Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

2015 Tinuig nga Basahon sa mga Saksi ni Jehova

 DOMINICAN REPUBLIC

Gipadayon ang Buluhaton

Gipadayon ang Buluhaton

Sekretong Gipadayon sa mga Misyonaryo ang Buluhaton

Ang pagdili sa buluhaton mao ang sinugdanan sa kalbaryo sa mga igsoon. ‘Gipasirad-an ang among mga Kingdom Hall, ug gidili ang buluhaton,’ matod sa misyonaryang  si Alma Parson. ‘Lisod kaayo ang kahimtang sa mga igsoon didto.’ Daghan sab ang napriso ug nawad-ag trabaho. Pero siya miingon: ‘Ang paggiya ug pagpanalipod ni Jehova nadayag sa daghang higayon.’ Ang mga igsoon misalig sa paggiya ni Jehova ug sekretong nagpadayon sa buluhaton.

Wala mi tugoti nga magtigom. Si Lennart Johnson nahinumdom: ‘Ang mga igsoon nagpormag gagmayng grupo ug sekretong nagtigom sa mga balay. Among tun-an didto ang mga artikulo sa Watchtower nga gikopya pinaagig mimeograph. Natagamtam sa maunongong mga igsoon ang espirituwal nga paglig-on ni Jehova pinaagi niining gagmayng grupo.’

Si Roy ug Juanita Brandt maoy apil sa mga nagpabilin sa ilang asaynment panahon sa pagdili

Misamot ang pagpaniid ug pagpanghulga sa gobyerno, pero wala gyod mahadlok ang mga igsoon. Sa Septiyembre 15, 1950, si Secretary Hungría misulat sa Presidente: “Si Mr. Lee Roy Brandt ug uban pang direktor sa mga Saksi ni Jehova balikbalik nang gipatawag ug gimandoan nga ihunong ang tanan nilang buluhaton nga gidili sa Republika. Pero wala gyod sila motuman. Adlaw-adlaw ming makadawat ug report gikan sa lainlaing bahin sa nasod nga sekreto nilang gipadayon ang ilang buluhaton ug wala manumbaling sa mando sa gobyerno.” Gitapos niya ang sulat pinaagi sa pagrekomendar nga papahawaon sa nasod ang langyawng mga direktor nga maoy nanguna sa mga Saksi ni Jehova.

“Naghatag ug Kusog”

Sa hinapos sa 1950, si Brader Knorr ug Brader Henschel miduaw sa nasod. Human niana, ang ubang  misyonaryo gibalhin ngadto sa Argentina, Guatemala, ug Puerto Rico. Ang pipila nila nanarbaho aron makapabilin sa nasod. Pananglitan, si Brader Brandt nagtrabaho sa usa ka kompaniya sa koryente, ug ang uban nagtudlog English. Bahin niini nga mga misyonaryo, ang 1951 Yearbook miingon: “Ang ilang pagpabilin sa nasod maoy naghatag ug kusog sa matinumanong mga sumusunod sa Ginoo kinsa ilang natudloan sa kamatuoran. Nadasig gyod ang tanan sa ilang kaisog sa pagpadayon sa buluhaton.”

‘Ang ilang pagpabilin sa nasod maoy naghatag ug kusog sa mga matinumanon’

Usa sa mga misyonaryong nagtudlog English mao si Dorothy Lawrence. Gawas sa pagtudlog English, nag-Bible study sab siya sa mga interesado. Tungod niana, daghan siyag natabangan ngadto sa kamatuoran.

Ang maunongong mga alagad ni Jehova mihimog laing paagi aron makasangyaw sa kanataran bisag daghan ang naniid nila. Usahay ilang laksion ang pipila ka panid sa libro dayon pil-on kini ug isulod sa bulsa o ipailalom sa ilang gipamalit aron dili sila mamatikdan kon magsangyaw. Ang mga field service report slip gihimo nga morag listahan sa palitonon. Ang libro, pulyeto, magasin, balikduaw, ug oras gipulihag kapayas, beans,  itlog, repolyo, ug spinach. Ang gi-mimeograph nga mga kopya sa The Watchtower gitawag ug yuca (balanghoy), nga komon sa maong dapit.

Nagpadayon ang Buluhaton sa Paghimog Tinun-an

Sa Hunyo 16, 1954, si Rafael Trujillo ug ang Vatican mipirmag kasabotan nga naghatag ug espesyal nga mga pribilehiyo sa Katolikong mga pari sa Dominican Republic. Nianang panahona, mga upat ka tuig nang gidili ang mga Saksi. Bisan pa niana, pagka-1955 diha nay 478 ka magmamantala sa Dominican Republic. Nganong miuswag ang ilang gidaghanon bisan pa sa lisod nga mga kahimtang? “Ang sekreto sa among kusog mao ang espiritu ni Jehova,” matod sa 1956 Yearbook. “Ang mga igsoon nagkahiusa, lig-on ug pagtuo, ug sila maisogong nagpadayon.”

Sa Hulyo 1955, si Trujillo nakadawat ug usa ka pormal ug notaryadong sulat gikan sa world headquarters. Ang sulat detalyadong nagpatin-aw sa neyutral nga baroganan sa mga Saksi ni Jehova ug naghangyo nga  ‘tangtangon na ang pagdili sa mga Saksi ni Jehova ug sa Watch Tower Bible and Tract Society.’ Unsay resulta?