Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

2015 Tinuig nga Basahon sa mga Saksi ni Jehova

 DOMINICAN REPUBLIC

Kagawasan sa Pagsangyaw

Kagawasan sa Pagsangyaw

 Gipatay si Trujillo

Pagka-1960, nagkadaghan ang misupak ug misaway sa pagmando ni Trujillo sa sulod ug gawas sa nasod. Bisag dihay tensiyon sa politika, si Milton Henschel nga gikan sa world headquarters mibisita sa nasod ug mitambong sa tulo ka adlawng asembliya niadtong Enero 1961. Dihay 957 nga mitambong sa pakigpulong publiko, ug 27 ang nabawtismohan. Sa pagbisita ni Brader Henschel, iyang gitabangan ang mga igsoon kon unsaon pagkobre sa teritoryo ug sa pag-organisar sa buluhaton.

Ang mga circuit overseer nga si Enrique Glass ug Julián López giasayn sa pagduaw sa mga kongregasyon. Si Julián miingon: “Sakop sa akong sirkito ang duha ka kongregasyon sa sidlakang bahin sa nasod ug ang tanang kongregasyon sa amihanan. Sakop sa sirkito ni Enrique ang ubang kongregasyon sa sidlakan ug ang tibuok habagatan.” Ang maong mga pagduaw nagpasig-uli sa komunikasyon tali sa mga kongregasyon ug sa organisasyon ug nagpalig-on sab sa mga igsoon.

Si Salvino ug Helen Ferrari sa ilang pagbiyahe padulong sa Dominican Republic, 1961

Si Salvino ug Helen Ferrari, nga graduwado sa ikaduhang klase sa Gilead, miabot niadtong 1961. Ang ilang eksperyensiya isip misyonaryo sa Cuba nakatabang pag-ayo sa dakong espirituwal nga pagpangani sa Dominican Republic. Si Salvino nag-alagad ingong membro sa Branch Committee hangtod sa iyang kamatayon sa 1997. Si Helen 79 ka tuig na sa bug-os panahong pag-alagad, nga kadaghanan niini iyang gigugol ingong misyonaryo.

Wala madugay human moabot ang magtiayong Ferrari, natapos ang mangtas nga pagmando ni Trujillo  dihang gipaulanag bala sa mga kaaway ang iyang gisakyan sa gabii sa Mayo 30, 1961. Bisan pa niana, ang iyang kamatayon wala moresultag kalinaw. Ang nasod padayong nakasinatig sibil ug politikal nga kagubot sulod sa daghang tuig.

Miuswag ang Buluhatong Pagsangyaw

Kasamtangan, daghan pang misyonaryo ang miabot. Si William Dingman nga graduwado sa unang klase sa Gilead, ug iyang asawang si Estelle, uban si Thelma Critz ug Flossie Coroneos, gibalhin gikan sa branch sa Puerto Rico ngadto sa Dominican Republic duha lang ka adlaw human patya si Trujillo. “Gubot kaayo ang nasod pag-abot namo,” matod ni William, “ug puliki ang mga sundalo sa pag-inspeksiyon sa tanang moagi sa karsada tungod sa gikabalak-ang rebolusyon. Kadaghan mi pahunonga sa mga checkpoint, nga sa matag higayon giutingkay pag-ayo ang among mga bagahe ug gihaw-as ang tanang sulod sa among maleta.” Lisod gayod ang pagsangyaw sa ingon ka gubot nga kahimtang sa politika.

Si Thelma Critz, Estelle ug William Dingman nagpabilin sa nasod human sa 67 ka tuig nga pag-alagad ingong misyonaryo

“Panahon sa pagmando ni Trujillo,” miingon si William, “ang mga Saksi ni Jehova giisip nga Komunista ug daotan kaayong mga tawo. . . . Pero anam-anam namong nausab ang maong panglantaw.” Tungod sa pag-uswag sa buluhaton, daghang sinserong mga tawo ang midawat sa mensahe sa Gingharian. Sa hinapos sa 1961 nga tuig sa pag-alagad, diha nay 33 ka espesyal payunir sa nasod.