Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa kaundan

Laktaw ngadto sa video

Mga Saksi ni Jehova

Cebuano

Bibliya Online

BAG-ONG KALIBOTANG HUBAD SA BALAANG KASULATAN

Salmo 103:1-22

Iya ni David. 103  Dayega si Jehova, Oh kalag ko,+ Bisan ang tanan nga ania sa akong kahiladman, ang iyang balaang ngalan.+   Dayega si Jehova, Oh kalag ko, Ug ayaw kalimti ang tanan niyang mga buhat,+   Siya nga nagapasaylo sa tanan mong kasaypanan,+ Nga nagaayo sa tanan mong balatian,+   Nga nagabawi sa imong kinabuhi gikan sa gahong,+ Nga nagapurongpurong kanimo sa mahigugmaong-kalulot ug sa mga kaluoy,+   Nga nagatagbaw sa tibuok nimong kinabuhi pinaagi sa maayong butang;+ Ang imong pagkabatan-on nagpadayon sa pagbag-o ingon gayod nianang sa usa ka agila.+   Si Jehova nagpahamtang ug mga buhat sa pagkamatarong+ Ug hudisyal nga mga hukom alang sa tanan nga ginatikasan.+   Gipahibalo niya ang iyang mga dalan kang Moises,+ Ang iyang mga pagpakiglabot ngadto sa mga anak sa Israel.+   Si Jehova maluluy-on ug mapuangoron,+ Mahinay sa kasuko ug dagaya sa mahigugmaong-kalulot.+   Siya dili mangitag sayop sa tanang panahon,+ Ni mayugot siya hangtod sa panahong walay tino.+ 10  Wala niya buhata kanato ang angay sa atong kasal-anan;+ Ni nagpahamtang siya kon unsay angay kanato pinasukad sa atong kasaypanan.+ 11  Kay ingon nga ang mga langit hataas kay sa yuta,+ Ang iyang mahigugmaong-kalulot labaw ngadto kanila nga nahadlok kaniya.+ 12  Ingon sa pagkalayo sa sidlakan gikan sa kasadpan,+ Sa mao nga gilay-on iyang gipahilayo gikan kanato ang atong mga kalapasan.+ 13  Ingon sa usa ka amahan nga magapakitag kaluoy sa iyang mga anak,+ Si Jehova nagpakitag kaluoy kanila nga nahadlok kaniya.+ 14  Kay siya nahibalo pag-ayo sa atong pagkaumol,+ Nga nahinumdom nga kita abog.+ 15  Kon mahitungod sa may-kamatayong tawo, ang iyang mga adlaw sama nianang sa lunhawng balili;+ Ang iyang paglambo maoy sama sa bulak sa kapatagan.+ 16  Kay hangin lamang ang moagi sa ibabaw niini, ug kini mahanaw;+ Ug dili na kini mailhan sa iyang dapit.+ 17  Apan ang mahigugmaong-kalulot ni Jehova maoy gikan sa panahong walay tino hangtod sa panahong walay tino+ Alang niadtong nahadlok kaniya,+ Ug ang iyang pagkamatarong ngadto sa mga anak sa mga anak,+ 18  Ngadto kanilang nagatuman sa iyang pakigsaad+ Ug ngadto kanilang nahinumdom sa iyang mga sugo aron sa pagtuman kanila.+ 19  Si Jehova lig-ong nagtukod sa iyang trono didto sa kalangitan;+ Ug ang iyang gingharian nagagahom ibabaw sa tanang butang.+ 20  Dayega ninyo si Jehova, Oh kamong mga manulonda+ niya, nga gamhanan sa kusog, nga nagatuman sa iyang pulong,+ Pinaagi sa pagpamati sa tingog sa iyang pulong.+ 21  Dayega ninyo si Jehova, kamong tanang panon niya,+ Kamo nga iyang mga alagad, nga nagabuhat sa iyang kabubut-on.+ 22  Dayega ninyo si Jehova, kamong tanan niyang mga buhat,+ Sa tanang dapit nga iyang gimandoan.+ Dayega si Jehova, Oh kalag ko.+

Mga Footnote