Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

2015 Tinuig nga Basahon sa mga Saksi ni Jehova

 MAKAIIKAG NGA REPORT SA MIAGING TUIG

Legal nga Report

Legal nga Report

ARMENIA Programa nga Nagtahod sa Kristohanong Baroganan sa Neyutralidad

Armenia: Ang ubang brader giasayn sa gobyerno sa lagyong bahin sa nasod para sa ilang pagserbisyo sa komunidad. Samtang tua didto, madasigon gihapon silang nakigbahin sa pagsangyaw

Sa 2013, ang gobyerno sa Armenia naghimog programa nga nagtugot sa mga Saksi ni Jehova nga moserbisyo sa komunidad imbes prisohon tungod sa pagdumili sa pagsundalo. Sa Enero 2014, ang branch mireport nga gisugdan sa 71 ka igsoon ang ilang pagserbisyo. Pananglitan, pipila kanila ang gipatrabaho diha sa kosina sa ospital o ingong katabang sa nars. Ang mga superbisor  sa programa nakadayeg sa mga igsoon tungod sa ilang maayong tinamdan sa trabaho bisan pag kini lisod. Mapasalamaton kaayo ang mga igsoon sa programa nga sila magserbisyo sa komunidad imbes magsundalo. * Usa sa mga brader miingon, “Mapasalamaton mi kang Jehova niini nga programa kay nakatabang ni namo nga makapabiling neyutral ug sa samang higayon naghatag namog kagawasan sa pagsimba kaniya.”

DOMINICAN REPUBLIC Naghatag sa mga Saksi ug Lisensiya nga Mokasal

Sa 1954, ang Dominican Republic ug Vatican mipirmag kasabotan nga naghimo sa Simbahang Katoliko ingong bugtong relihiyon nga puwedeng mokasal. Ang dili magpakasal sa Simbahang Katoliko mahimong kaslon sa usa ka opisyal sa Civil Registry. Pero sa 2010, ang gobyerno naghimog bag-ong balaod nga naghatag ug lisensiya sa kuwalipikadong mga ministro sa ubang relihiyon nga mokasal. Nagpahigayon sila ug seminar para niadtong gustong makakuhag lisensiya sa pagpangasal. Ang branch office sa Dominican Republic nagpadalag 30 ka ansiyano sa seminar. Sa kapig 2,000 nga miaplay, 32 lang ang gihatagag lisensiya, ug ang tanang 30 ka brader nahatagag lisensiya sa pagkasal sa mga Saksi.

 INDIA Determinadong Mosangyaw nga Walay Kahadlok

Si Sundeep ug Deepalakshmi Muniswamy

Sa Enero 27, 2014, ang Karnataka State Human Rights Commission mihukom nga gilapas sa Police Sub-Inspector (PSI) sa Old Hubli Police Station sa Karnataka ang tawhanong katungod ni Brader Sundeep Muniswamy. Wala siya protektahi sa PSI dihang giatake siya sa usa ka grupo sa mga tawo niadtong Hunyo 28, 2011. Ang Commission nagsugo sa lokal  nga gobyerno sa Karnataka nga silotan ang PSI. Gawas niana, gipabayad sab ang PSI ug danyos nga 20,000 rupees ($326 U.S.) ngadto kang Brader Muniswamy. Kuhaon ang maong kantidad gikan sa suweldo sa PSI.

Si Brader Muniswamy ug ang iyang pamilya mapasalamaton kang Jehova tungod niining wala damhang desisyon ug determinado sila nga padayong isangyaw ang maayong balita nga walay kahadlok. Ang desisyon nagpalig-on sab sa pagtuo ug pagsalig sa mga igsoon sa gahom ni Jehova sa pagpanalipod sa iyang katawhan. Dugang pa, kini nakapaamgo sa mga awtoridad nga angayng tahoron ang tawhanong katungod sa mga Saksi ni Jehova sa Karnataka. Ang kaso nga gipasaka batok kang Brader Muniswamy ug sa usa pa ka brader maylabot niini nga insidente wala pa madesisyoni sa korte.

