Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

2014 Tinuig nga Basahon sa Mga Saksi ni Jehova

 SIERRA LEONE UG GUINEA

Ang Tawo sa Watchtower

James Koroma

Ang Tawo sa Watchtower
  • NATAWO 1966

  • NABAWTISMOHAN 1990

  • MUBONG IMPORMASYON Tighatod ug sulat panahon sa giyera sibil.

SA 1997, samtang ang mga rebelde ug mga sundalo sa gobyerno naggubatay sa Freetown, miboluntaryo ko ingong tighatod ug sulat gikan sa Freetown ngadto sa temporaryong sangang buhatan sa Conakry, Guinea.

Sa bus terminal sa siyudad, gikasakay nako ang usa ka grupo sa mga lalaki. May butobuto sa pusil nga milanog sa halayo mao nga nahadlok mi. Samtang nagsubay mi sa kadalanan sa siyudad, girakrakan mi. Miagig laing ruta ang among drayber. Wala madugay, gipara mi sa usa ka grupo sa rebelde ug gipakanaog sa bus. Humag sukitsukit, ila ming gipaagi. Sa ulahi gipara na sab mig laing grupo sa rebelde. Kay may pasahero nga nakaila sa ilang komander, ila sab ming gipaagi. Sa utlanan sa lungsod, among nahinagbo ang ikatulong grupo nga nagsukitsukit namo pero unya gimandoan mi sa pagpadayon. Sa nagpaamihanan mi, nakaagi  mig daghan pang tsekpoint mao nga nagabhian ug abot sa Conakry ang among bus nga napuno sa abog.

Sa kadugayan, sa uban nakong mga biyahe, ako nagdalag mga karton sa literatura, gamit sa opisina, mga rekord sa sangang buhatan, ug hinabang. Kotse ug minibus ang sagad nakong sakyan. Pero mogamit sab kog kargador ug bangka sa paghakot ug literatura agi sa kalasangan ug sa pagtabok sa mga suba.

Kas-a, samtang nagdalag gamit sa opisina gikan sa Freetown paingon sa Conakry, ang gisakyan nakong minibus gipahunong sa mga rebelde sa utlanan. Usa kanila nakamatikod sa akong bagahe ug matahapong nagsukitsukit nako. Unya nakita nako ang eskolmet ko kanhi taliwala sa mga rebelde. Ilang gianggaan siyag Butangero, ug siya ang kinabagisan ug hitsura sa grupo. Akong giingnan ang nagsukitsukit nako nga makigkita ko kang Butangero, ug unya ako siyang gitawag. Nailhan dayon ko ni Butangero ug siya midagan sa pagsugat kanako. Naggakos mi ug nangatawa. Unya kalit siyang nagsineryoso.

“May problema ba?” siya nangutana.

“Moadto unta ko sa Guinea,” mitubag ko.

Iya dayong gimandoan ang mga rebelde nga paagion ang among minibus sa tsekpoint nga dili na inspeksiyonon.

Sukad niadto, dihang mohunong mi sa maong tsekpoint, si Butangero momando sa mga rebelde nga paagion mi. Gihatagan nakog mga magasin ang mga rebelde, ug sila mapasalamaton kaayo. Ngadtongadto ila na kong gitawag ug Ang Tawo sa Watchtower.