Laktaw ngadto sa video

Laktaw ngadto sa secondary menu

Laktaw ngadto sa kaundan

Mga Saksi ni Jehova

Cebuano

2014 Tinuig nga Basahon sa Mga Saksi ni Jehova

Usa ka Gatos ka Tuig Kanhi—1914

Usa ka Gatos ka Tuig Kanhi—1914

“NAGTUO mi nga ang Tuig 1914 nagpakita nga dako ang posibilidad nga mapakaylap pa ang Kamatuoran kay sa milabayng katuigan sa Pagpangani,” matod sa The Watch Tower sa Enero 1, 1914. Miabot na ang tuig nga gipaabot sa mga Estudyante sa Bibliya sa daghang katuigan, ug sila nagkugi pag-ayo sa ministeryo. Ingong resulta, minilyon nianang tuiga ang nakadungog sa mga saad sa Bibliya. Pero, ang kalibotan okupado sa laing butang.

 Nagkapintas ang Kalibotan

Sayo sa 1914, usa sa mapintas nga panghitabo sa kasaysayan sa mga welga sa mamumuo sa United States ang mikalas sa kinabuhi sa mga lalaki, babaye, ug mga bata. Ang nagwelgang mga minero ug ilang pamilya gipapahawa sa mga balay nga iya sa kompaniya, ug nagtoldatolda na lang. Sa Abril 20, may pinusilay sa pundok sa mga tolda duol sa Ludlow, Colorado, ug gisunog ang ilang mga tolda. Ingong balos, gipatay sa nasuko nga mga minero ang daghang guwardiya sa kompaniya. Gipatawag ang armi aron mabalik ang kalinaw.

Sa Europe, ang kahimtang mas grabe pa. Sa Hunyo 28, si Archduke Francis Ferdinand sa Austria gipusil ni Gavrilo Princip, 19-anyos nga Serbiano nga taga-Bosnia. Ang maong pagpatay nakasugnib sa Gubat sa Kalibotan I. Pagkatapos sa tuig, mikaylap sa tibuok Europe ang Gubat sa Kalibotan l, gitawag niadto ug Dakong Gubat.

Mga Kombensiyon Nagpasiugdag Pagsangyaw

Samtang misamot ang kagubot sa kalibotan, ang mga Estudyante sa Bibliya nagdinasigay nga magmasiboton sa pagsangyaw. Ang unang kombensiyon sa South Africa nagsugod sa Abril 10. Ang kinatas-ang ihap sa mitambong maoy 34. “Kami gamay kaayong panon niadto,” misulat si William W. Johnston. “Halos katunga [sa nanambong] sa Kombensiyon ang among gibawtismohan. Walo ka sister ug walo ka brader ang nagpasimbolo sa ilang pahinungod sumala sa paagi nga gitudlo sa Ginoo.” Sa kataposang adlaw, giestoryahan sa mga nanambong kon unsaon pagpauswag ang pagsangyaw sa South Africa. Karon, ang kapig 90,000 ka matinumanong magmamantala sa South Africa maoy pamatuod sa kalamposan niadtong ‘gamayng panon.’

Niadtong Hunyo 28, 1914, sa adlaw mismo nga gipusil si Archduke Ferdinand, ang mga Estudyante sa Bibliya nagtigom sa Clinton, Iowa, U.S.A. Sa maong kombensiyon, sa  Hunyo 30, si A. H. MacMillan miingon: “Kon gusto natong madawat ang atong ganti, angay kitang magmaaktibo sa pagbuhat sa kabubut-on sa Diyos, nga magsangyaw sa bisan unsang higayon, nga dad-on ang mensahe sa pagpangani ngadto sa kalibotan.”

Ang “Photo-Drama” Nakadani sa Minilyon

Ang “Photo-Drama of Creation,” produksiyon nga gilangkobag narekord nga mga pakigpulong sa Bibliya ug musika nga gidungan sa dekolor nga mga slide ug pelikula, unang gipasalida sa New York City sa Enero 11, 1914. Lima ka libo ang mitan-aw sa unang pagpasalida, ug daghan ang gibalibaran kay wala nay lugar.

Ang paggama sa “Photo-Drama of Creation” gidangtag duha ka tuig, pero kini “humanhuman na alang sa unang pagpasalida niini sa Enero,” matod sa The Watch Tower. Sa unang unom ka bulan sa 1914, ang mga igsoon naghimog kausaban sa “Photo-Drama.” Pananglitan, sila nagdugang ug introduksiyon nga may gidungan nga asoy ni Charles Taze Russell, nga klarong nagpaila sa prodyuser niini.

May higayon nga ang “Photo-Drama” dungan nga gipasalida sa 80 ka siyudad. Sa Hulyo 1914, kini nakaabot sa Great Britain, nga gipasalida sa napunog tawo nga mga teatro sa Glasgow ug London. Pagka-Septiyembre, kini nakaabot sa Denmark, Finland, Germany, Sweden, ug Switzerland. Dayon sa Oktubre, sa Australia ug New Zealand usab. Kapig siyam ka milyon ang nakakita sa “Photo-Drama” sa unang tuig niini.

