Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

2015 Tinuig nga Basahon sa mga Saksi ni Jehova

 DOMINICAN REPUBLIC

Ang Simbahang Katoliko ug si Trujillo

Ang Simbahang Katoliko ug si Trujillo

UNSAY relasyon ni Trujillo sa Simbahang Katoliko? Usa ka political analyst miingon: “Sulod sa dugayng pagmando ni Trujillo, 1930-1961, ang Simbahan ug ang estado sa Dominican Republic nagtinabangay; gipaboran sa diktador ang Simbahan ug kini sa baylo nagsuportar sa iyang gobyerno.”

Sa 1954, si Trujillo miadto sa Roma ug mipirmag kasabotan uban sa Papa. Ang kanhing sinaligan ni Trujillo nga si Germán Ornes, miingon: “Kay gisuportahan man sa Simbahan si Trujillo, kini [kasabotan] dako kaayog bentaha ‘sa Pangulo’ [Trujillo]. Ang mga pari nga gipangunahan sa mga arsobispong si Ricardo Pittini ug Octavio Beras, maoy apil sa pangunang mga tigpaluyo sa gobyerno.”

Si Ornes mipadayon: “Sa matag nahiangayng panahon, ang Papa mangomosta kang Trujillo pinaagig telegrama. . . . Sa 1956 nga Congress of Catholic Culture nga gihimo  sa Ciudad Trujillo ug gigastohan [ni Trujillo], ang hawas sa Papa nga si Francis Cardinal Spellman, mipahayag ug mabinationg mensahe. Si Cardinal Spellman, gikan sa New York, mainitong giabiabi mismo ni Generalissimo [Trujillo]. Pagkaugma, ang ilang mahigalaong paggaksanay gidispley diha sa unang panid sa tanang mantalaan sa Dominican Republic.”

Sa 1960, ang Time nga magasin mireport: “Hangtod karon, suod gihapon si Trujillo ug ang simbahan. Ang Arsobispo sa America nga si Ricardo Pittini 83 anyos na ug dili na makakita, pero upat ka tuig sa miagi, siya misulat sa New York Times nga nagdayeg kang Trujillo ug miingon nga ‘kini nga “diktador” gimahal ug gitahod pag-ayo sa mga tawo.’”

Pero human sa 30 ka tuig nga pagsuportar sa pintas nga pagmando ni Trujillo, nausab ang dagan sa politika ug anam-anam nga nausab ang tinamdan sa Simbahang Katoliko. “Sa midaghan ang kontra sa diktatoryal nga pagmando,” matod sa analista, “ug sa ulahi gisulayan nga maestablisar ang demokrasya sa nasod, ang Simbahan nga kanhi mahigalaon kaayo kang Trujillo, napugos sa pagbag-o sa baroganan niini.”

Sa 2011, ang Simbahan napugos sa pagpangayog pasaylo sa mga taga-Dominican Republic. Usa ka sulat sa Simbahan nga gikutlo sa mantalaang Dominican Today miingon: ‘Among giangkon nga kami nasayop ug wala nagmaunongon sa among pagtuo, trabaho, ug mga responsibilidad. Busa, kinasingkasing ming mangayog pasaylo, ug naghangyo sa pagsabot ug pailob sa tanang tawo sa Dominican Republic.’