Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

2015 Tinuig nga Basahon sa mga Saksi ni Jehova

 DOMINICAN REPUBLIC

Pagsanong sa Pag-uswag

Pagsanong sa Pag-uswag

“Tanang Matang sa mga Tawo Mangaluwas”

Kabubut-on ni Jehova nga ang “tanang matang sa mga tawo mangaluwas unta ug makadangat sa tukmang kahibalo sa kamatuoran.” (1 Tim. 2:4) Uyon niini, ang mga Saksi ni Jehova sa Dominican Republic naningkamot nga masangyawan ang tanang tawo sa ilang teritoryo, apil ang mga piniriso.

Sa 1997, duha ka espesyal payunir ang tigduawan kada semana sa Najayo Prison sa San Cristóbal, diin ilang nahibalag si Gloria, 23 anyos nga taga-Colombia nga napriso tungod sa pagpayuhot ug mga droga. Pirme niyang makaestorya ang usa ka sister nga napriso tungod sa sayop nga akusasyon. Aron matubag ang iyang mga pangutana bahin sa Bibliya, gidalhan siya sa mga igsoon ug librong Nangatarongan Pinasukad sa Kasulatan ug uban pang publikasyon. Tungod sa iyang interes ug kadasig sa pagkat-on, daghang piniriso ang nainteres nga moapil sa grupo nga ginaduaw matag semana.

Ang kamatuoran nakapausab gyod kang Gloria, ug sa 1999 siya nahimong dili bawtismadong magmamantala.  Matag bulan mogugol siyag kapin sa 70 ka oras sa pagsangyaw diha sa prisohan, ug nakadumalag unom ka mauswagong Bible study. Dayon sa 2000, gipagawas siya sa Presidente tungod sa iyang maayong panggawi ug gipabalik sa Colombia. Sa 2001, wala madugay human makabalik sa iyang nasod, si Gloria nagpabawtismo bisag supak kaayo ang iyang pamilya.

Si Gloria Cardona nakakat-on sa kamatuoran sulod sa prisohan. Sila sa iyang bana maoy mga payunir karon

Si Gloria nagregular payunir human sa iyang bawtismo. Siya naminyo sa usa ka ansiyano nga regular payunir sab. Nag-alagad sila karon sa usa ka dapit sa Colombia diin dakog panginahanglan. Daghag Bible study si Gloria nga nagpabawtismo. Siya miingon nga mibati siyang utangan kang Jehova, ug ang kinamaayohang paagi nga mabayran kana mao ang pagtabang sa uban nga mahibalo sa kamatuoran.

Gipakita sa kasinatian ni Gloria nga dili babag ang pagkapriso aron makakat-on sa nagaluwas ug kinabuhi nga kamatuoran. Ang mga hawas sa branch nakigkita sa mga opisyales sa General Bureau of Prisons ug mihangyo nga tugotan ang mga igsoon sa pagsulod sa uban pang prisohan aron makadumalag mga Bible study. Ingong resulta, 43 ka brader ug 6 ka sister ang gitagaag permit aron makatudlog Bibliya diha sa 13 ka prisohan.

“Lugwayi ang mga Pisi sa Imong Tolda”

Sa hinapos sa katuigan sa 1900, ang Dominican Republic mireport ug 21,684 ka magmamantala sa 342 ka kongregasyon, ug 34,380 ka Bible study. Ang mitambong sa Memoryal maoy 72,679. Ingong resulta sa pag-uswag, ang katawhan ni Jehova misanong dayon sa mga pulong ni Isaias: “Himoang mas luag ang dapit sa imong tolda. Ug ipabuklad ang mga tabil sa tolda sa  imong dakong tabernakulo. Ayaw pagpugong. Lugwayi ang mga pisi sa imong tolda.”—Isaias 54:2.

Usa ka hagit ang pagbaton ug Assembly Hall nga may igong gidak-on para sa nagkadaghang magmamantala. Sa 1996, nahuman ug tukod ang Assembly Hall nga tapad sa branch sa Santo Domingo, ug gigamit kini sa mga kongregasyon sa siyudad ug kasikbit nga mga lugar. Pero, ang Assembly Hall sa Villa González, nga gigamit sa ubang kongregasyon, kinahanglan nang ayohon o pulihan.

Sa 2001, giaprobahan sa Nagamandong Lawas ang pagtukod ug Assembly Hall nga may igong gidak-on para sa 2,500 ka tawo diha sa lote sa Villa González. Nalipay gyod ang mga igsoon sa pagkahibalong duna poy tukorong pasilidad para sa Ministerial Training School (karon giilisag School for Kingdom Evangelizers). Kini  tukoron tupad sa Assembly Hall ug dunay mga kuwarto, klasehanan, librarya, kosina, ug lawak kan-anan. Sa 2004, si Theodore Jaracz sa Nagamandong Lawas ang mihatag sa pakigpulong para sa dedikasyon sa bag-ong mga pasilidad. Sukad niadto, 15 na ka klase ang migraduwar sa tunghaan.