Laktaw ngadto sa video

Laktaw ngadto sa secondary menu

Laktaw ngadto sa kaundan

Mga Saksi ni Jehova

Cebuano

2015 Tinuig nga Basahon sa mga Saksi ni Jehova

 DOMINICAN REPUBLIC

Grabeng Pag-atake

Grabeng Pag-atake

“Mapuo na Sila”

Si Borbonio Aybar nabawtismohan panahon sa pagdili niadtong Enero 19, 1955. Human sa iyang bawtismo, siya nagdumalag daghang Bible study sa Monte Adentro ug sa Santiago. Dihang gitangtang ang pagdili sa 1956, nabawtismohan ang pipila sa iyang mga gitun-an, apil ang iyang asawa.

Sa tungatunga sa Hulyo 1957, ang mga opisyal sa gobyerno nagtigom aron sa pagdaot sa mga Saksi. Si Brader Aybar miingon: “Si Francisco Prats-Ramírez ang pangunang mamumulong, ug siya miingon, ‘Pila na lang ka adlaw, mapuo na sila.’” Paglabayg pipila ka adlaw, sa Hulyo 19, 1957, gidakop sa mga polis ang tanang Saksi ni Jehova sa Blanco Arriba, El Jobo, Los Cacaos, ug Monte Adentro.

“Apil ko sa mga gidakop,” matod ni Brader Aybar. “Gidala mi sa hedkuwarter sa militar didto sa Salcedo. Pag-abot namo, gikulata ko sa usa ka koronel nga ginganlag Saladín. Puwerte niyang sukoa ug iya ming gibaharan. Dayon gipalinya mi, usa ka linya para sa lalaki ug usa para sa babaye. Gipamatiran ug gipangulata sa mga guwardiya ang mga lalaki ug ilang gipamunalan ang mga babaye, samtang nag-ingon, ‘Katoliko ko ug mopatay ko.’”

“Akong nabasa ang Bibliya, ug nahibalo ko nga si Jehova ang Diyos”

Si Brader Aybar gipamulta ug gisentensiyahag tulo ka bulan nga pagkapriso. Siya mipadayon: “Diha sa prisohan, giduaw mi sa heneral nga si Santos Mélido Marte. Iya ming giingnan: ‘Akong nabasa ang Bibliya, ug nahibalo ko nga si Jehova ang Diyos. Wa moy gihimong daotan aron mapriso, pero wa koy mahimo kay ang mga obispo ang nagpapriso ninyo. Sila lang  ang makapaus-os sa inyong sentensiya o ang jefe (“ang boss,” si Trujillo).’”

“Ikaw Diay ang Boss?”

Apil sa gipangdakop ang anak ug mga pag-umangkon ni Fidelia Jiménez. Sila iyang mga Bible study. Bisan tuod si Fidelia wala apilag dakop, miadto siya sa mga polis ug nagpapriso aron dasigon kadtong mga napriso. Nianang panahona, mibisita sa prisohan ang komander sa militar nga si Ludovino Fernández, nga iladong hambogiro ug bayolente. Iyang gipatawag si Fidelia ug gipangutana, “Ikaw diay ang boss?”

“Dili,” tubag ni Fidelia. “Kamo ang mga boss.”

“Sa ato pa, ikaw ang pastora,” matod ni Fernández.

“Dili,” tubag ni Fidelia. “Si Jesus ang pastor.”

“Di ba ikaw may hinungdan kon nganong napriso ning mga tawhana?” matod ni Fernández. “Di ba ikaw may nagtudlo nila?”

“Dili,” si Fidelia mitubag. “Ang Bibliya ang hinungdan kon nganong napriso sila. Ilang gipadapat ang ilang nakat-onan sa Bibliya.”

Nianang tungora, milabay sa hallway ang duha ka brader, si Pedro Germán ug ang ig-agaw ni Fidelia nga si Negro Jiménez. Gidala sila gikan sa bartolina paingon sa ilang selda. Napunog mansa sa dugo ang sinina ni Negro, ug nanghubag ang mata ni Pedro. Pagkakita ni Fidelia nga bun-og kaayo sila, iyang gipangutana ang komander, “Ingon ani diay inyong pagtratar sa mga tawong diyosnon, buotan, ug matinud-anon?” Kay nakita ni Fernández nga wala mahadlok si Fidelia, siya nagsugo nga ipabalik si Fidelia sa iyang selda.

Ang mga alagad ni Jehova kinahanglang magmaisogon panahon sa grabeng pagsupak—ug mao gyod nay  ilang gihimo! Bisan ang mga opisyal sa gobyerno nahibalo niana. Pananglitan, sa Hulyo 31, 1957, ang inspektor nga si Luis Arzeno Colón, misulat sa secretary of state nga miingon: “Bisag bag-o lang gipahibalo sa National Congress nga ilegal ang buluhaton sa sektang Saksi ni Jehova, nagpabilin gihapong lig-on ang kadaghanan sa mga membro niini.”