyon ang mga ansiyano nga usbon ang  pakigpulong. Gipahibalo pag-usab sa tsirman ang tema sa pakigpulong ug gipatin-aw kadiyot ang programa, apil ang awit ug pag-ampo. Aron matabangan sila, migamit ang mamumulong ug mga terminong pamilyar sa mga Muslim, sama sa “Balaang Basahon” imbes “Bibliya” ug “propeta Isa” imbes “Jesus.”

Sa ulahi, usa ka ansiyano ang miduaw sa balay sa parking attendant ug nasugdan ang panaghisgot sa Bibliya gamit ang brosyur nga Pamati sa Diyos. Dihay 12 nga miapil sa panaghisgot, lakip ang pipila ka Muslim nga babaye ug mga bata.

Mga Basahon Para sa mga Bus

Mongolia: Human mananghid, ang mga magmamantala nagbutang ug literatura para sa mga pasahero

Ang mga bus nga gikan sa Ulaanbaatar, Mongolia, mobiyahe sa tanang bahin sa nasod. Kining mga biyahea usahay mokabat ug 48 ka oras. Ang mga pasahero sagad motan-aw lang sa bentana o matulog. Walay gitaganang basahon bisag hilig mobasa ang mga Mongolian. Tungod niini, giduol sa pipila ka igsoon sa kongregasyon sa Songinokhairkhan ang mga drayber sa bus ug miingon: “Naa miy ihatag nga libro para ninyo. Sa mga eroplano, naay itagana nga mga basahon para sa mga pasahero. Kon paminaw ninyo ganahang mobasa ang inyong mga pasahero, puwede pod ming magbutang ug mga basahon diha sa mga bulsa sa lingkoranan.” Walo ka drayber ang misugot. Ingong resulta, ang mga igsoon nakapahimutang ug 299 ka magasin ug 144 ka brosyur. Nakigsabot sab sila nga pulihan ang mga magasin kon dunay bag-ong gula.

 Nasaypan

Sa usa ka nasod sa Asia, duha ka ansiyano ang giasayn sa pagduaw sa sister nga walo ka tuig nang dili aktibo. Wala pa nila makita sukad ang sister, maong gitawagan nila siya ug nagsabot silang magkita sa iyang tindahan diha sa dakong merkado nga namaligyag binulto. Human maglibotlibot sa makalibog nga mga agianan, nakit-an ra gyod nila ang tindahan nga parehas sa adres sa sister. Pagsulod nila, gitimbaya sila sa babaye ug ilang nakita nga may gamayng Bibliya sa iyang lamesita. Human mangutana sa iyang apelyido, probinsiya, ug edad sa iyang duha ka anak, nakahinapos ang mga brader nga siya mao ang ilang gipangita. “Saksi ni Jehova mi, mga igsoon mi nimo,” matod nila.

“Kristiyano man ko,” mitubag ang babaye nga morag natingala. Nahibulong sab ang mga brader sa iyang reaksiyon. Bisan pa niana, gihatagan nila siyag pipila ka literatura sa Bibliya, ug mapasalamaton kaayo siya. Pagbiya sa mga brader, ilang nahibaloan nga dili diay mao nga tindahan ang ilang giadto! Ang tindahan nga numero 2202 unta ang ilang adtoon, pero sa 2200 sila misulod. Usa sa mga brader miingon: “Nanglimbawot akong balhibo kay morag gigiyahan gyod mi sa mga manulonda nga moadto sa maong tindahan. Ang babaye ug ang sister parehas ug apelyido ug probinsiya. Halos parehas sab ug edad ang ilang mga anak! Kon lahi pa untag apelyido o probinsiya ang babaye, mahibalo dayon mi  nga dili siya ang among gipangita.” Sa unahan, sa ikatulong tindahan gikan sa tindahan sa babaye, tua didto ang dili aktibong sister nga naghulat nila.

“Natandog kaayo ko kay bisag dugay na kaayo kong dili aktibo, wala gyod ko kalimti ni Jehova”

Ingong resulta niining wala tuyoa nga pagduaw, ang babaye nasugdag Bible study ug nagtambongan na sa mga tigom. Ang dili aktibong sister nagsugod ug tambong sa tanang tigom ug regular nang mosangyaw. Siya miingon, “Natandog kaayo ko kay bisag dugay na kaayo kong dili aktibo, wala gyod ko kalimti ni Jehova.”

Mag-text kon Dili Maayo ang Panahon

Pilipinas: Si Greg nga nag-text

Si Greg ug Alma mibalhin sa isla sa Catanduanes sa Pilipinas diin dunay dakong panginahanglan sa magmamantala. Bukiron ang pipila ka bahin sa Catanduanes, maong si Greg ug Alma mobaktas ug 19 kilometros aron maabot ang ubang teritoryo. Usahay, mga duha ka oras silang magbangka aron makasangyaw sa ubang isla. Kon ting-ulan, dili sila makaadto sa ilang teritoryo. Imbes magtuk-ong ra sa balay, nakahunahuna silang pahimuslan ang promo nga unlimited text.

Si Greg miingon nga sugdan niya ang iyang text message pinaagi sa pagpaila sa iyang ngalan. Dayon siya modugang, “Naa lang koy gustong isulti nga mensahe gikan sa Bibliya.” Usa sa mga teksto nga gamit kaayo niya mao ang Juan 17:3. Human kini makutlo, siya mangutana: Kinsa kaha ang matuod nga Diyos? ug Kinsa si Jesu-Kristo? Dayon iyang dasigon ang iyang giteksan nga mo-reply. Kon motubag, si Greg mo-text ug laing teksto, sama sa Salmo 83:18. Kon mo-reply gihapon, siya mangutana kon puwede ba siyang motawag sa telepono aron ipadayon ang ilang pag-estoryahay. Si Greg ug Alma miingon nga daghan silag naestorya.

 Usa ka babaye nga nakontak nila Greg ug Alma daghag pangutana bahin sa Bibliya, maong dugay silang nagteksanay. Kini miresultag Bible study. Gisulti sab sa babaye ang iyang nakat-onan ngadto sa iyang pag-umangkon ug kauban sa trabaho. Sa ngadtongadto, silang tulo nabawtismohan.