KON NGANONG IMPORTANTE: Gitagna ni Zacarias nga ang mga tawo gikan sa tanang pinulongan sa mga nasod modawat sa maayong balita. (Zac 8:23) Pero kinsay motudlo kanila? (Rom 10:13-15) Pribilehiyo ug responsibilidad nato nga isangyaw ang maayong balita ngadto sa tanan diha sa atong teritoryo.​—od 84 ¶10-11.

KON UNSAON KINI PAGHIMO:

  • Pangandam. Nakasangyaw ka bag tawo nga lahig pinulongan? Puwede nimong gamiton ang JW Language app aron makakat-on ug simpleng presentasyon. O gamit ang imong gadyet, puwede nimong ipakita niya sa jw.org kon unsaon pagpangitag dugang impormasyon diha sa iyang kaugalingong pinulongan

  • Paniid. Kon nagsangyaw ka sa balay ug balay, pahimusli sab ang mga kahigayonan nga makasangyaw ka sa mga nangagi o niadtong naghulat ug sakyanan. Kon nakigbahin sa publikong pagsangyaw, paningkamoti nga dili ka mabalda sa imong tumong nga makasangyaw

  • Pagkugi. Baliki sa sunod higayon ang mga balay nga walay tawo. Paningkamoti nga naa kay maestorya sa kada balay, tingali sa laing oras o adlaw. Tingali ang ubang tagbalay masangyawan lang pinaagig sulat, telepono, o street witnessing

  • Paghimog balikduaw. Baliki dayon kadtong nagpakitag interes. Kon lahi siyag pinulongan, pangitag magmamantala nga kamao sa iyang pinulongan. Ipadayon ang pagbisita niya hangtod nga makontak na siya sa magmamantala nga kamao sa iyang pinulongan.​—od 94 ¶39-40

TAN-AWA ANG VIDEO NGA PAGSANGYAW SA “KINALAY-ANG DAPIT SA YUTA,” UG TUBAGA ANG MOSUNOD NGA MGA PANGUTANA:

  • Unsang mga pagpangandam ang gihimo sa mga igsoon aron masangyawan ang mga tawo sa lagyong teritoryo? (1Co 9:22, 23)

  • Unsang mga babag ang kinahanglan nilang atubangon?

  • Unsang mga panalangin ang ilang nadawat?

  • Unsay puwede nimong himoon aron mas daghan pa kag masangyawan sa inyong teritoryo?