Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

2014 Tinuig nga Basahon sa Mga Saksi ni Jehova

 MAKAIIKAG NGA REPORT SA MIAGING TUIG

Animated Video Nakatandog sa Kasingkasing sa mga Bata

Animated Video Nakatandog sa Kasingkasing sa mga Bata

Si Caleb, ang buotang bata sa serye sa video nga Mahimong Higala ni Jehova sa jw.org, ilado na karon sa tibuok kalibotan. Ang unang video nahubad na sa kapig 130 ka pinulongan, ug gatosan ka sulat ang nadawat bahin niini nga video.

Usa ka sulat gikan sa 11-anyos nga batang lalaki ug sa 8-anyos niyang manghod nga babaye nag-ingon: “Gusto namong mohatag para sa buluhatong pagsangyaw sa tibuok kalibotan. Nahalinan mig duha ka baka nga ginganlan namog Big Red ug Earl. Idonar namo kini aron makagama mog daghan pang video nga Mahimong Higala ni Jehova. Nindot unta kon si Caleb mamanghorag  babaye ug maguol kay wa na siya kaayo tagda. Paborito namo ang video nga Caleb!”

Namemorya sa daghang bata ang video, apil ang kanta ug bisan ang gisulti sa tig-asoy. Usa ka sister misulat nga ang ilang kongregasyon nga may 100 ka magmamantala dunay 40 ka bata, nga kadaghanan ubos sa 10 anyos. Siya naglingkod sa ikatulong laray dihang gikanta sa tigom ang paniklop nga awit numero 120, ug nakahilak dihang nadungog niya ang sadya kaayong pagkanta sa mga bata sa “ilang awit.”

Usa ka lola miasoy nga human matan-aw kaduha sa iyang apong babaye ang video, ang apo miingon: “Kinahanglang hiposon nako ang mga dulaan sa akong kuwarto aron walay madagma ug masakitan.” Desidido siya nga manghipos una sa iyang kuwarto ayha mokaon.

Sa usa ka balangay sa South Africa, daghang bata ang nagsulod-gula kada adlaw sa balay sa usa ka Saksi. Abi sa pipila ka tawo nga tungod kadto sa tinda nga kendi sa pamilya. Ang mga bata giagni diay sa ubang bata sa pagtan-aw sa video nga Pamati, Magmasinugtanon, ug Magmabulahan diha sa ilang pinulongang Xhosa. Usa ka higayon, 11 ka bata ang nanan-aw ug namemorya nilang tanan ang awit.

Sa Ecuador, may duha ka batang dili-Saksi nga nagsultig Quichua, ang otso anyos nga si Isaac ug iyang singko anyos nga manghod, si Saul. Gitigom nila ang ilang pangmeryenda aron ipalit ug pusilpusil, espada-espada, ug herohero. Usa ka adlaw gipahinlo sila sa ilang inahan sa ilang kuwarto ug gipahiposan ang tanan nilang  dulaan sa karton ug gipabutang ilalom sa katre. Sa ulahi, ang mga bata giregalohan sa bag-ong DVD nga Mahimong Higala ni Jehova, ug ilang gitan-aw kini. Paglabayg usa ka semana, samtang nanghinlo ang inahan sa balay, iyang nakit-an nga usa na lang ka traktrak ang nabilin sa karton ilalom sa katre. Gipangutana niya ang iyang mga anak, “Hain na man tong inyong mga dulaan?” Sila mitubag, “Dili gusto ni Jehova adtong mga dulaana mao nga among gilabay sa basurahan.” Dihang ang mga bata sa silinganan magdulag mga dulaan nga nagtudlog kapintasan, sultihan sila ni Isaac: “Ayaw mog dula ana. Si Jehova dili gusto ana!”

Croatia: Ang mga awit sa Gingharian nakatandog sa kasingkasing sa mga bata