Laktaw ngadto sa video

Laktaw ngadto sa secondary menu

Laktaw ngadto sa kaundan

Mga Saksi ni Jehova

Cebuano

2014 Tinuig nga Basahon sa Mga Saksi ni Jehova

 SIERRA LEONE UG GUINEA

2002-2013 Mga Kauswagan (Bahin 2)

2002-2013 Mga Kauswagan (Bahin 2)

Pagtabang sa Amang

Gibanabana nga dunay mga 3,000 ngadto 5,000 ka amang sa Sierra Leone ug gatosan sa Guinea. Kay ‘kabubut-on ni Jehova nga ang tanang matang sa mga tawo mangaluwas unta,’ sa unsang paagi sila “makadungog” sa maayong balita?1 Tim. 2:4.

Si Michelle Washington, misyonaryo sa Gilead nga miabot sa Sierra Leone sa 1998, miasoy: “Naasayn mi ni Kevin nga akong bana sa kongregasyong may upat ka amang nga tigtambongan. Kay antigog American Sign Language, buot nako silang tabangan. Gipainterpret ko sa sangang buhatan sa mga tigom ug asembliya para sa amang ug gipahibalo ko ang dug-ol nga kongregasyon niini nga kahikayan. Ang sangang buhatan nagpahigayon sab ug sign language nga klase para sa mga magmamantala nga buot motabang sa mga amang. Nagsugod  mi pagpangitag mga amang ug pag-Bible study kanila. Daghan sa mga nakakita sa among paningkamot midayeg kanamo, pero dili tanan nalipay. Usa ka pastor nga nagtudlog mga amang nagtawag namo nga ‘bakak nga mga propeta.’ Iyang gipasidan-an ang mga tawo ug ang ilang pamilya nga likayan mi. Ang pipila giingnan nga dili na hatagag kuwarta kon sila makig-uban namo. Sila nabahin dayon sa duha ka grupo: ang wala makaila kanamo ug pabor sa pastor ug ang nakaila kanamo ug dili pabor sa pastor. Ang pipila sa ikaduhang grupo mibarog sa kamatuoran ug nabawtismohan.”

Pananglitan, si Femi natawong amang ug antigo lag komon nga senyas. Matahapon siya sa tanan—ilabina niadtong makadungog—ug mibati nga walay nagmahal kaniya. Unya gisugdan siyag Bible study sa mga brader sa sign language nga grupo. Wala madugay nagtambong na siyag tigom ug nagtuon ug sign language. Si Femi miuswag hangtod nabawtismohan ug malipayong nagtudlo karon sa ubang amang bahin sa kamatuoran.

Si Femi, (sa tuo) samtang nagsenyas ug usa ka awit sa Gingharian

Sa Hulyo 2010, nahimong kongregasyon ang Freetown American Sign Language nga grupo. May sign language sab nga mga grupo sa Bo ug Conakry.

Kabos Apan “Dato sa Pagtuo”

Gipakita sa Bibliya nga kabos sa materyal ang kadaghanang Kristohanon sa unang siglo. Si Santiago misulat: ‘Dili ba gipili sa Diyos ang mga kabos maylabot sa kalibotan aron mahimong dato sa pagtuo?’ (Sant. 2:5) Ang pagtuo kang Jehova nakapahupay ug nakahatag sab ug paglaom sa mga Saksi sa Sierra Leone ug Guinea.

Tungod sa pagtuo, daghang kabos nga pamilya sa lagyong dapit magtigom ug kuwarta sa daghang bulan  aron makatambong ug distritong kombensiyon. Ang uban mananom aron dunay magasto sa biyahe. Tag-20 ngadto 30 ka delegado magdasok sa gagmayng trak ug mag-antos sa kainit, abog, ug-ug nga biyahe nga dangtag 20 ka oras o kapin pa. Ang ubang delegado mobaktas ug lagyong distansiya. “Gibaktas namo ang unang 80 kilometros ngadto sa kombensiyon, nga nagdalag daghang saging,” matod sa usa ka brader. “Gibaligya namo kini sa dalan, busa migaan ang among karga ug may ikaplete na mi sa nabiling bahin sa biyahe.”

