Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

2015 Tinuig nga Basahon sa mga Saksi ni Jehova

 DOMINICAN REPUBLIC

Pagkakaplag ug Katuyoan sa Kinabuhi

José Estévez

Pagkakaplag ug Katuyoan sa Kinabuhi
  • NATAWO 1968

  • NABAWTISMOHAN 1989

  • MUBONG IMPORMASYON Sa bata pa si José, siya mibalhin sa siyudad kay gustong moasenso. Didto siya nakakat-on sa kamatuoran ug sukad niadto iyang giuna ang Gingharian.

SI José mibalhin sa Santo Domingo dihang siya 11 anyos. Aron makakuwarta, siya magpasinawg mga sapatos ug mamaligyag orange ug pabugnaw. Dihang siya natin-edyer, nailhan siya sa iyang pagkakugihan. Pipila ka tuig sa ulahi, gikuha siya sa iyang magulang nga lalaki, nga usa ka Saksi ni Jehova, sa pag-atiman sa iyang balay. Diha sa lamesa, nakita ni José ang librong Ikaw Mabuhing Walay Kataposan sa Paraiso sa Yuta, ug iya kining gibasa tibuok gabii. Kadto nakahatag ug katuyoan sa iyang kinabuhi.

Pagkasunod semana, si José miadto sa kinadul-ang Kingdom Hall ug nagpaila ingong Saksi ni Jehova. Iyang giingnan ang mga igsoon nga iyang nakat-onan nga kinahanglan siyang motambong ug tigom ug mosangyaw. Miingon sab siya nga iyang nakat-onan sa librong Mabuhing Walay Kataposan ang mga butang nga dili angayng himoon sa mga  Kristohanon, ug mipasalig nga wala niya himoa kadtong mga butanga. Human sa 15 ka adlaw, si José naaprobahan ingong di bawtismadong magmamantala. Siya nabawtismohan unom ka bulan sa ulahi, dihang siya 21 anyos.

Ang eskedyul sa trabaho ni José nagpugong kaniya sa pagtambong ug tigom maong miresayn siya ug misulod ug laing trabaho, nga ang suweldo wala ray katunga sa iyang daang suweldo. Tungod niini, makatambong na siya sa mga tigom ug makaregular payunir. Hinuon, dihang naminyo siya ug duha nay anak, kinahanglan siyang moundang pagpayunir.

Determinado si José nga itudlo ang kamatuoran sa iyang mga anak. Busa, dihang ang ilang kamagulangang anak nga si Noé tulo ka bulan pa lang diha sa tiyan sa iyang asawang si Josefina, iyang basahog kusog ang librong Akong Basahon sa mga Estorya sa Bibliya, nga nagtuong nadunggan siya sa bata. Pagkatawo ni Noé, nabasa na ni José ang tibuok libro. Mao sab kanay iyang gihimo sa ilang ikaduhang anak nga si Neftalí.

Sa ulahi, si José nahimong general manager sa usa ka negosyo diin ang iyang suweldo napulo ka pilo kon itandi sa iyang daang suweldo. Pero sa 2008, pag-edad sa iyang mga anak ug 10 ug 13, miresayn siya sa trabaho ug mibalik sa pagregular payunir uban sa iyang asawa ug mga anak. Kay gamay na lang ang iyang kita, kinahanglan silang magtinabangay aron mamenosan ang mga galastohan. Tanantanan, silang upat nagdumalag mga 30 ka Bible study kada bulan. Gipasaligan kita ni Jesus nga kon atong unahon ang Gingharian, kita panalanginan ni Jehova. (Mat. 6:33) Si José ug ang iyang pamilya nagtuo niana, ug ilang napamatud-ang si Jehova motuman sa iyang saad.