Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

2015 Tinuig nga Basahon sa mga Saksi ni Jehova

 DOMINICAN REPUBLIC

Kinsa ang Ulo?

Kinsa ang Ulo?

‘Putlig Ulo ang Ilang Panag-igsoonay’

Sa Hulyo 13, 1957, si Inspektor Colón misulat sa secretary of state: “Matod sa usa ka panultihon: ‘Kinahanglang ulohon ang bitin aron mamatay.’ Ang maayong himoon aron mawala sa nasod ang sektang Saksi ni Jehova mao ang pagpapahawa sa ilang mga misyonaryo. Kon kanay atong himoon, sama rag atong giputlag ulo ang ilang panag-igsoonay, ug kon walay ulo, dili sila molampos.”

Wala madugay human niana, gipapahawa sa Secretary of Security nga si Arturo Espaillat ang nahibiling napulo ka misyonaryo sa nasod. Sa Hulyo 21, 1957, gisulatan ni Roy Brandt si Trujillo, nga naghangyo sa pagpakigkita kaniya aron ipatin-aw ang ilang kahimtang. Ang usa ka bahin sa sulat miingon, “Ang ginahimo sa ubang tawo nga pagpangdaot sa ngalan ni Jehova nga Diyos maoy sama sa gihimo sa way alamag nga mga tawo ngadto sa mga apostoles ni Jesus.” Dayon, giawhag ni Brader Brandt si Trujillo nga basahon ang Buhat kapitulo 2 hangtod 6 ug miingon, “Ang maayo ug prangkang tambag ni Maghuhukom Gamaliel kaniadto mapadapat gihapon karon.” Gikutlo ni Brader Brandt ang Buhat 5:38, 39 sa dagkong letra: “AYAW HILABTI NING MGA TAWHANA, KAY KON ANG ILANG GINABUHAT GIKAN SA DIYOS, BASIN  INYONG MAKAPLAGAN SA ULAHI NGA KAMO NAKIG-AWAY NA DIAY SA DIYOS.” Pero wala panumbalinga ang iyang hangyo. Sa Agosto 3, 1957, ang mga misyonaryo gidala sa airport ug gipapahawa sa nasod.

‘Si Jesus ang Ulo’

Si Donald Nowills ang nagdumala sa buluhaton sa branch sa edad nga 20

Unsa kahay mahitabo sa mga igsoon karon nga wala na ang mga misyonaryo? Mahisama ba sila sa giingon ni Inspektor Colón nga morag “giputlag ulo”? Pero si Jesus “mao ang ulo sa lawas, ang kongregasyon.” (Col. 1:18) Busa wala mawad-ig ulo ang katawhan ni Jehova sa Dominican Republic. Hinunoa, sila padayong giatiman ni Jehova ug sa iyang organisasyon.

Si Donald Nowills ang giasayn nga magdumala sa buluhaton sa branch human gipapahawa ang mga misyonaryo. Nianang panahona, siya 20 anyos pa lang ug upat ka tuig pang bawtismado. Bisag pipila ka bulan na  siyang nag-alagad ingong circuit overseer, bag-o para niya ang buluhaton sa branch. Si Brader Nowills may gamayng opisina sa iyang balay, nga inaptag sin, gibungbongan ug kahoy, ug yuta ray salog. Kini nahimutang sa Gualey, usa ka peligroso kaayong lugar sa Ciudad Trujillo. Sa tabang ni Félix Marte, siya nag-imprentag mga kopya sa The Watchtower para sa tibuok nasod.

Gi-mimeograph nga Watchtower sa 1958

Panahon sa pagkapriso ni Enrique, ang iyang asawa nga si Mary Glass maoy mitabang kang Brader Nowills. “Mohawa ko sa akong trabahoan sa alas singko sa hapon,” siya miingon, “ug moadto sa opisina ni Brader Nowills aron i-type ang Watchtower. Dayon si Brader Nowills mag-imprentag mga kopya niini pinaagig mimeograph. Human niana, usa ka sister sa Santiago, nga gialyasag ‘anghel,’ ang magbutang sa gi-mimeograph nga mga magasin ilalom sa basiyong taro sa mantika. Sunod, iyang tabonag panapton ang literatura ug  sapawan kinig balanghoy, patatas, o lagutmon, ug iya kanang tabonan ug sako. Dayon mobiyahe siya sa amihanang bahin sa nasod ug magbilig tagsa ka kopya sa matag kongregasyon. Ang mga pamilya magpulihanayg hulam sa maong kopya aron ila kining matun-an.”

“Kinahanglang pirme ming alerto,” miingon si Mary, “kay daghan kaayong mga ahente sa gobyerno ang nangita kon diin giimprenta ang Watchtower. Pero wala gyod sila molampos. Kanunay ming gipanalipdan ni Jehova.”