Laktaw ngadto sa video

Laktaw ngadto sa secondary menu

Laktaw ngadto sa kaundan

Mga Saksi ni Jehova

Cebuano

2014 Tinuig nga Basahon sa Mga Saksi ni Jehova

 MAKAIIKAG NGA REPORT SA MIAGING TUIG

Pagpahinungod sa mga Sangang Buhatan

Pagpahinungod sa mga Sangang Buhatan

Sa Oktubre 20, 2012, ang mga Saksi ni Jehova sa Korea nalipay dihang gipahinungod kang Jehova ang ilang gi-renovate ug bag-ong gitukod nga mga pasilidad sa sangang buhatan. Halandomon kini nga okasyon kay mahandom sa mga igsoon ang 100 ka tuig nga matinumanong pag-alagad. Dugang pa, sa 2012, ang gidaghanon sa ilang magmamantala mikapin na sa 100,000 sa unang higayon. Mga 1,200 ka lokal nga boluntaryo ug 239 ka international servant ug mga boluntaryo gikan sa siyam ka nasod ang nagtinabangay pagtukod sa bag-ong residensiya, imprentahanan, audio/video studio, ug talyer. Gi-renovate usab ang kadaghanang bilding.

Si Anthony Morris, membro sa Nagamandong Lawas, mihatag sa makapadasig nga pakigpulong sa  pahinungod atubangan sa 3,037 nga nanambong. Pagkaugma, gihimo ang espesyal nga miting diha sa dakong tigomanan ug kini gikonektar sa kapin sa 1,300 ka kongregasyon sa Korea pinaagig Internet. Dihay 115,782 ka Saksi ni Jehova ug mga interesado nga nakapahimulos sa makapalig-on nga programa.

Dili gayod malimtan sa kasaysayan sa mga magsisimba ni Jehova sa Liberia ang Marso 9, 2013. Ang mga bisita gikan sa 11 ka nasod mitambong sa pagpahinungod sa gi-renovate ug gipadak-an nga sangang buhatan. Nalipay ang tanan sa pagpatalinghog sa pakigpulong ni Guy Pierce, membro sa Nagamandong Lawas. Human sa kapig napulo ka tuig nga kagubot nga nakalangan sa proyekto, ang sangang buhatan gipadak-an hangtod sa tapad nga propidad nga kaniadto tagoanan sa mga rebelde ug kampo sa mga bakwet. Ang 51 ka membro sa pamilyang Bethel nalipay nga duna na silay residensiya nga may 35 ka kuwarto, gi-renovate nga mga opisina, pondohanag  literatura, bag-ong maintenance bilding, bag-ong kosina, ug kan-anan.

Ang mga tawo sa Republic of Georgia maabiabihon ug relihiyoso. Human mabungkag ang Soviet Union, miuswag ang buluhaton sa Gingharian pero gisundan kinig grabeng paglutos. Karon, milurang na ang paglutos, ug sa Sabado, Abril 6, 2013, usa ka talagsaong hitabo sa kasaysayan sa mga Saksi ni Jehova sa Georgia ang nasinati dihang gipahinungod ang gi-renovate ug gipadak-an nga sangang buhatan, Assembly Hall, ug pasilidad alang sa School for Kingdom Evangelizers, ug School for Traveling Overseers and Their Wives. Si David Splane sa Nagamandong Lawas ang mipakigpulong sa pahinungod nga gitambongan ug 338 ka bisita gikan sa 24 ka nasod uban sa kapig 800 ka Saksi sa Georgia.

Georgia

Pagkaugma, 15,200 ang nakabenepisyo sa espesyal nga pakigpulong ni Brader Splane nga gikonektar pinaagig audio/video sa mga dapit nga gitigoman sa mga kongregasyon sa tibuok Georgia. Makapalig-on gayod sa daghan ang maong internasyonal nga panagkatigom. Usa ka brader miingon, “Ingon diay niini ang bag-ong kalibotan.”

