Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

2014 Tinuig nga Basahon sa Mga Saksi ni Jehova

 PAGSANGYAW UG PAGPANUDLO SA TIBUOK YUTA

Europe

Europe
  • KAYUTAAN 47

  • POPULASYON 741,892,871

  • MAGMAMANTALA 1,601,915

  • PAGTUON SA BIBLIYA 862,555

“Nasaag Ka Ba?”

Sa Sweden, usa ka babayeng taga-Somalia gidapit sa tigom sa Kingdom Hall. Dili maayo ang iyang nasinati pagtambong niya. Walay nag-abiabi niya; gitan-aw lang siya sa tanan. Naulaw kaayo siya. Dihay nakamatikod nga dili siya komportable, busa gipangutana siya, “Nasaag ka ba?”

“Mora gyod!” siya mitubag ug mibiya. Dihang nagkita sila  pag-usab sa mga Saksi nga nagdapit niya, siya naglagot ug miingon nga dili na gyod siya mobalik didto. Natingala sila kon unsay nahitabo, kay wa man nila siya makita sa Kingdom Hall. Human sa dugang pag-estoryahay, nasayran nila nga simbahan diay ang iyang naadtoan!

Gidasig na sab siya sa mga Saksi sa pag-adto sa Kingdom Hall. Siya misugot, pero miingon nga kon dili siya makaangay, mobiya ra dayon siya. Apan, pagsulod niya sa Kingdom Hall, mainiton siyang giabiabi sa tanan! Sa tumang kalipay, siya ang kataposang mibiya sa Kingdom Hall human sa tigom. Sukad niadto, siya tigtambongan  na, ug karon siya usa na ka bawtismadong magmamantala.

Nakakaplag Siyag Imbitasyon sa Kalye

Greece: Si Stergios nagpaambit na sa uban sa bahandi nga iyang nakaplagan

Si Stergios usa ka batan-ong lalaki nga nagpuyo sa Greece. Usa ka buntag niana, pagpauli gikan sa trabaho, nakahunahuna siya nga moagi ug laing kalye imbes sa iyang naandang ruta. Samtang naglakaw, may nasiplatan siya sa dalan nga nakadani kaniya—usa ka imbitasyon sa Memoryal sa kamatayon ni Kristo. Kini may pangutana: “Unsay imong pag-isip kang Jesus?” Kay may mga tawo sa palibot, nagpanuko si Stergios pagpunit sa imbitasyon. Pag-abot niya sa balay, gipamalandong niya ang maong pangutana ug gusto niyang mahibalo pa niana.

Si Stergios ug iyang mga barkada nagkasabot nga mangape niadtong hapona. Sa pagpakigkita kanila, siya misubay sa kalye diin nakita niya ang imbitasyon. Namasin siya nga kini tua pa didto. Tuod man didto kini, pero may mga tawo gihapon sa palibot, busa wala gihapon niya kini punita. Pagkahuman nilag pangape, si Stergios misubay sa samang kalye—didto gihapon ang imbitasyon. Ug iya na gayod kining gipunit ug gibasa. Humag basa, siya mihukom nga motambong sa Memoryal!

Pagkahuman sa Memoryal, gidawat ni Stergios ang tanyag nga libreng pagtuon sa Bibliya. Misugod siya pagtambong sa mga tigom ug kusog nga miuswag. Nabawtismohan siya sa usa ka espesyal nga asembliya sa Marso 2013.

Programa sa Radyo Nakahanaw sa Pagpihig

Niadtong Enero 2010, si Finn, usa ka brader sa Copenhagen, Denmark, nagdalag pipila ka magasin  samtang naglakawlakaw. Sa usa ka sigpit nga kalye, gikahinagbo niya ang usa ka edarang lalaki. Gitanyagan siya ni Finn ug mga gula sa Disyembre 2009, nga may mga artikulo bahin sa Pasko. Pagsulti sa lalaki, nailhan ni Finn ang iyang tingog. Siya ang edukadong host sa talk show sa radyo. Pagkaugma namati si Finn sa programa ug natingala nga ang host miingon nga nakadawat siyag mga magasin gahapon. Unya gibasa niya sa kahanginan ang pipila ka bahin sa mga artikulo. Apil niini ang bahin sa misteryosong “bituon” nga mipakita dihang natawo si Jesus. Siya miadmitir nga posibleng gipadala gayod kadto ni Satanas.

Kay nadasig sa maong mga komento bahin sa mga magasin, gitawgan ni Finn ang host sa programa. Sa ilang panag-estorya, matinahorong nangutana si Finn kon puwede bang maghimog programa sa radyo nga maghisgot bahin sa Bibliya. Duha ka semana sa ulahi, giaprobahan ang iyang hangyo. Nasugdan ang 30 ka tagduha ka oras nga programa, ang tanan bahin sa mga Saksi ni Jehova ug sa Bibliya. Ang host ug si Finn naghisgot ug pinili nga mga topiko ug nagtubag ug gatosan ka pangutana sa mamiminaw.

Usa ka mamiminaw ang mitawag sa teknisyan sa estasyon sa radyo ug nagbilin sa iyang numero sa telepono. Gusto niyang kontakon siya sa mga Saksi ug gihikay dayon kadto. Siya nakadungog ug pagbutangbutang batok sa mga Saksi ni Jehova gikan sa mga higala ug pamilya sa daghan nang katuigan. Pero tungod sa maong programa, nahanaw ang iyang pagpihig batok sa mga Saksi. Nasugdan ang Bible study, ug sa 2013, siya mitambong sa Memoryal ug sa espesyal  nga pakigpulong. Tigtambongan na siyag tigom ma-Dominggo ug maayong mokomento sa Pagtuon sa Bantayanang Torre. Ang ubang tawo sa ilang dapit madinawaton na sa kamatuoran tungod sa maong programa sa radyo.

Nagbilin Siyag Imbitasyon sa Ilang Pultahan

Kataposang adlaw kadto sa distritong kombensiyon sa Italy. Samtang nanamilit si Lucio sa pipila ka higala, may magtiayon nga miduol kanila. Nangutana si Lucio kon unsay ilang kongregasyon. “Wala miy kongregasyon,” mitubag sila.

“May nag-imbitar ba ninyo?” nangutana si Lucio.

“Wa, mianhi ra mig amo,” mitubag sila.

Natingala si Lucio, busa siya nangutana, “Nganong nahibalo mo nga dunay kombensiyon?”

Sila miingon: “Nakakita mig imbitasyon sa among pultahan, mao nga nanganhi mi.”

Sa gisultihan nila si Lucio kon diin sila nagpuyo, si Ester nga iyang asawa mipatugbaw: “Akoy nagbilin adto! Kataposang adlaw kadto sa kampanya, busa gihunahuna nako nga mas maayong ibilin sa pultahan sa mga balay ang nahibiling mga imbitasyon inay ilabay kini.” Pagkakita sa imbitasyon, ang magtiayon mihukom nga moadto sa Assembly Hall para motambong sa programa pagka-Dominggo. Human sa mubong pag-estoryahay, giimbitar ni Lucio ug Ester ang magtiayon sa ilang balay aron mangaon, ug didto nila gipadayon ang estoryahay. Ang interesadong magtiayon midawat ug Bible study. Andam kanunay sila sa ilang pagtuon ug karon nagtambongan na ug nagpakigbahin sa mga tigom.