Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

2014 Tinuig nga Basahon sa Mga Saksi ni Jehova

 SIERRA LEONE UG GUINEA

1915-1947 Unang Katuigan (Bahin 2)

1915-1947 Unang Katuigan (Bahin 2)

Pag-atubang sa mga Gladiator

Dihang nakita sa klero sa Freetown nga ang ilang mga sakop giganahan sa mga diskurso ni Brader Brown, sila nasina ug nasuko. Ang Disyembre 15, 1923 nga gula sa The Watch Tower nagtaho: “Ang klero misugod pag-atake sa kamatuoran pinaagi sa mantalaan. Matag karon ug unya gitubag sila ni Brader Brown ug kana gipatik usab sa mga mantalaan.” Sa kataposan, ang klero nahilom. Ang ilang bakak nga pangatarongan nayagyag. Mikaylap ang mga kamatuoran sa Bibliya, busa daghang magbabasa sa mantalaan ang naaghat sa paghangyog literatura sa Bibliya. Ang klero nagplano sa pagpahilom sa katawhan sa Diyos, apan ang daotan nilang mga buhat gisumbalik ni Jehova kanila.Sal. 94:21-23.

Sa pagdepensa sa klero, ang mga Gladiator, kapunongan sa batan-ong mga membro sa simbahan, nag-anunsiyog mga diskurso aron sumpoon ang “Russellism,” sumala sa ilang pagtawag sa mensahe sa Gingharian. Agig tubag, gihagit silag debate ni Brader Brown. Midumili ang mga Gladiator sa maong hagit ug gikasuk-an nila ang editor sa mantalaan nga nagpatik niini. Gidid-an sab nila siya sa pagtambong sa ilang mga miting, busa si Alfred Joseph na lay mitambong.

Ang mga miting gipahigayon sa Buxton Memorial Chapel, inilang simbahan sa Metodista sa Freetown. “Panahon sa pangutanag tubag,” nahinumdom si Alfred, “akong gikuwestiyon ang Anglican creed, doktrina sa Trinidad, ug uban pang dili Kasulatanhong pagtulon-an. Sa ulahi, ang tsirman wala na modawat ug mga pangutana.”

Ang usa sa mga Gladiator nga presente niadtong gabhiona, si Melbourne Garber, nakatambong na sa nangaging mga diskurso ni “Bible” Brown. Siya diay tong  nagtuon sa pagkaministro nga miingon, “Si Mr. Brown suheto gyod sa iyang Bibliya!” Human matimbangtimbang ni Garber ang iyang nadungog, kombinsido siya nga iyang nakaplagan ang kamatuoran. Busa, mihangyo siyag Bible study kang Brader Brown. Gidapit siya ni Brader Brown nga motambong sa senemanang Watch Tower Study sa iyang balay. Bisag si Garber gisalikway sa iyang pamilya, kusog siyang miuswag sa espirituwal, ug wala madugay, siya ug ang uban pa nabawtismohan.

Si Satanas napakyas pagsumpo sa buluhatong pagsangyaw nga nagsugod pa lang niadto. Ang mayor sa Freetown miingon sa mga Gladiator: “Kon kining buhata gikan sa mga tawo, kini mapukan. Apan kon kini gikan sa Diyos, dili kamo makapukan niini.”Buh. 5:38, 39.

Relihiyon sa mga Brown

Sayo sa Mayo 1923, mitelegrama si Brader Brown sa sangang buhatan sa London nga nangayog dugang literatura. Wala madugay 5,000 ka libro ang miabot, ug may misunod pa niini. Iyang gipadayon usab ang paghimog publikong panagkatigom, ug linibo ang nanambong.

Sa hinapos nianang tuiga, ang The Watch Tower mitaho: “Ang buluhaton [sa Sierra Leone] kusog kaayog pag-uswag mao nga si Brader Brown nangayog tabang; ug si Claude Brown, nga taga-Winnipeg pero taga-West Indies niadto, nagpadulong na didto aron motabang sa buluhaton.”

Si Claude Brown nakaagi nag daghang pagsulay ingong ministro. Panahon sa Gubat sa Kalibotan I, iyang giantos ang mga pagdagmal sa prisohan sa Canada ug England tungod sa iyang Kristohanong pagkaneyutral. Siya nag-alagad sa Sierra Leone sa upat ka tuig, nga nakapalig-on gayod sa mga igsoon.

 Si Pauline Cole nahinumdom, “Una ko bawtismohi niadtong 1925, gipangutana kog maayo ni Brader Claude.

“‘Sister Cole, nasabtan ba nimo ang imong nakat-onan sa Studies in the Scriptures?’ siya nangutana. ‘Dili namo gustong maanod ka gikan sa kamatuoran tungod kay wala nimo masabti ang gitudlo sa Bibliya.’

“‘Brader Claude,’ ako mitubag, ‘Balikbalik ko kanang gibasa. Desidido na ko!’”

Pauline Cole

Si Pauline nag-alagad kang Jehova sa kapig 60 ka tuig, nga ang dakong bahin niana ingong espesyal payunir. Natapos ang iyang yutan-ong kinabuhi niadtong 1988.

Si William “Bible” Brown mahunahunaon sab sa pagtabang sa uban nga makabatog maayong batasan sa pagtuon aron mohamtong sa espirituwal. Si Alfred Joseph miasoy: “Dihang magkita mi ni Brader Brown sayo sa buntag, siya moingon: ‘Komosta, Brader Joe? Unsay teksto ron?’ Kon di ko katubag, iya kong maymayan nga  kinahanglang mahibaloan ang teksto kada adlaw gikan sa Daily Manna. [Karon Pagsusi sa Kasulatan sa Adlaw-Adlaw.] Pagkasunod buntag, gibasa dayon nako ang teksto aron duna koy ikatubag niya. Sa primero, wa nako masabti sa bug-os kon unsa kahinungdanon ang maong pagbansay, pero nasabtan ra nako kini sa ulahi.”

Kadtong tanang pagbansay may maayong mga bunga. Pagka-1923, natukod ang usa ka kongregasyon sa Freetown ug 14 ang nabawtismohan. Usa sa bag-ong mga igsoon mao si George Brown, busa tulo na ang pamilyang “Brown” sa kongregasyon. Tungod sa kadasig sa tulo ka pamilya, daghang taga-Freetown nagtawag sa mga Estudyante sa Bibliya nga relihiyon sa “mga Brown.”