Laktaw ngadto sa video

Laktaw ngadto sa secondary menu

Laktaw ngadto sa kaundan

Mga Saksi ni Jehova

Cebuano

2015 Tinuig nga Basahon sa mga Saksi ni Jehova

 PAGSANGYAW UG PAGPANUDLO SA TIBUOK YUTA

Africa

Africa
  • KAYUTAAN 58

  • POPULASYON 994,839,242

  • MAGMAMANTALA 1,421,375

  • PAGTUON SA BIBLIYA 3,516,524

Gisundan Nila ang Ilang Maestro

Si José maoy usa ka batan-ong payunir nga nagpuyo sa hilit nga bahin sa Luanda, Angola. Maestro siya sa usa ka eskuylahan nga duol sa Kingdom Hall. Gawas nga maayo siyang motudlo, Kristohanon sab siyag kinaiya maong gimahal ug gitahod siya sa iyang 86 ka estudyante. Alas 4:00 sa hapon ang ilang tigom sa midweek, maong tugtan siya nga mobiyag sayo sa trabaho  nianang adlawa. Human sa trabaho, moderetso na siya sa Kingdom Hall.

Ang ubang estudyante ni José natingala kon nganong sayo siyang mobiya ug kon asa siya moadto. Usa ka adlaw niana, gisundan siya sa duha niya ka estudyante ug mitambong sab sila sa tigom. Sa ngadtongadto, laing tulo ka estudyante ang mitambong. Nianang adlawa, naatol nga naay bahin si José sa Tigom sa Pag-alagad. Nabalitaan dayon kini sa klase. Sa misunod nga mga semana, midaghan ang mga estudyanteng tigtambongan, gikan sa 5 ngadto sa 21. Gitanyagan silag Bible study sa mga igsoon sa Kingdom Hall ug daghan ang midawat. Dihang nagdala silag mga publikasyon sa eskuylahan, ang uban nainteres ug nanambong. Sa hapit nang mahuman ang tingklase, 54 sa 86 ka estudyante ni José ang nakatambong nag tigom. Siya miingon nga 23 kanila ang padayong nag-uswag sa espirituwal ug nagtambongan gihapon.

Gamay ang Teritoryo?

Nigeria: Si Joseph ug Evezi nga naggamit ug DVD player sa pagsangyaw

Dihang miabot ang magtiayong espesyal payunir nga si Joseph ug Evezi sa ilang asaynment sa Nigeria, giingnan sila sa nahigawad nga mga igsoon: “Gamay ra among teritoryo ug bun-og na kaayo sa sige namog balikbalik.” Human sa usa ka tuig, si Joseph misulat sa branch: “Adlaw-adlaw ming mosangyaw sa teritoryo ug anam-anam namong nakuha ang interes sa mga tawo. Magdala mig portable DVD player aron ipatan-aw ang mga video ngadto sa mga bata, tin-edyer, ug tigulang.  Ang resulta: Ako ug ang akong asawa nagdumala nag 18 ka Bible study kada bulan, ug usahay dili na namo sila maato ug duaw. Sige sab ug hangyo ang mga bata nga motan-awg video ni Caleb.”

Mga Taga-Isla Nangayog Tabang

Congo (Kinshasa): Nagsangyaw sa usa ka mangingisda

Sa Abril 2014, ang branch office sa Congo (Kinshasa) nakadawat ug makapatandog nga sulat gikan sa usa ka grupo sa mga mangingisda sa Ibinja Island sa Lake Kivu.  Kini nga mga mangingisda kanunayng motabok ngadto sa duol nga mga siyudad para magnegosyo. Kas-a, dihang miadto sila sa siyudad sa Bukavu, ilang nahimamat ang mga Saksi ni Jehova. Gisangyawan sila sa mga Saksi ug gihatagag Bibliya ug literatura.

Nainteres pag-ayo ang mga mangingisda sa ilang nabasa ug ila kining gipaambit sa mga tawo sa isla. Kay daghan ang nainteres, ilang gipabalik sa Bukavu ang usa sa ilang mga kauban aron pangitaon ang mga Saksi ug paadtoon sa Ibinja. Wala niya sila makit-i, maong misulat siya sa branch office: “Palihog, padal-i mig mga Saksi nga motabang namo aron makakat-on sab mi sa Bibliya ug makabaton ug kinabuhing walay kataposan. Kami nay bahala sa ilang sak-anan. Akong ihatag ang akong lote aron tukorag simbahan. Among nakat-onan sa mga teksto sa inyong mga libro nga sayop ang gitudlo sa mga pari ug pastor. Kombinsido ming amo nang nakaplagan ang tinuod nga relihiyon. Daghan kaayo dinhi sa Ibinja ang gustong magpa-Bible study ug mahimong Saksi ni Jehova.”

