Laktaw ngadto sa video

Laktaw ngadto sa secondary menu

Laktaw ngadto sa kaundan

Mga Saksi ni Jehova

Cebuano

2015 Tinuig nga Basahon sa mga Saksi ni Jehova

 DOMINICAN REPUBLIC

“Nakig-away Ko Samag Leyon”

Luis Eduardo Montás

“Nakig-away Ko Samag Leyon”
  • NATAWO 1906

  • NABAWTISMOHAN 1947

  • MUBONG IMPORMASYON Kanhing opisyal sa partido ni Rafael Trujillo. Siya nakadangat sa kamatuoran ug matinumanong nag-alagad kang Jehova hangtod sa iyang kamatayon sa 2000.

SI Luis, nga paryente ni Trujillo, mao ang treasurer sa Partido Dominicano (ang Dominican Party). Pero, wala siya makaangay sa paagi sa pagmando ni Trujillo ug bisag kapila na siya misulayg resayn sa iyang puwesto, wala gyod siya tugti niini.

Kaduha gisulayan ni Luis nga patyon si Trujillo tungod sa pagpapatay niini sa iyang duha ka magulang. Pero wala gyod mahibalo ang mga awtoridad nga siyay utok sa maong panghitabo. Miadto pa gani siyag espiritista aron ipabarang si Trujillo. Sa paghubit kaniya, si Luis miingon: “Demonyo siyag kinaiya ug hambogiro kaayo.” Diha sa lamesa sa balay sa usa sa mga espiritista, iyang nakita ang librong “The Truth Shall Make You Free” ug iya kining gibasa. Nainteres siya sa libro maong iya ning gidala sa balay ug wala madugay nakombinsir siya nga mao ni ang kamatuoran nga iyang gipangita.

 Dihang miadto si Luis sa Ciudad Trujillo, mitambong siyag tigom sa mga Saksi ni Jehova ug mikuhag pipila ka libro ug magasin. Tibuok gabii niya kining gibasa ug sa ulahi mihangyo siya nga magpa-Bible study. Sa miuswag ang iyang kahibalo, nakadesisyon siya nga biyaan ang iyang trabaho. Pagkahibalo ni Trujillo niini, gitanyagan niya si Luis ug taas nga posisyon isip konsul sa Puerto Rico. Pero gibalibaran ni Luis ang maong tanyag bisag nahibalo siya nga kana moresultag paglutos.

“Nakaagom kog daghang paglutos,” matod ni Luis, “ug gihimo sa gobyerno ang tanang paagi sa pagsulay nako. Pero desidido kong talikdan ang lumalabayng kalipay niining kalibotana.” Si Luis nahimong maisogong magsasangyaw, gani gianggaan siya sa mga pari nga “magwawali.” Sa Oktubre 5, 1947, unom ka bulan human sa iyang unang pagtambong sa tigom, si Luis nabawtismohan.

Human mabawtismohi, si Luis gidakop, gipriso, ug gibartolina. Kadaghan nameligro ang iyang kinabuhi. Pero, dihang dakpon ug paatubangon siya sa korte, iyang pahimuslan ang higayon aron makasangyaw. “Nakig-away ko samag leyon sa pagdepensa sa akong pagtuo,” miingon si Luis, “ug malipay ko kon ako ning mahinumdoman.”

Ang pagkamatinumanon ni Luis sa pag-alagad sa Diyos namatikdan sab sa uban. Sa 1994, ang mantalaan sa Dominican Republic nga El Siglo miingon: “Nailhan si Mr. Luis Eduardo Montás sa San Cristobal ingong seryosong tawo. Siya talagsaon, mabination, ug malumo. Nailhan siya sa kasaysayan sa San Cristobal ingong Kristohanon.”