Ang matag kopya sa “Photo-Drama” gilangkoban ug gatosan ka slide, mga rolyo sa pelikula, ug dinosenang rekord. Gastoso ang paggamag kopya, ug ang pagpasalida nagkinahanglag eksperyensiyadong mga igsoon. Busa, ang kompletong “Photo-Drama” gipasalida sa dagko rang siyudad. Aron makaabot kini sa mga balangay, tulo ka pinamubong bersiyon sa “Photo-Drama” ang gigama. Usa niini, nailhang “Eureka Drama Y,” may mga slide nga dinuyogan ug narekord  nga mga pakigpulong sa Bibliya ug musika. Ang lain pa, ang “Eureka Drama X” ug ang mas mubong bersiyon, ang “Eureka Family Drama,” tingog lang ug walay mga slide o pelikula. Sa United States, kapig 70,000 ang nakakita sa “Eureka Drama” pagkatapos sa 1914, wala ray upat ka bulan human sa pagrelis niini.

Mga Colporteur ug Boluntaryo Nakigbahin sa Pagsangyaw

Bisag bag-o ug makalingaw ang “Photo-Drama,” nakaamgo ang mga Estudyante sa Bibliya nga angay nilang unahon ang ubang paagi sa pagsangyaw. Ang sulat ni Charles Taze Russell sa tanang colporteur, nga gitawag karon ug payunir, nag-ingon: “Walay laing paagi sa pag-alagad nga mas mabungahon niining panahon sa Pagpangani. Busa giawhag namo ang mga Colporteur nga dili na moapil sa kalihokan bahin sa Photo-Drama . . . May ubang brader ug sister, nga maunongon usab sa Ginoo . . . nga makaatiman sa kalihokan sa Drama.”

 Sa Enero 1914, may 850 ka colporteur. Sa tibuok tuig, ang maong masibotong mga magsasangyaw nakapanagtag ug kapig 700,000 ka kopya sa Studies in the Scriptures. Ang Watch Tower nagpahayag ug “mainitong interes” sa mga colporteur ug nag-awhag sa mga magbabasa niini sa “pagdasig kanila; kay ang ilang kinabuhi dili lunlon kalipay.”

Ang ubang Estudyante sa Bibliya nanagtag ug mga tract sa daghang pinulongan. Sa 1914, nakapanagtag silag kapig 47 ka milyong kopya sa The Bible Students Monthly ug ubang tract!

Ang kalihokan sa mga Estudyante sa Bibliya namatikdan sa katawhan. Sila nagsangyaw sa publiko ug walay bayad ang ilang mga tigom. Usa sa mga ministro sa Kakristiyanohan miingon: “Sa dili madugay, maghunahuna ang mga tawo nga krimen ang pagpangolekta ug unya, unsay atong dangatan? Si Pastor Russell nagpakaulaw natong tanan.”

Kataposan sa mga Panahon sa mga Hentil

Ang mga Estudyante sa Bibliya nagtuo nga “ang mga panahon sa mga Hentil,” nga gihisgotan sa Lucas 21:24 (King James Version), matapos sa mga Oktubre 1, 1914. Sa nagsingabot ang Oktubre, misamot ang ilang kahinam. Ang pipila nagdaladala pa ganig countdown card aron makarasan ang matag adlaw nga molabay. Gibati sa daghan nga sa maong petsa sila moadto na sa langit.

Sa buntag sa Oktubre 2, 1914, si Brader Russell misulod sa kan-anan sa Bethel ug mipahibalo sa pamilya: “Ang mga Panahon sa mga Hentil natapos na; ang mga panahon sa ilang mga hari natapos na.” Ang pipila kanila nahinumdom sa maong mga pulong, nga gibase sa awit 171 sa ilang songbok nga Hymns of the Millennial Dawn. Sukad sa 1879, ang mga Estudyante sa Bibliya nag-awit “Ang mga panahon sa mga Hentil talitapos na,” pero kana dili na tinuod, sanglit ang mga Panahon sa mga Hentil, o “ang tinudlong mga panahon sa mga nasod,” natapos na gyod. (Luc. 21:24)  Ngadtongadto, kini nga kausaban gipadayag diha sa atong mga songbok.

Ang countdown card nga “Be Thou Faithful Unto Death” nakatabang sa pipila nga magmatinumanon hangtod sa kataposan

Pagkatapos sa tuig, ang Mesiyanikong Gingharian lig-on nang natukod sa mga langit, ug ang pipila ka Estudyante sa Bibliya nagtuo nga human na ang ilang buluhaton. Wala silay kalibotan nga haduol na ang panahon sa pagsulay ug pag-ayag kanila. Ang tinuig nga teksto sa 1915 maoy “Makahimo ba kamo pag-inom sa Akong kopa?” nga gibase sa Mateo 20:22 sa King James Version. Ang “kopa” nga gihisgotan ni Jesus naglakip sa mga pagsulay nga iyang atubangon hangtod sa kamatayon. Ang mga Estudyante sa Bibliya hapit nang makaatubang ug mga pagsulay, gikan sa mga kauban nila ug sa tagagawas. Ang ilang pagsanong sa maong mga pagsulay magpamatuod sa ilang pagkamaunongon kang Jehova.