KYRGYZSTAN Ang Constitutional Chamber sa Korte Suprema Naglaban sa Baroganan sa mga Saksi Bahin sa Neyutralidad

Ang Nobyembre 19, 2013 maoy hinungdanong adlaw para niadtong midumili sa pagsundalo tungod sa neyutralidad. Ang Constitutional Chamber sa Korte Suprema mihukom nga dili subay sa balaod ang programa sa Kyrgyzstan para niadtong dili magsundalo, sama sa kaso sa 11 ka Saksi ni Jehova. Sumala sa maong programa, kadtong dili magsundalo kinahanglang mobayad sa militar sa pagsuporta sa mga kalihokan niini. Human sa ilang pagserbisyo sa komunidad, ilista gihapon sila ingong reserbang sundalo. Ang Constitutional Chamber mihukom nga ang ingon niana nga kahikayan naglapas sa relihiyosong kagawasan sa tawo. Busa, sa unang pipila ka bulan sa 2014, gipatuman sa Korte Suprema sa Kyrgyzstan ang desisyon sa Constitutional Chamber ug giabsuwelto ang 14 ka Saksi ni Jehova. Kini nga desisyon nagtapos sa pito ka tuig nga pagpakigbisog nga ilhon ang  baroganan sa mga Saksi bahin sa neyutralidad. Ang ilang determinasyon nagbayaw sa ngalan ni Jehova ug naglaban sa atong kagawasan sa pagsimba sa Kyrgyz Republic.

Kyrgyzstan: Mga Saksi kansang mga kaso gipasaka ngadto sa Korte Suprema sa Kyrgyzstan

NIGERIA “Gigantihan Ko ni Jehova”

Sa Abia State sa Nigeria, ang mga Saksi ni Jehova sagad hulgaon ug hinginlan kay dili sila moapil ug mga asosasyon * sa komunidad kansang kalihokan naglakip ug kapintasan ug espiritismo. Sayo sa buntag sa Nobyembre 2005, ang mga membro sa usa ka asosasyon sa Asaga Ohafia misulong sa balay ni Brader Emmanuel Ogwo ug sa iyang asawa ug gipanguha ang tanan nilang gamit isip buhis bisag wala sila magpamembro. Walay nabilin gawas sa ilang sinina nga gisul-ob.  Sa 2006, si Brader Ogwo gipalayas sa iyang balay ug gipapahawa sa baryo. Siya ug ang iyang asawa gisagop ug giatiman sa usa ka brader sa laing baryo. Bisag nakabalik ra si Brader Ogwo sa iyang balay pagkasunod tuig, wala gihapon siya lung-i sa mga taga-baryo, ug wala sab panumbalinga ang iyang hangyo nga iuli ang iyang mga gamit.

Sa kataposan, sa Abril 15, 2014, ang Hataas nga Korte sa Abia State midesisyon pabor kang Brader Ogwo sa iyang kagawasan sa pagsimba ug sa iyang kagawasan sa pagdesisyon kon magpamembro ba siya sa usa ka asosasyon o dili. Ingong resulta, ang mga gamit ni Brader Ogwo giuli kaniya. Dugang pa, ang mga Saksi wala na kaayo makasinatig pagpihig, ug ang mga igsoon sa Asaga Ohafia gawasnon nang makasangyaw sa komunidad.

Dihang gipahibalo ang desisyon sa korte, si Brader Ogwo miingon: “Nakalukso ko sa kalipay. Para nako, si Jehova ang nakadaog sa kaso. Gipanalipdan ko sa mga manulonda ug gigantihan ko ni Jehova.”

RUSSIA Desisyon sa Korte nga Pabor sa jw.org

Ang daghang kaso nga giatubang sa atong mga igsoon sa Russia “misangpot hinuon sa pagpauswag sa maayong balita” nianang nasora. (Fil. 1:12) Bisan tuod gisupak pag-ayo sa ubang opisyales sa gobyerno ug sa mga lider sa relihiyon, ang atong mga igsoon sa Russia matinumanon gihapong nag-alagad, ug gipanalanginan ni Jehova ang ilang mga paningkamot.

Usa ka pananglitan niana mao ang atong pagdaog sa kaso sa siyudad sa Tver’. Sa 2013, ang piskaliya sa Tver’ nagpasakag kaso diha sa lokal nga korte nga idili ang jw.org sa tibuok Russia. Ang korte midesisyon pabor sa piskaliya nga wala gani magpahibalo sa mga representante sa mga  Saksi ni Jehova nga dihay himoong husay. Dihang nahibaloan sa mga igsoon ang desisyon sa korte, sila miapelar. Sa Enero 22, 2014, gibali sa Regional Court sa Tver’ ang desisyon sa korte. Tungod sa pagpaluyo ni Jehova ug sa pag-ampo sa mga igsoon sa tibuok kalibotan, ang kadaghanan sa atong mga igsoon sa Russia makapahimulos na sa daghang espirituwal nga mga tagana nga makita diha sa jw.org.

