Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

2015 Tinuig nga Basahon sa mga Saksi ni Jehova

 MAKAIIKAG NGA REPORT SA MIAGING TUIG

Lig-on nga Bibliya

Lig-on nga Bibliya

INGONG mga Saksi ni Jehova, kita nagpabili sa Bibliya labaw sa bisan unsang publikasyon. Kita kanunayng nagtuon ug naggamit niini sa pagtudlo sa uban bahin sa maayong balita sa Gingharian sa Diyos. (Mat. 24:14) Busa, gihimo sa atong mga igsoon ang tanang paagi aron maseguro nga nindot ug lig-on ang materyales nga gamiton sa pag-imprenta sa 2013 nga rebisadong Bag-ong Kalibotang Hubad sa Balaang Kasulatan sa Iningles.

Dihang gikonsulta sa mga igsoon sa imprentahan sa Wallkill, New York, U.S.A. ang presidente sa usa ka bookbinding company bahin sa giplanong disenyo sa Bibliya, siya miingon, “Walay ingon niana nga Bibliya.” Siya  midugang, “Sa tinuod lang, kasagaran sa mga Bibliya nindot tan-awon pero dili durable.”

Ang pipila sa unang mga edisyon sa Bag-ong Kalibotang Hubad dili kaayo lig-on. Busa gisusi pag-ayo sa mga igsoon sa imprentahan sa Wallkill ang materyales sama sa papilit, hapin, ug ang paagi sa pag-bind aron makahimog Bibliya nga dili daling madaot bisan pa sa grabeng mga kondisyon. Base sa mga impormasyon nga ilang nakuha, nag-imprenta silag mga sampol nga Bibliya ug gipagamit kana sa mga igsoon sa lainlaing nasod diin ang klima init kaayo o bugnaw kaayo.

Human sa unom ka bulan, ang mga Bibliya gibalik, ug ang mga igsoon sa imprentahan sa Wallkill mihimog kausaban aron mapauswag ang kalidad sa mga Bibliya. Dayon nag-imprenta silag laing mga sampol ug gipadala kana sa mga igsoon. Tanantanan, kapig 1,690 ka sampol nga Bibliya ang naimprenta. Ang pipila niini grabeg naagian. Pananglitan, usa sa mga Bibliya naligsan ug sakyanan, ang usa naulanan tibuok gabii, ug ang lain nahumol sa baha panahon sa bagyo.

Sa 2011, samtang gitestingan pa ang sampol nga mga Bibliya, ang organisasyon mipalit ug high-speed nga mga bindery machine para sa mga imprentahan sa Wallkill ug sa Ebina, Japan. Gawas nga kinahanglang mag-imprentag igong gidaghanon sa Bibliya para sa unang release, kinahanglan nga pareho sab ug dagway ang mga Bibliya nga maimprenta sa duha ka imprentahan.

Molukot nga Hapin

Ang hapin sa unang naimprenta nga mga Bibliya molukot

Sa sayong bahin sa 2012, ang duha ka imprentahan nagsugod pag-imprenta sa 1984 nga edisyon sa Bag-ong Kalibotang Hubad gamit ang pipila ka bag-ong hapin. Pero ang bag-ong mga binding machine migamit ug papilit ug liner sa hapin nga wala pa matestingi. Ang resulta,  molukot ang hapin maong gipahunong ang pag-imprenta.

Miangkon ang tighimo sa usa sa mga materyales nga komon gyod nga problema sa mga tiggamag libro ang paglukot sa humok nga mga hapin, ug wala silay solusyon niini. Pero ang mga igsoon determinado nga makahimog humok, lig-on, ug nindot nga hapin imbes mogamit ug gahi nga hapin. Human sa halos upat ka bulan nga pag-eksperimento, nadiskobrehan ra gyod sa mga igsoon ang saktong kombinasyon sa papilit ug liner. Busa sila nakapadayon sa pag-imprenta ug mga Bibliya nga humok ug hapin pero dili na molukot.

Bindery sa imprentahan sa Wallkill

Ang rebisado nga Bag-ong Kalibotang Hubad gieskedyul nga i-release sa Oktubre 5, 2013, sa tinuig nga miting sa Watch Tower Bible and Tract Society of Pennsylvania. Nadawat sa mga imprentahan ang electronic file sa Biyernes, Agosto 9, 2013, ug gisugdan ang pag-imprenta  pagkasunod adlaw. Ang unang kompleto nga Bibliya naimprenta sa Agosto 15. Sa misunod nga pito ka semana, ang mga igsoon sa imprentahan sa Wallkill ug Ebina nagtrabaho adlaw ug gabii aron maimprenta ug mapadala ang kapin sa 1,600,000 ka Bibliya para sa tanang igsoon nga motambong sa tinuig nga miting.

Gawas nga nindot ug lig-on ang bag-ong Bibliya, ang mensahe niini makaluwas ug kinabuhi. Human madawat sa usa ka sister sa United States ang bag-ong Bibliya, siya misulat, “Tungod niining bag-ong edisyon, mas masabtan na nako karon ang Bibliya.”

Pagkat-og Dugang

Duna bay Kaugalingong Bibliya ang mga Saksi ni Jehova?

Ang paggamit ug lainlaing hubad sa Bibliya makatabang sa imong pagtuon sa Bibliya. May tulo ka rason kon nganong maayong gamiton ang Bag-ong Kalibotang Hubad sa Balaang Kasulatan sa imong pagtuon.

Tukma ba ang New World Translation?

Nganong lahi ang New World Translation sa ubang mga hubad?