Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

2015 Tinuig nga Basahon sa mga Saksi ni Jehova

 DOMINICAN REPUBLIC

Dili Damgo ang Paglaom sa Gingharian

Efraín De La Cruz

Dili Damgo ang Paglaom sa Gingharian
  • NATAWO 1918

  • NABAWTISMOHAN 1949

  • MUBONG IMPORMASYON Bisag gipriso ug gikulata diha sa pito ka prisohan, determinado gihapon siyang isangyaw ang maayong balita sa Gingharian sa Diyos.

SA 1948, kami sa akong asawa nga si Paula uban sa among anak nga babaye nagsugod nag tambong sa mga tigom sa mga Saksi ni Jehova sa Blanco Arriba. Bisag kinahanglan ming mobaktas ug 40 kilometros padulong ug pauli, wala gyod mi mopaltag tigom. Sa Enero 3, 1949, nabawtismohan mi ni Paula.

Unom ka bulan sa ulahi, ako ug ang pipila sa akong mga kakongregasyon gidakop ug gisentensiyahag tulo ka bulan nga pagkapriso. Sa salog mi matulog ug pakan-on ra mig saging kardaba ug hatagag tsa kausa sa usa ka adlaw. Dihang gibuhian mi, gihulga mi sa mga opisyal sa gobyerno ug abi nilag di na mi mosangyaw. Pero sekreto gihapon ming nagtigom ug nagsangyaw. Kay kanunay ming gibantayan sa mga awtoridad, magtigom mi sa mga balay, tamnanag kape, o kaumahan. Dayon, among ipahibalo human sa matag tigom kon asa ipahigayon ang sunod tigom. Mag-inusara ra  ming mosangyaw nga magsul-ob ug pangtrabaho, ug dili mi mogamit ug literatura o Bibliya. Bisan pa niining tanang paningkamot, gikan sa 1949 hangtod sa 1959, sulod-gawas ko sa pito ka lainlaing prisohan, nga gisentensiyahag tulo ngadto sa unom ka bulan.

Kinahanglan gyod kong mag-amping kay ang pipila sa mga naglutos nako maoy akong mga paryente. May mga panahong sa bukid o umahan ko matulog aron di madakpan, pero usahay madakpan gihapon ko. Dihay higayon nga gipriso ko sa La Victoria sa Ciudad Trujillo, diin dunay 50 ngadto sa 60 ka piniriso sa usa ka selda. Didto, kaduha ra mi pakan-on sa usa ka adlaw—ginaling nga mais sa buntag ug diyutayng kan-on ug beans sa udto. Siyempre, ang tanang Saksi didto nagsangyaw sa kaubang mga piniriso. Pirme sab ming magtigom, diin isulti namo ang among nasag-ulong mga teksto ug maghisgot sa among mga eksperyensiya sa pagsangyaw.

Sa kataposang higayon nga gipriso ko, gibunalan sa usa ka sundalo ug puloan sa riple ang akong ulo ug gusok. Bisag gibati gihapon nako karon ang epekto sa maong pagkulata ug ubang pagdagmal, kadto nagpalig-on sa akong pagtuo ug determinasyon nga alagaron si Jehova.

Karon, 96 anyos na ko ug usa ka ministeryal nga alagad. Kay dili na makalakaw ug layo, maglingkod ko atbang sa akong balay ug sangyawan ang tanang molabay. Para nako, dili damgo ang paglaom sa Gingharian. Kini tinuod, ug kapin sa 60 ka tuig na kong nagsangyaw bahin niini. Wala gyod mausab ang akong pagtuo sa bag-ong kalibotan sukad nadunggan nako ang mensahe sa Gingharian. *

^ par. 3 Si Efraín De La Cruz namatay samtang giandam kini nga asoy.