Laktaw ngadto sa video

Laktaw ngadto sa secondary menu

Laktaw ngadto sa kaundan

Mga Saksi ni Jehova

Cebuano

2015 Tinuig nga Basahon sa mga Saksi ni Jehova

 MAKAIIKAG NGA REPORT SA MIAGING TUIG

Mga Balita Gikan sa Lainlaing Nasod

Mga Balita Gikan sa Lainlaing Nasod

Gipaambit Nila ang Ilang Gi-download

Bisag dili tanang tawo sa Cuba ang may Internet, puwede silang maka-access niini diha sa mga shop nga gipanag-iya sa kompaniya sa telepono. Pero mahal kaayo ang mag-Internet. Busa aron makabenepisyo ang mga igsoon sa jw.org, gidasig sa branch ang matag kongregasyon nga mag-asayn ug usa ka magmamantala nga mag-download ug mga publikasyon, rekording, ug mga video sa Web site dayon ipaambit kini sa mga igsoon sa ilang kongregasyon. Daghan ang nakabenepisyo niini nga kahikayan.

 Giuna ang Kingdom Hall kay sa Cellphone

Ang 10 anyos nga si Teona ug iyang otso anyos nga igsoong si Tamuna nagpuyo sa Republic of Georgia. Gusto silag cellphone. Busa aron makapalit sila, ang ilang lola misaad nga hatagan silag kuwarta kada bulan gikan sa iyang pensiyon. Ikasubo, namatay ang ilang lola. Bisan pa niana, gihatag sa ilang ginikanan ang pensiyon sa ilang lola aron mapalit nila ang gusto nilang cellphone. Human maghunahuna bahin niini, ang magsoon misulat sa kongregasyon: “Duha na lang ka semana, sugdan na ug tukod ang atong Kingdom Hall diri sa T’erjola. Gusto kaayo ni Lola nga motabang sa pagtukod, pero kay wala na man siya, gusto namong ihatag sa kongregasyon ang kataposan niyang pensiyon imbes ipalit ug cellphone. Palihog tukori mig nindot nga Kingdom Hall!”

Gregong Kasulatan sa Tetum nga Pinulongan

Sa Enero 17, 2014, sa Dili, Timor-Leste, si Geoffrey Jackson sa Nagamandong Lawas nag-release sa Bag-ong Kalibotang Hubad sa Kristohanon Gregong Kasulatan sa Tetum nga pinulongan, nga maoy komon nga gigamit sa nasod. Sa miagi, ang Simbahang Katoliko ray nag-imprenta ug nanagtag sa Gregong Kasulatan sa Tetum nga pinulongan. Dili nila tugtan nga makapalit sa ilang Bibliya ang mga Saksi ni Jehova o kadtong ilang gidudahan nga nagtuon uban sa mga Saksi. Pero ang ilang Bibliya lisod sabton, daghag gitangtang nga pulong, ug daghag sayop sa paghubad ug pag-imprenta. Kon bahin sa Bag-ong Kalibotang Hubad, usa ka misyonaryo sa Timor-Leste nga si Darren miingon: “Daghang taga-Timor-Leste  ang nakadayeg sa katukma sa Bag-ong Kalibotang Hubad, ug mihangyo dayon ug mga kopya. Matod nila sayon kining basahon. Ganahan sila sa dagkong letra ilabina kay kadaghanan sa mga balay hinay ug suga. Daghan sa mga nakadawat ug kopya ang nagpa-Bible study.”

‘Gipabilhan Ko ni Jehova’

Macedonia: Nagsangyaw gamit ang Romany nga mga publikasyon

Sa Enero 2014, dihay hinungdanong hitabo sa buluhatong paghubad sa Romany, nga maoy pinulongan sa Macedonia. Usa ka regular nga team sa maghuhubad ang giporma, ug giaprobahan ang pag-imprenta ug mga publikasyon gamit ang Roman ug Cyrillic nga mga alpabeto. Dako kini nga tabang para niadtong nagsulti ug Romany pero naanad ug gamit ug Cyrillic, nga maoy opisyal nga alpabeto sa Macedonia.

Daghang tawo nga nagsultig Romany ang natandog sa paningkamot sa organisasyon ni Jehova nga mag-imprentag literatura sa ilang pinulongan. Usa ka sister  miingon: “Daghang tawo nga lahi ug rasa ang ubos ug panglantaw nako kay nagsulti kog Romany. Pero si Jehova nagpabili nako kay iyang gipaposible nga makadawat kog literatura sa akong pinulongan. Mapasalamaton kaayo ko. Nakatabang ni nako nga mas masuod niya.”

“Si Jehova nagpabili nako kay iyang gipaposible nga makadawat kog literatura sa akong pinulongan”

Bag-ong Tigdumala

Sa Pebrero 1, 2014, ang branch office sa United States nagsugod pagdumala sa teritoryo ug mga kongregasyon sa Jamaica ug Cayman Islands. Talagsaon gayod kini nga panaghiusa sa kapig 1.2 ka milyong magmamantala nga sakop sa branch sa United States! Apil niini ang 50 ka estado sa U.S., Bahamas, Bermuda, British ug U.S. Virgin Islands, Puerto Rico, ug ang Turks and Caicos Islands.

Mga Payunir sa Japan

Ang mga igsoon sa Japan padayong nagmadasigon sa pagpayunir. Gani, ang gidaghanon sa regular payunir niining nasora mao ang ikaupat sa kinadaghanan sa tibuok kalibotan. Sa pagsugod sa 2014 nga tuig sa pag-alagad, may nadugang nga 2,646 ka bag-ong mga payunir, busa ang ilang gidaghanon miabot nag 65,668. Sa Marso 2014, kapig katunga sa tanang magmamantala ang nakigbahin sa pipila ka matang sa payunir nga pag-alagad.