Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

2014 Tinuig nga Basahon sa Mga Saksi ni Jehova

 MAKAIIKAG NGA REPORT SA MIAGING TUIG

Paghandom sa Kagahapon

Paghandom sa Kagahapon

Sa Oktubre 2012, gibuksan sa Brooklyn, New York ang usa ka eksibit bahin sa kasaysayan sa mga Saksi ni Jehova ug kini masuroy nga walay tour guide. Gipasiugda niini ang pakigbisog ug kapeligrohan nga nasinati niadtong nagsunod sa Kristohanong pagkinabuhi nga gitudlo ni Jesus.

Sa unang semana pa lang, kapig 4,200 ka bisita ug Bethelite ang naka-tour sa eksibit. Pagbukas niini, si Naomi, usa ka Saksi nga nagpuyo sa duol, mi-tour dayon. “Ang mga petsa sa panghitabo nakatabang nako nga masabtan kon kanus-a ug nganong nahitabo kadto,” matod niya. “Daghan kaayo kog nakat-onan bahin sa organisasyon ug sa modernong kasaysayan niini.”

 Ang tour mosugod sa panahon sa mga Kristohanon sa 33 C.E. hangtod karon. Ang eksibit may upat ka seksiyon. Ang matag usa may tema nga gibase sa Kasulatan ug may mubong video sa Iningles, nga may subtitle sa pito ka pinulongan.

Ang unang seksiyon nga “Mga Tawo Nahigugma sa Kangitngit” gibase sa mga pulong ni Jesus sa Juan 3:19. Gitagna sa Bibliya nga inigkamatay sa mga apostoles, may mga tawong daotan nga “motungha ug magsultig tinuis nga mga butang.” (Buh. 20:30) Kadtong nangahas pagsupak kanila grabeng gisilotan.

Sa kasukwahi, ang sunod nga seksiyon, “Mosidlak ang Kahayag,” nga gibase sa 2 Corinto 4:6, nagpakita sa panghitabo sa hinapos sa ika-19ng siglo dihang nagsugod pagtuon sa Kasulatan ang sinserong mga estudyante  sa Bibliya. Ilang gisalikway ang ilang kanhing tinuohan nga wala itudlo sa Bibliya ug maisogong gipasidlak ang kamatuoran. Gipakita niining seksiyona ang pag-uswag sa ilang kahibalo ug gidaghanon una ang Gubat sa Kalibotan I.

Ang tour magpadayon sa seksiyon nga nagpakita sa talagsaong nahimo sa mga Saksi ni Jehova nga makapahingangha hangtod karon. Sa 1914, ang mga Estudyante sa Bibliya (tawag kaniadto sa mga Saksi ni Jehova) nagsugod pagpasalida sa “Photo-Drama of Creation.” Minilyon ang nakatan-aw niini, nga may mga slide ug pelikula nga dinuyogan ug audio rekording. Apil sa gieksibit ang orihinal nga mga dibuho, mubong sampol sa introduksiyon sa programa, ug kapig 500 ka dekolor nga slide.

 Ang paglutos ni Satanas sa mga sumusunod ni Kristo, nga gihubit sa Pinadayag 12:17, mao ang tema sa ikatulong seksiyon nga “Ang Dragon Napungot.” Gipasiugda niini ang Kristohanong neyutralidad panahon sa gubat. Gawas pa sa mga artifact ug piktyur, gipakita sab sa video kon giunsa pagpugos ang mga Saksi nga magsundalo, sama kang Remigio Cuminetti sa Italy, nga wala mosul-ob sa uniporme sa sundalo o moapil sa Gubat sa Kalibotan I. Ang laing video nagpakita kang Alois Moser sa Austria kinsa midumili sa pag-ingong “Heil Hitler,” busa siya nawad-ag trabaho ug gibalhog sa kampo konsentrasyon sa Dachau. Makita sab dinhi ang replika sa ngiob nga selda nga may mga letrato sa sulod niini. Kini nagpahinumdom sa mapait nga kahimtang sa naprisong mga Saksi ni Jehova sa Greece, Japan, Poland, kanhing Yugoslavia, ug sa ubang nasod tungod sa ilang pagtuo.

Ang kataposang seksiyon, “Maayong Balita Alang sa Tanang Nasod,” nga gibase sa Pinadayag 14:6, naghisgot sa kalihokan sa mga Saksi sa di pa dugayng mga dekada. Gipakita sa naglaray nga piktyur sa bungbong ang kusog nilang pag-uswag, padayong pagsangyaw, ug inigsoong gugma. Sa kataposan, pinaagi sa mga touch-screen monitor, ang mga bisita makasusi sa Bible House ug sa Brooklyn Tabernacle, mga dapit nga gigamit sa mga Saksi ni Jehova kapig 100 ka tuig kanhi.

Ang eksibit nahimutang sa 25 Columbia Heights sa Brooklyn, New York. Bukas kini gikan sa Lunes hangtod sa Biyernes, 8:00 s.b. hangtod 5:00 s.h., ug walay bayad. Kon makaadto ka sa New York City, mahimo kang mo-tour aron handomon ang kagahapon.