Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

2014 Tinuig nga Basahon sa Mga Saksi ni Jehova

SIERRA LEONE UG GUINEA

1945-1990 “Nagpadangat sa Daghan Ngadto sa Pagkamatarong”—Dan. 12:3. (Bahin 2)

1945-1990 “Nagpadangat sa Daghan Ngadto sa Pagkamatarong”—Dan. 12:3. (Bahin 2)

Pagtahod sa Kaminyoon Isip Gasa sa Diyos

Ngadtongadto namatikdan ni William Nushy nga ang pipila ka magmamantala wala magsunod sa sukdanan ni Jehova labot sa kaminyoon. May pipila nga nagpuyopuyo lang ug wala marehistro sa gobyerno. Ang uban nagsunod sa lokal nga kostumbre nga dili una magpakasal hangtod mamabdos ang babaye aron seguradong makaanak sila.

Busa, sa Mayo 1953, gisulatan sa sangang buhatan ang matag kongregasyon ug gipatin-aw kon unsay sukdanan sa Bibliya bahin sa kaminyoon. (Gen. 2:24; Roma 13:1; Heb. 13:4) Ang mga magtiayon gihatagag panahon aron iparehistro ang ilang kaminyoon, kay kon dili, ipalagpot sila sa kongregasyon.1 Cor. 5:11, 13.

Ang kadaghanang magmamantala nalipay sa maong pagtul-id. Pero ang pipila matinugoton ug independenteg kaisipan. Kapig katunga sa mga magmamantala sa duha ka kongregasyon mihunong sa pagpakig-uban sa organisasyon ni Jehova. Kadtong nagmaunongon mas naaktibo hinuon, pamatuod nga gipanalanginan sila ni Jehova.

Human sa paningkamot sa mga igsoon, ang Kingdom  Hall sa Freetown giilang haom nga dapit para sa kasal. Sa Septiyembre 3, 1954, gihimo sa mga igsoon ang ilang unang opisyal nga kasal. Sa ulahi, gihatagan sa gobyerno ug lisensiya sa pagkasal ang kuwalipikadong mga brader sa pito ka distrito sa nasod. Busa mas daghang interesado ang nagpalegal sa ilang kaminyoon ug nahimong magmamantala sa maayong balita.

Kasal sa Kingdom Hall

 May mga interesado nga daghag asawa nga mihimo usab ug kausaban aron masunod ang sukdanan sa Diyos. Si Samuel Cooper, karon nagpuyo sa Bonthe, miasoy: “Sa 1957, misugod ko pagtambong sa miting uban sa duha nako ka asawa ug ngadtongadto nagpaenrol sa Teokratikanhong Tunghaan sa Ministeryo. Usa ka adlaw, giasaynan kog pakigpulong bahin sa Kristohanong kaminyoon. Sa pagdukiduki bahin niana, nakaamgo ko nga kinahanglan nakong bulagan ang akong ikaduhang asawa. Sa gisultihan ko ang akong mga paryente, silang tanan misupak. May anak ko sa akong ikaduhang asawa, pero wala sa unang asawa. Apan desidido na ko nga mosunod sa mga prinsipyo sa Kasulatan. Natingala ko pag-ayo kay sa dihang ang akong ikaduhang asawa mipauli sa iyang pamilya, namabdos ang una kong asawa. Karon, lima na ang among anak sa una kong asawa.”

Si Honoré Kamano nga usa ka interesado nagpuyo duol sa utlanan sa Guinea. Sa gipapauli niya ang iyang ikaduha ug ikatulong mas batan-ong asawa, ang una niyang asawa nakadayeg sa iyang gibuhat ug nainteres sa kamatuoran. Ang usa sa mas batan-on niyang mga asawa, bisag naguol kay gipapauli, midayeg usab sa iyang pagtahod sa mga prinsipyo sa Bibliya. Siya nagpa-Bible study ug sa ulahi nagpahinungod kang Jehova.

Ang mga Saksi ni Jehova ilado nga nagtahod sa kaminyoon

Karon, ang mga Saksi ni Jehova ilado sa tibuok Sierra Leone ug Guinea ingong katawhan nga nagtahod sa kaminyoon. Ang ilang pagkamaunongon sa kapikas nagdayandayan sa pagtulon-an sa Diyos ug naghimaya kaniya ingong Awtor sa kahikayan sa kaminyoon.Mat. 19:4-6; Tito 2:10.

 Panagbangi sa Freetown

Sa 1956, duha pa ka graduwado sa Gilead, si Charles ug Reva Chappell, nangabot sa Freetown. Sa pagpadulong nila sa puy-anan sa mga misyonaryo, nakurat sila tungod sa dakong karatula nga nag-anunsiyog diskurso sa Bibliya sa Wilberforce Memorial Hall. “Ang mamumulong mao si C.N.D. Jones,” matod ni Charles, “hawas sa ‘Ecclesia of Jehovah’s Witnesses.’”