Sa Hunyo 29, 2013, gipahinungod ang bag-ong tulo ka andanang opisina sa sangang buhatan sa Yangon, Myanmar. Si Guy Pierce sa Nagamandong Lawas maoy mihatag sa pakigpulong sa pahinungod nga gitambongan ug 1,013 nga naglakip sa mga bisita gikan sa 11 ka nasod. Usa ka grupo sa mga igsoon sa Myanmar ang giasayn sa pag-abiabi sa mga bisita sa Yangon International Airport. Giduol sila sa usa ka lalaki gikan sa nasod nga gibando ang buluhaton sa mga Saksi ni Jehova. Iyang gitudlo ang gigunitan sa mga igsoon nga karatulang  “Welcome Jehovah’s Witnesses” ug nangutana: “Nagtagbo ba mog mga saksi sa usa ka kaso sa korte?” “Wala, mga higala namo ang among gitagbo,” sila mitubag. “Kinsa man diay ning Jehova?” ang tawo nangutana. Nasangyawan na hinuon siya sa mga igsoon. Pagkasunod adlaw human sa programa sa pahinungod, gihimo ang espesyal nga miting sa Myanmar Convention Center, ug si Brader Pierce mipakigpulong sa ulohang “Alagara si Jehova Uban ang Masinabotong Kasingkasing.” Ang programa gikonektar sa telepono sa unom ka lugar sa Myanmar, mao nga 2,963 ang nakapaminaw niadto. Usa sa mga drayber sa bus nga naghatod sa mga igsoon sa espesyal nga miting sa Yangon miingon: “Lahi gyod mo sa ubang relihiyon. Malinawon mo, desente, ug buotan kaayo. Dugay na kaayo kong drayber ug bus pero karon pa ko kakitag sama ninyo!”

Myanmar: Giabiabi sa mga igsoon ang mga bisita nga motambong sa pagpahinungod sa sangang buhatan

Sa Miyerkoles, Hulyo 3, 2013, ang maunongong mga alagad ni Jehova sa Moldova nalipay sa pakigpulong  sa pahinungod ni Stephen Lett sa Nagamandong Lawas alang sa bag-ong gipadak-an nga sangang buhatan. Lakip niana ang tulo ka andanang bilding nga may pondohanag literatura, residensiya nga may napulo ka kuwarto, ug dos andanas nga Kingdom Hall nga gigamit sa pito ka kongregasyon. Ang 33 ka membro sa pamilyang Bethel sa Moldova nalipay sa pag-abiabi sa mga delegado gikan sa Germany, Ireland, Netherlands, Romania, Russia, Ukraine, ug United States. Mitambong usab ang mga igsoon nga matinumanong nag-alagad kang Jehova niadtong gidili pa ang buluhaton. Pipila kanila nakatabang pa sa pagkopya ug pagdeliber ug literatura. Presente usab kadtong gipapahawa sa nasod uban sa ilang ginikanan ngadto sa Siberia panahon nga gilutos ang mga Saksi ni Jehova sa kanhing Soviet Union. Pagka-Dominggo, si Brader Lett mihatag ug makapadasig nga pakigpulong nga giinterpret ngadto sa Romanian ug Russian sa 14,705 nga mitambong. Kadto ang kinadak-ang panagkatigom nga gihimo sa mga Saksi sa Moldova.

Magpadayon sa Pag-ampo ug Dili Moundang

Gipasiugda ni Jesus nga kita magpadayon sa ‘pag-ampo ug dili moundang.’ (Luc. 18:1) Dihang kamo mag-ampo, gipalig-on ninyo ang inyong paglaom. Busa, “lahutay sa pag-ampo.” (Roma 12:12; 1 Tes. 5:17) Samtang inyong himoon kini, “hinaot nga ang Diyos sa kalinaw . . . magsangkap kaninyo sa matag maayong butang aron sa pagbuhat sa iyang kabubut-on, nga pinaagi ni Jesu-Kristo magbuhat diha [kaninyo] nianang makapahimuot kaayo sa iyang panan-aw.”Heb. 13:20, 21.