Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

2014 Tinuig nga Basahon sa Mga Saksi ni Jehova

 SIERRA LEONE UG GUINEA

1915-1947 Unang Katuigan (Bahin 1)

1915-1947 Unang Katuigan (Bahin 1)

 Ang Kamatuoran Misugod Pagdan-ag

Ang maayong balita nakaabot sa Sierra Leone sa 1915 dihang ang mga lumad namalik gikan sa England nga nagdalag binase sa Bibliya nga literatura. Sa Hulyo sa maong tuig, ang unang bawtismadong alagad ni Jehova miabot sa Freetown. Siya si Alfred Joseph, 31 anyos ug nitibo sa Guyana, South America. Sayo nianang tuiga nabawtismohan siya sa Barbados, West Indies, ug midawat ug kontrata sa Freetown ingong operitor sa tren. Siya mipuyo sa garahean sa tren sa Cline Town, kapig tulo ka kilometro gikan sa Kahoyng Duldol. Iya dayong gisangyawan ang kauban niyang mga trabahante.

Pagkasunod tuig, miduyog kaniya ang kanhing kauban sa trabaho nga taga-Barbados, si Leonard Blackman, kansang inahan, si Elvira Hewitt, mao ang unang nakasangyaw kang Alfred. Nagkasilingan si Leonard ug Alfred, ug regular silang naghisgot sa Bibliya. Nanagtag usab silag literatura sa mga higala ug ubang interesado.

Ilang nakita nga ang kaumahan sa Freetown “puti na aron anihon.” (Juan 4:35) Sa 1923, si Alfred misulat sa tibuok-kalibotang hedkuwarter sa New York: “Daghag interesado sa Bibliya dinhi. Mahimo bang magpadala mog makaatiman kanila ug makatabang sa pagpauswag sa buluhaton sa Sierra Leone?” Siya gitubag: “Magpadala mi!”

“Pipila ka bulan sa ulahi, Sabado sa gabii kadto, wa damhang mikiring ang telepono,” asoy ni Alfred.

Si William “Bible” Brown ug iyang asawa nga si Antonia

 “‘Ikaw ba tong misulat sa Watch Tower Society nga nangayog magsasangyaw?’ pangutana sa nanawag.

“‘Oo,’ tubag nako.

“‘Akoy ilang gipadala,’ ang lanog nga tubag.

“Si William R. Brown diay kadto. Siya, iyang asawang si Antonia, ug ilang batang babaye nangabot niadtong adlawa ug miestar sa Gainford Hotel.

“Pagkabuntag, ako ug si Leonard nagpahigayon sa among senemanang Bible study dihang mibutho sa pultahan ang usa ka dakong tawo, si William R. Brown. Masiboton kaayo siya sa kamatuoran nga buot niyang mohatag dayon ug publikong diskurso pagkaugma. Among giabangan ang kinadak-ang tigomanan sa Freetown—ang Wilberforce Memorial Hall—ug gieskedyul ang una sa upat ka diskurso pagkasunod Huwebes sa gabii.

“Ang among gamayng grupo napuliki sa pag-anunsiyo sa diskurso pinaagi sa mantalaan, handbill, ug pagsulti sa mga tawo. Nahibulong mi kon duna bay mosanong,  pero wa mi angayng kabalak-an. Mga 500 ka tawo ang naghuot sa tigomanan, lakip ang daghang klero sa Freetown. Di masukod ang among kalipay!”

Sa usa ka oras nga diskurso ni Brader Brown, siya mikutlog daghang teksto ug migamit ug slide projector aron ipakita kana sa telon. Balikbalik siyang miingon, “Dili sumala ni Brown kondili sumala sa Bibliya.” Ang mamiminaw nahingangha ug namakpak sa matag punto nga iyang gipalutaw. Nakadayeg sila, dili sa pagkapuwersadong manulti ni Brader Brown kondili sa iyang lig-ong mga pruyba sa Kasulatan. Usa ka naminawng batan-on nga nagtuon pagkaministro miingon, “Si Mr. Brown suheto gyod sa iyang Bibliya!”

1924

Nakisaw ang siyudad sa mga pakigpulong ni Brader Brown, ug panonpanon ang namati. Sunod Dominggo, dakong panon na usab ang nakadungog sa diskursong “Pag-adto ug Paggawas sa Impiyerno—Kinsay Tua Didto?” Ang mga kamatuoran nga gipahayag ni Brader Brown niadtong gabhiona nakatukmod bisan sa iladong mga magsisimba sa pagbiya sa ilang simbahan.

Ang ikaupat ug kataposang diskurso nga “Minilyong Buhi Karon Dili na Gayod Mamatay” gidugok sa mga tawo diin usa ka residente sa Freetown miingon, “Gikanselar ang panggabii nga serbisyo sa simbahan kay ang tanan nilang membro mitambong sa diskurso ni Brader Brown.”

Kay gigamit kanunay ni Brader Brown ang Bibliya ug gipunting kini ingong kinalabwang awtoridad, gianggaan siyag “Bible” Brown. Siya nailado niini nga angga sa tibuok West Africa. Ug hangtod sa kataposan sa iyang kinabuhi sa yuta, siya magarbohong nagdala nianang ngalana.