Gipakita sa sulat nga dunay mga 40 ka interesado sa isla. Kapin sa 18,000 ang populasyon sa Ibinja pero walay Saksi. Dihadiha, ang branch office nagpadalag duha ka espesyal payunir nga kamao sa ilang pinulongan.

Ang Pastor Maminaw na Karon

“Pirme na gyod kong motambong ug Memoryal.” Mao kini ang giingon sa usa ka pastor sa ilado nga Protestanteng simbahan sa South Africa. Unsay nagtukmod niya sa pagtambong sa Memoryal niadtong Abril 2014? Nagsugod ni dihang duha ka brader nga managlahig rasa ang namalaybalay ug nanuktok sa iyang pultahan. Nahibalo sila nga sukad pa sa una, dili  makig-estorya sa mga Saksi ang pastor. Si Adaine, usa sa mga brader, miasoy: “Di mi makatuo kay giablihan sa pastor ang pultahan ug gipadayon mi. Taas among panaghisgot. Nahingangha siya nga makakitag puti nga nagsangyaw sa mga itom, ug nakigsulti pa gyod niya sa lokal nga pinulongan. Ang pastor nahimong regular nga Bible study.”

Si Adaine mipadayon: “Kapig 40 ka tuig nang misyonaryo ug pastor ning tawhana pero diha pa niya nakaplagan ang tubag sa iyang mga pangutana sa edad nga 80. Ganahan kaayo siya sa librong Sundoga ang Ilang Pagtuo. Dihang magtuon mi, iyang timan-an ang mga punto ug gamiton kini sa iyang mga wali sa simbahan. Gipakita niya sa iyang mga sakop ang librong Unsay Tinuod nga Gitudlo sa Bibliya? ug giingnan sila, ‘Kon duawon mo sa mga Saksi nga magdala ani nga libro, pasudla sila ug paminaw sa ilang isulti kay kining libroha punog espirituwal nga mga bahandi.’”

Ang pastor miingon kang Adaine nga gikasab-an siyag maayo sa mga lider sa iyang simbahan ug giingnan nga dili na maghisgot bahin sa mga Saksi ni Jehova diha sa iyang mga wali. Naglibog ang pastor kon unsay iyang himoon. Nahinumdoman ni Adaine ang asoy bahin sa Katolikong magwawali sa Myanmar diha sa 2013 Tinuig nga Basahon sa mga Saksi ni Jehova. Dihang gibasa kini ni Adaine kaniya, ang pastor nakaingon: “Mora man nig ako! Kinahanglan na gyod kong modesisyon. Dili na ni puwedeng unyaunyaon.”

Sa unang higayon, ang pastor mitambong sa Memoryal sa Abril 14, 2014, ug nakaingon nga pirme na gyod  siyang motambong ug Memoryal. Determinado siyang biyaan ang bakak nga relihiyon.

Nangita Diha sa Kakawan

Ghana: Si Baffour ug Aaron nga nagsangyaw sa kakawan

Si Baffour ug Aaron nag-alagad ingong espesyal payunir sa Bokabo, usa ka rehiyon sa kasadpang Ghana nga daghag kakawan. Dako ang ilang teritoryo ug lagyo pa gyod ang mga balay. Kinahanglan silang magsuotsuot sa kakawan aron maadto ning mga balaya ug dali rang masaag kon masayop kag liko. Usa ka adlaw niana, imbes moagi sa ilang naandang dalan, lahi ang giagian ni Baffour ug Aaron. Nakaabot sila sa mga balay nga wala pa gyod nila maadtoi sukad. Didto ilang nahimamat si Michael ug Patience nga nagpakitag interes ug nagpa-Bible study. Wala madugay, si Michael miingon: “Duha ka tuig na ming way simbasimba kay daghag pagtulon-an ang simbahan nga wala sa Bibliya. Sukad niadto, kada gabii na namong tun-an ni Patience ang Bibliya aron mangitag tubag sa among mga pangutana. Kanunay ming mag-ampo nga makaplagan unta namo ang kamatuoran.” Bisan pag layo kaayo ang ilang baktason agi sa kakawan, misugod dayon silag tambong sa mga tigom. Sa miaging tuig, ang magtiayon nabawtismohan ug nianang tuiga sab sila nagregular payunir. Karon sila na pod ang nagsuotsuot sa kakawan aron pangitaon ang mga nag-ampo nga makaplagan ang kamatuoran.

Si Michael ug Patience nga nagbaktas agi sa kakawan