Si Jones, kinsa nag-angkong dinihogan, maoy nanguna sa usa ka grupo nga mibulag sa kongregasyon sa Freetown katuigan kanhi. Ang iyang grupo nag-angkong “matuod” nga mga saksi ni Jehova ug nagtawag sa mga misyonaryo ug niadtong maunongon sa mga hawas sa organisasyon ingong “mga impostor” ug “mga cowboy sa Gilead.”

Migrabe ang situwasyon dihang gipalagpot si Jones ug ang pipila nga midapig niya. “Kini nga pahibalo nakapakurat sa mga igsoon nga gustong pasagdan ra ang mga masupakon,” matod ni Chappell. “Ang pipila mipahayag sa ilang pagsupak. Sila ug ang uban pa padayong nakig-uban sa mga rebelde ug misulay pagdisturbo sa mga tigom ug sa kahikayan sa pagsangyaw. Panahon sa tigom, ang mga samokan nag-uban paglingkod sa gitawag nga lingkoranan sa mga magsusupak. Ang kadaghanan namiya ra sa kamatuoran. Pero may pipila nga nakabalanse ra ug nagmadasigon sa pagsangyaw.”

Tungod sa pagkamaunongon sa kadaghanan, dagayang miagos ang espiritu sa Diyos. Dihang ang magtatan-aw sa sona, si Harry Arnott, miduaw sa Freetown pagkasunod tuig, siya mitaho: “Kini ang unang dakong pag-uswag sa Sierra Leone sa daghang katuigan. Busa makalaom kitag dugang pang kauswagan.”

 Pagtudlo sa mga Kisi

Wala madugay human sa duaw ni Brader Arnott, si Charles Chappell nakadawat ug sulat gikan sa usa ka brader sa silingang Liberia. Buot niyang masangyawan ang iyang kaparyentehan sa Sierra Leone. Sakop siya sa tribong Kisi, nga nagpuyo sa punog-kahoy nga kabungtoran ug kawalogan nga utlanan sa Sierra Leone, Liberia, ug Guinea. Daw daghan sa nagsultig-Kisi nga tribo gustong makakat-on sa Bibliya.

Kay kadaghanan nila dili antigong mobasa ug mosulat, gihikay ang mga klase didto sa Koindu aron matudloan sila sa kamatuoran sa Bibliya. Ginatos ang miapil sa klase sa pagbasag-pagsulat. “Sa wala madugay ang grupo may 5 ka magmamantala, dayon 10, dayon 15, dayon 20,” nahinumdom si Charles. “Dali kaayo silang midawat sa kamatuoran nga nagduda ko kon tinuod ba silang magmamantala. Pero nasayop ko. Kadaghanan nila matinumanon ug masiboton usab!”

Ang madasigong bag-ong mga magmamantala nagpakaylap dayon sa maayong balita sa unahan sa Koindu ug ngadto pa sa Guinea. Mibaktas silag daghang oras latas sa kabukiran nga nagsangyaw sa mga umahan ug balangay. “Mga semana ug usahay mga bulan pa gani nga dili kami makadungog ug dahunog sa trak,” matod ni Eleazar Onwudiwe, magtatan-aw sa sirkito niadto.

Samtang ang mga igsoon nga Kisi nagpugas ug nagbisibis sa binhi sa Gingharian, ang Diyos nagpatubo niini. (1 Cor. 3:7) Dihang nakadungog sa kamatuoran ang usa ka buta nga batan-ong lalaki, gimemorya niya ang 32-panid nga pulyetong “Kining Maayong Balita sa Gingharian.” Sa ulahi, dihang magsangyaw ug mag-Bible study, memoryado niya ang bisan unsang parapo niana nga nakapahingangha kanila. Usa ka amang nga babaye nga midawat  sa kamatuoran mihimog dagkong kausaban mao nga nadasig ang iyang bayawng babaye sa pagtambong sa tigom, bisag diyes kilometros ang iyang baktason.

Kusog kaayong miuswag ang buluhaton taliwala sa mga Kisi. Nagsunod pagkaporma ang duha ka kongregasyon. Mga 30 ka magmamantala ang nagpayunir. Ang pangulo sa lungsod sa Koindu nainteres sa kamatuoran ug midonar ug lote aron tukoran ug Kingdom Hall. Dihang kapig 500 ang mitambong sa sirkitong asembliya sa Kailahun, naporma na usab didto ang usa ka kongregasyon. Wala madugay, katunga sa gidaghanon sa mga Saksi sa Sierra Leone maoy Kisi, bisag ang ilang tribo wala ray dos porsiyento sa populasyon.

Dili tanan nalipay sa maong pag-uswag, ilabina ang relihiyosong mga lider sa tribong Kisi. Tungod sa dakong kasina, buot nilang sumpoon ang “hulga” sa ilang awtoridad. Pero, sa unsang paagi sila moatake ug kanus-a?