TURKEY Wala Gihapon Magtahod sa Baroganan sa mga Saksi Bahin sa Neyutralidad

Si Bariş Görmez, usa ka Saksi ni Jehova sa Turkey, gipriso ug upat ka tuig kay dili siya magsundalo. Diha sa prisohan, gipatiran siya sa mga polis ug gibunalag batuta. Lisod sab ang iyang kahimtang sulod sa selda. Kay siyete ka piye ang gitas-on ni Brader Görmez, dili siya makatulog ug tarong sa katre nga gipagamit kaniya, maong iyang taparon ang duha ka katre ug matulog nga magtikuko. Sa ngadtongadto, miuyon ra ang mga awtoridad nga mogamit siyag mas taas nga higdaanan, nga gihatag sa mga igsoon sa lokal nga kongregasyon.

Sa 2008, si Brader Görmez ug tulo pa ka Saksi miapelar sa European Court of Human Rights. Sila miingon nga gilapas sa Turkey ang ilang relihiyosong kagawasan kay wala niini tahora ang ilang baroganan bahin sa neyutralidad. Sa Hunyo 3, 2014, ang Korte midesisyon pabor sa upat ka Saksi * ug nagsugo sa gobyerno sa Turkey nga bayran ug danyos ang mga brader. Kini ang ikatulong higayon nga ang European Court midesisyon pabor sa mga Saksi ni Jehova batok sa Turkey bahin niini nga isyu. Sa pagkakaron, walay piniriso nga Saksi ni Jehova sa Turkey. Pero kini nga problema dili masulbad gawas kon tahoron sa Turkey ang baroganan sa mga Saksi bahin sa neyutralidad.

 Dugang Impormasyon Bahin sa Miaging Report

Azerbaijan: Ang mga igsoon naglisod gihapon sa pag-alagad kay padayon ang pagbalda sa kapolisan sa ilang mga tigom ug pagdakop kanila samtang nagsangyaw. Gidili sab ang uban nilang literatura ug gilapas ang uban pa nilang tawhanong katungod. Sa pagkakaron, ang gobyerno wala gihapon mosugot nga ang mga Saksi ni Jehova marehistro pag-usab sa Religious Community. Ang mga igsoon 19 ka beses nang miapelar sa European Court of Human Rights batok sa Azerbaijan bahin niini nga mga isyu. Bisan pa niining lisod nga kahimtang, gipanalanginan sila ni Jehova kay nagpadayon ang pagdaghan sa mga magmamantala. Nalipay sab sila sa pag-release sa kompletong Bag-ong Kalibotang Hubad sa Balaang Kasulatan sa pinulongang Azerbaijani.

Eritrea: Ang atong mga igsoon nianang nasora padayong nag-alagad kang Jehova bisan pa sa grabeng paglutos. Ang tulo ka brader nga si Paulos Eyassu, Isaac Mogos, ug Negede Teklemariam, 20 ka tuig na sa prisohan sukad niadtong Septiyembre 24, 1994. Gidakop sa mga awtoridad sa Eritrea ang mga 150 ka Saksi ug mga interesado panahon sa Memoryal niadtong Abril 14, 2014. Ang gipangdakop nag-edad ug kapig usa ka tuig ngadto sa kapig 85 anyos. Panahon sa espesyal nga pakigpulong sa Abril 27, 2014, mga 30 pa ka Saksi ang gidakop. Kadaghanan nila gibuhian na.

Kazakhstan: Katorse sa atong publikasyon ang wala tugoti sa Agency for Religious Affairs nga makasulod o maapod-apod sa teritoryo sa Republic of Kazakhstan. Ang mga igsoon wala sab tugoti nga makasangyaw gawas sa ilang rehistradong mga dapit sa pagsimba. Mga 50 ka igsoon ang gidakop tungod sa ilegal kuno nga misyonaryong kalihokan. Aron mapanalipdan ang ilang kagawasan sa pagsulti, 26 na ka reklamo ang ilang gipasa sa United Nations Human Rights Committee.

^ par. 1 Ang pagdesisyon kon moserbisyo sa komunidad o dili nagdepende sa konsensiya sa usa.

^ par. 1 Ang mga membro niini nga asosasyon sagad mga lalaki nga halos parehog edad nga nagpuyo sa usa ka baryo.

^ par. 2 Buldu and Others v. Turkey, No. 14017/08, Hunyo 3, 2014.

Pagkat-og Dugang