Nanakay ug trak paingon sa distritong kombensiyon

Tungod usab sa pagtuo, daghang Saksi wala matental sa pag-abrod. “Misalig mi nga si Jehova motagana sa among panginahanglan,” matod ni Emmanuel Patton, nga migraduwar sa Bible School for Single Brothers. “Kay dako ang panginahanglan sa mga magmamantala  sa Gingharian sa among nasod, nagtuo ming hinungdanon kaayo ang among pag-alagad dinhi.” (Mat. 6:33) Si Emmanuel ansiyano na karon sa kongregasyon. Siya ug ang iyang asawang si Eunice masibotong nag-alagad kang Jehova. Wala sab mag-abrod ang ubang ulo sa pamilya aron sila dili magkabulag ug mapanalipdan ang ilang espirituwalidad. “Dili ko modawat ug trabaho nga mahilayo ko sa pamilya,” matod ni Timothy Nyuma, kaniadto espesyal payunir ug kapuling magtatan-aw sa sirkito. “Dinhi ra sa among dapit gipaeskuyla namo sa akong asawang si Florence ang among mga anak imbes adto sa layo ug lain ang mag-atiman.”

 Tungod sa pagtuo, ang ubang igsoon padayong nag-alagad bisan pa sa lainlaing kalisdanan. Si Kevin Washington miingon: “Daghang Saksi ang regular nga nagsangyaw ug nag-atiman ug mga responsabilidad sa kongregasyon bisan pa sa mga problema nga sa atong kabahin basin himoon natong pasangil nga magpondo lang sa balay ug magmugtok. Pananglitan, ang pipila nag-antos ug sugmatsugmat nga sakit ug walay mga tambal ug ospital nga sama sa ubang lugar. Nagsakripisyo kaayo ang uban aron lang makakat-on sa pagbasag pagsulat. Kon makasaway ko sa paagi sa usa ka brader sa paghatag niyag bahin, mangutana ko sa akong kaugalingon: ‘Kon ako kahay nagtrabahog tibuok adlaw, may problema sa panglawas, dili maayog panan-aw kay walay antiyohos, ug limitadog reperensiya ug walay koryente, makahimo kaha ko sama sa iyang nahimo?’”

Niini ug sa lainlain pang paagi, ang mga igsoon sa Sierra Leone ug Guinea naghimaya kang Jehova. Sama sa mga Kristohanon sa unang siglo, ilang girekomendar ang ilang kaugalingon ingong mga ministro sa Diyos “pinaagi sa daghang pag-antos, sa mga kasakitan, sa mga kawalad-on . . . ingong kabos apan nagapadato sa daghan, ingong walay gipanag-iya apan nagapanag-iya sa tanang butang.”2 Cor. 6:4, 10.

Pag-atubang sa Umaabot nga May Pagsalig

Kapig 90 ka tuig kanhi, si Alfred Joseph ug Leonard Blackman nagtaho nga ang Sierra Leone “puti na aron anihon.” (Juan 4:35) Mga 35 ka tuig sa ulahi, si Manuel Diogo misulat gikan sa Guinea nga nag-ingon: “Daghag interesado dinhi.” Karon, ang mga alagad ni Jehova niining duha ka nasod kombinsido nga daghan pa ang mosanong sa maayong balita.

 Sa 2012, sa Guinea, 3,479 ang mitambong sa Memoryal, kapig upat ug tunga ka pilo sa gidaghanon sa magmamantala sa nasod. Ang Sierra Leone dunay 2,030 ka magmamantala pero 7,854 ang mitambong sa Memoryal, halos upat ka pilo sa gidaghanon sa magmamantala. Usa nga presente sa Memoryal mao si Winifred Remmie, 93 anyos ug espesyal payunir. Siya ug ang iyang bana, si Lichfield, miabot sa Sierra Leone sa 1963. Human sa 60 ka tuig sa bug-os panahong pag-alagad, siya espesyal payunir gihapon. Si Winifred miingon: “Wala gayoy nagdahom nga ang Sierra Leone makabatog daghan kaayong Saksi nga lig-on  sa espirituwal. Bisag tigulang na ko, buot gihapon nako nga dunay ikaamot niining makalipay nga pag-uswag.” *

Kana usab ang gibati sa mga Saksi ni Jehova sa Sierra Leone ug Guinea. Sama sa mga kahoy nga natanom daplin sa katubigan, sila determinado nga padayong mamunga sa pagdayeg kang Jehova. (Sal. 1:3) Sa tabang sa kusog ni Jehova, padayon nilang imantala ang tinuod nga paglaom sa katawhan bahin sa kagawasan—ang “mahimayaong kagawasan sa mga anak sa Diyos.”Roma 8:21.

Ang Branch Committee, gikan sa wala patuo: Collin Attick, Alfred Gunn, Tamba Josiah, ug Delroy Williamson

^ par. 16 Si Winifred Remmie namatay samtang giandam kini nga asoy.